3 ບ້ານ ເມືອງໄຊພູທອງ ປະກອບສ່ວນສ້າງທາງ

   ພິທີເປີດນຳໃຊ້ເສັ້ນທາງດິນແດງຍາວ 11 ກິໂລແມັດລະຫວ່າງບ້ານສົມສະອາດ-ຄໍາ ແຮງ-ນາໂດນ ເມືອງໄຊພູທອງ ແຂວງສະຫວັນນະເຂດ ໄດ້ຈັດຂຶ້ນໃນຫວ່າງບໍ່ດົນຜ່ານມານີ້, ໂດຍການເຂົ້າຮ່ວມຕັດແຖບຜ້າ ແລະລັ່ນຄ້ອງ 9 ບາດຂອງ ທ່ານ ຄໍາວິໃສ ຜຸຍຍະວົງ ເຈົ້າເມືອງໆໄຊພູທອງ, ມີຍາ ທ່ານ ມະຫາສົມບູນ ເຈົ້າຄະນະອົງການພຸດທະສາສະໜາສຳພັນລາວ (ອພສ) ແຂວງ, ຍາທ່ານ ທອງດໍາ ຈັນທະວົງ ເຈົ້າຄະນະ ອພສ ເມືອງ ມີຄະນະປະຈໍາພັກເມືອງ, ກໍາມະການພັກເມືອງ, ອໍານາດການປົກຄອງ, ຜູ້ຮັບເໝົາກໍ່ສ້າງ, ນັັກທຸລະກິດຕະຫຼອດເຖິງອຳນາດການປົກຄອງ ແລະ ພໍ່ແມ່ປະຊາຊົນເຂົ້າຮ່ວມ.

  ໂຄງການກໍ່ສ້າງເສັ້ນທາງແຕ່ບ້ານສົມສະອາດ-ບ້ານຄໍາແຮງ-ນາໂດນໄດ້ເລີ່ມກໍ່ສ້າງມາແຕ່ 21  ກໍລະກົດ 2019 ມາຮອດປະຈຸບັນສໍາເລັດແລ້ວ 100%, ເສັ້ນທາງດັ່ງກ່າວເປັນເສັ້ນທາງດິນແດງທີ່ມີີຄວາມຍາວທັງໝົດ 11 ກິໂລ ແມັດ, ກວ້າງ 6 ແມັດ ແລະ ນັບແຕ່ໃຈກາງທາງອອກໄປເບື້ອງລະ 5 ແມັດລວມທັງໝົດ 10 ແມັດ, ລວມມູນຄ່າການກໍ່ສ້າງທັງໝົດ 194 ລ້ານກວ່າກີບ ໂດຍງົບປະມານດັ່ງກ່າວແມ່ນໄດ້ມາຈາກການປະກອບສ່ວນຂອງພໍ່ແມ່ປະຊາຊົນໃນກຸ່ມບ້ານທີ 2 ແລະ ກຸ່ມບ້ານທີ 5 ບ້ານ ກໍຄື 3 ບ້ານດັ່ງກ່າວຊຶ່ງເຫັນວ່າປະຊາຊົນມີຄວາມຕື່ນຕົວສູງໃນການຈັດຕັ້ງ ແລະເຂົ້າຮ່ວມໃນແຜນການພັດທະນາທີ່ຂັ້ນເທິງວາງອອກສຳລັບໜ້າວຽກຂອງໂຄງ ການກໍ່ສ້າງທາງດິນແດງແຕ່ບ້ານສົມສະອາດ-ບ້ານຄຳ ແຮງ-ນາໂດນ ແມ່ນອະນາໄມສອງຂ້າງທາງເບື້ອງລະ 5 ແມັດ, ປັບໜ້າທາງລະອຽດກວ້າງ 6 ແມັດ, ຈົກດິນວາງທໍ່ຂ້າມທາງ 17 ແຫ່ງ ແລະ ກໍ່ສ້າງທໍ່ຂ້າມທາງ 17 ແຫ່ງ ພ້ອມຖົມດິນ, ຊຶ່ງຜ່ານການກວດກາຂອງຄະນະກໍາມະການເຫັນວ່າຜູ້ຮັບເໝົາກໍ່ສ້າງແມ່ນໄດ້ປະຕິບັດໜ້າວຽກສໍາເລັດຕາມໜ້າວຽກທີ່ໄດ້ກໍານົດໄວ້.

 ໂອກາດນີ້, ທ່ານ ຄໍາວິໃສ ຜຸຍຍະວົງກໍໄດ້ມີຄໍາຫັນກ່າວວ່າ: ການເປີດນໍາໃຊ້ເສັ້ນທາງຢ່າງເປັນທາງການນີ້ແມ່ນມີຄວາມສໍາຄັນຫຼາຍເພາະເປັນເສັ້ນທາງເຊື່ອມຈອດກັນລະຫວ່າງບ້ານຕໍ່ບ້ານເພື່ອອໍານວຍຄວາມສະດວກໃນການໄປ-ມາຫາສູ່ ແລະ ຂົນສົ່ງແລກປ່ຽນສິນຄ້າຂອງປະຊາຊົນ, ຊຸກຍູ້ການຜະລິດ, ການຄ້າ, ການລົງທຶນ ແລະ ການທ່ອງທ່ຽວຂອງ ເມືອງໄຊພູທອງ ໂດຍສະເພາະກໍ່ແມ່ນປະຊາຊົນບັນດາເຜົ່າທີ່ດໍາລົງຊີວິດຢູ່ຕາມແລວທາງດັ່ງກ່າວພ້ອມນັ້ນທ່ານເຈົ້າເມືອງຍັງໄດ້ມອບເສັ້ນທາງດັ່ງກ່າວໃຫ້ອໍານາດການປົກຄອງບ້ານເປັນຜູ້ຄຸ້ມຄອງປົກປັກຮັກສາຕໍ່ໄປ.

__________

ຂຽນໂດຍ: ພຸດທະສອນ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์