ຫາລືແຜນດຳເນີນງານແຫ່ງຊາດເພື່ອຕ້ານ ແລະສະກັດກັ້ນຄວາມຮຸນແຮງຕໍ່ແມ່ຍິງ

 ຄະນະກຳມາທິການແຫ່ງຊາດເພື່ອຄວາມກ້າວໜ້າຂອງແມ່ຍິງ ແລະແມ່-ເດັກ (ຄຊກມດ) ຮ່ວມກັບອົງການ UNFPA ປະຈຳ ສປປ ລາວ ຈັດກອງປະຊຸມປຶກສາຫາລືຮ່າງແຜນດຳເນີນງານແຫ່ງຊາດເພື່ອຕ້ານ ແລະ ສະກັດກັ້ນການໃຊ້ຄວາມຮຸນແຮງຕໍ່ແມ່ຍິງ 5 ປີ ຄັ້ງທີ II (2021-2025) ຂຶ້ນໃນລະຫວ່າງທີ 18-19 ທັນວາຜ່ານມາໂດຍການເປັນປະທານຂອງ ທ່ານ ນາງ ບັນດິດ ປະທຸມວັນ ຮອງປະທານຄະນະກຳມາທິການແຫ່ງຊາດເພື່ອຄວາມກ້າວໜ້າຂອງແມ່ຍິງ ແລະ ແມ່-ເດັກ, ທ່ານ Victor Valdivieso ຮອງຜູ້ຕາງໜ້າອົງການ UNFPA ປະຈຳ ສປປ ລາວ, ມີບັນດາຫົວໜ້າກົມ, ຮອງຫົວໜ້າກົມ, ຫົວໜ້າພະແນກ, ຮອງຫົວໜ້າພະແນກການແຂວງ, ຫົວໜ້າພະແນກຄວາມກ້າວໜ້າຂອງແມ່ຍິງ ແລະແມ່-ເດັກ ບັນດາກະຊວງ, ອົງການ ແລະແຂວງເຂົ້າຮ່ວມ.

   ດັ່ງທີ່ພວກເຮົາຮັບຮູ້ນຳກັນແລ້ວວ່າ, ແຜນດຳເນີນງານແຫ່ງຊາດກ່ຽວກັບການປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງ ແລະ ຄວາມຮຸນແຮງຕໍ່ເດັກ 2014-2020 ເປັນແຜນທີ່ປ້ອງກັນ ແລະແກ້ໄຂຄວາມຮຸນແຮງຕໍ່ ແມ່ຍິງ-ເດັກ ເມື່ອມີຄວາມຮຸນແຮງເກີດຂຶ້ນແລ້ວໃຫ້ມີການປ້ອງກັນ ແລະຊ່ວຍເຫຼືອແມ່ຍິງ ແລະເດັກທີ່ຖືກເຄາະຮ້າຍຈາກຄວາມຮຸນແຮງໂດຍຄຳນຶງເຖິງສິດ ແລະຜົນປະໂຫຍດສູງສຸດຂອງແມ່ຍິງ-ເດັກໃຫ້ທົ່ວສັງຄົມຮັບຮູ້ ແລະເຂົ້າໃຈວ່າຄວາມຮຸນແຮງຕໍ່ແມ່ຍິງ ແລະ ຄວາມຮຸນແຮງຕໍ່ເດັກ, ເປັນການລ່ວງລະເມີດຕໍ່ສິດທິມະນຸດຂອງແມ່ຍິງ ແລະຂອງເດັກ, ເປັນຮູບການໜຶ່ງຂອງການຈຳແນກບົນພື້ນຖານທາງເພດ ແລະທັງເປັນປາກົດການຫຍໍ້ທໍ້ອັນຮ້າຍແຮງໃນສັງຄົມທີ່ບໍ່ອາດຍອມຮັບໄດ້.

  ການຈັດກອງປະຊຸມຄັ້ງນີ້ເພື່ອປຶກສາຫາລື, ແລກປ່ຽນບົດຮຽນ ແລະເອົາໃຈໃສ່ປະກອບຄວາມຄິດເຫັນໃສ່ຮ່າງແຜນດຳເນີນງານແຫ່ງຊາດເພື່ອຕ້ານ ແລະ ສະກັດກັ້ນການໃຊ້ຄວາມຮຸນແຮງຕໍ່ແມ່ຍິງ 5 ປີ ຄັ້ງທີ II (2021-2025)ມີເນື້ອໃນທີ່ຄົບຖ້ວນ ແລະ ເປັນເອກະພາບກັນໃນການຈັດຕັ້ງປະຕິບັດໃນຕໍ່ໜ້າໃຫ້ໄດ້ຮັບຜົນດີ. ສໍາລັບແຜນດຳເນີນງານແຫ່ງຊາດກ່ຽວກັບການປ້ອງກັນ ແລະລຶບລ້າງການໃຊ້ຄວາມຮຸນແຮງຕໍ່ແມ່ຍິງ ແລະ ການໃຊ້ຄວາມຮຸນແຮງຕໍ່ເດັກໄດ້ຖືກຮັບຮອງເອົາໃນປີ 2014 ຊຶ່ງແຜນດຳເນີນງານດັ່ງກ່າວປະກອບມີ 3 ແຜນງານຕົ້ນຕໍ: ທົບທວນນະໂຍບາຍ ແລະ ນິຕິກຳ, ສ້າງຖານຂໍ້ມູນສະຖິຕິ ແລະ ສຶກສາຄົ້ນຄວ້າ, ສ້າງຄວາມເຂັ້ມແຂງ, ປ້ອງກັນບໍ່ໃຫ້ເກີດຄວາມຮຸນແຮງຕໍ່ແມ່ຍິງ ແລະແກ້ໄຂຄວາມຮຸນແຮງຕໍ່ແມ່ຍິງ, ແຜນດຳເນີນງານແຫ່ງຊາດນີ້ໄດ້ຖືກຮັບຮອງເອົາ ແລະຈັດຕັ້ງປະຕິບັດໂດຍຂະແໜງການຕ່າງໆເຊັ່ນ: ພາກລັດ, ພາກເອກະຊົນ, ຄູ່ຮ່ວມພັດທະນາ ແລະພາກສ່ວນທີ່ກ່ຽວຂ້ອງ.

__________

ຂຽນໂດຍ: ວົງມະນີ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์