ຄະນະສະຖາປັດຕະຍະກຳສາດ ນຳສະເໜີປະຕິທິນກົດໝາຍ

  ວັນທີ 18 ທັນວາ ຜ່ານມາ, ທີ່ຄະນະສະຖາປັດຕະຍະກຳສາດ-ມະຫາວິທະຍາໄລແຫ່ງຊາດມີງານນຳສະເໜີປະຕິທິນກົດໝາຍປະຈໍາ ປີ 2020 ເປັນກຽດເຂົ້າຮ່ວມໂດຍ ທ່ານ ຕຸ້ຍ ທໍາມະວົງສາ ຮອງຫົວໜ້າກົມທີ່ດິນ, ທ່ານ ຮຸ່ງເພັດ ຈັນທະວົງ ຮອງອະທິການບໍດີມະຫາວິທະຍາໄລແຫ່ງຊາດ, ມີຄະນະບໍດີພ້ອມດ້ວຍພະນັກງານຄູ-ອາຈານ ແລະນັກສຶກສາເຂົ້າຮ່ວມ.

 ທ່ານ ຮຸ່ງເພັດ ຈັນທະວົງ ກ່າວວ່າ:ການຜະລິດປະຕິທິນເປັນການໂຄສະນາເຜີຍແຜ່ບັນດາລະບຽບກົດໝາຍອອກໄປສູ່ສັງຄົມໃຫ້ກວ້າງຂວາງເປັນຕົ້ນແມ່ນສ້າງວິທີການປູກຈິດສຳນຶກຜ່ານສື່ທາງດ້ານພາບແຕ້ມກ່ຽວກັບການຄຸ້ມຄອງນຳໃຊ້ທີ່ດິນຊັບພະຍາກອນທຳມະຊາດ ແລະສິ່ງແວດລ້ອມໃຫ້ກຸ່ມປະຊາຊົນທີ່ບໍ່ສາມາດເຂົ້າເຖິງບາງຂໍ້ມູນດ້ານລະບຽບກົດໝາຍເປັນຕົ້ນແມ່ນພໍ່ແມ່ປະຊາຊົນດຳລົງຊີວິດຢູ່ເຂດຫ່າງໄກສອກຫຼີກ,ເດັກນ້ອຍໃນລະດັບໂຮງຮຽນອະນຸບານປະຖົມ,ມັດຖະຍົມສຶກສາ ແລະລວມທັງມະຫາວິທະຍາໄລການສຶກສາໃນທົ່ວປະເທດ ແລະ ການສ້າງປະຕິທິນເພື່ອເຜີຍແຜ່ຂໍ້ມູນພື້ນຖານທາງດ້ານກົດໝາຍໂດຍອີງໃສ່ນິຕິກຳຕ່າງໆ ສົ່ງເສີມໃຫ້ປະຊາຊົນ ແລະທຸກພາກສ່ວນໄດ້ມີສ່ວນຮ່ວມໃນການພັດທະນາແບບຍືນຍົງ, ປະກອບສ່ວນໂຄສະນາເຜີຍແຜ່ບັນດາລະບຽບການ, ຂໍ້ກຳນົດ ແລະ ກົດໝາຍທີ່ພັກ-ລັດວາງອອກໃຫ້ປະ ຊາຊົນຮັບຮູ້,ເຂົ້າໃຈ ແລະພ້ອມກັນຈັດຕັ້ງປະຕິບັດຢ່າງຕັ້ງໜ້າ,ສ້າງຄວາມຮູ້ ແລະຄວາມເຂົ້າໃຈແຈ້ງໃຫ້ກັບຊຸມຊົນ ທ້ອງຖິ່ນກ່ຽວກັບສິດ ແລະພັນທະຂອງຕົນທີ່ລະບຽບກົດໝາຍກຳນົດໄວ້ຊຶ່ງພົວພັນກັບທີ່ດິນ ແລະຊັບພະຍາກອນທໍາມະຊາດທີ່ຕົນຄອບຄອງ ແລະນໍາໃຊ້ຢູ່, ຊ່ວຍຫຼຸດຜ່ອນການເຂົ້າໃຈຜິດ ຫຼື ຂໍ້ຂັດແຍ່ງຊຶ່ງອາດເກີດຂຶ້ນລະ ຫວ່າງນັກລົງທຶນ ແລະຊຸມຊົນທ້ອງຖິ່ນຜູ້ທີ່ໄດ້ຮັບຜົນກະທົບຈາກໂຄງການພັດທະນາຕ່າງໆ.

  ສໍາລັບໃນປະຕິທິນ 2020 ປະກອບດ້ວຍຮູບພາບ ແລະເນື້ອໃນສື່ໃຫ້ເຫັນເຖິງການພົວພັນວຽກງານດ້ານທີ່ດິນ ແລະຊັບພະຍາກອນທໍາມະຊາດຊຶ່ງຫົວຂໍ້ຫຼັກຂອງແຕ່ ລະໜ້າມີເນື້ອໃນທີ່ສາມາດນໍາໃຊ້ໄດ້ທາງດ້ານກົດໝາຍ ແລະເຂົ້າໃຈງ່າຍເໝາະສົມກັບປະຊາຊົນໃນແຕ່ລະທ້ອງຖິ່ນທົ່ວປະເທດ, ຊຶ່ງໄດ້ຈັດພິມຄັ້ງນີ້ຈຳນວນ 5.000 ກວ່າສະບັບເພື່ອແຈກຢາຍໃຫ້ພາກລັດ ແລະອົງການຈັດຕັ້ງທາງສັງຄົມ.

_________

ຂຽນໂດຍ: ວົງມະນີ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์