ເຜີຍແຜ່ການເລີ່ມຕົ້ນທຸລະກິດ ແລະຂຶ້ນທະບຽນວິສາຫະກິດ

ວັນທີ 30 ມັງກອນ 2019 ທີ່ນະຄອນຫຼວງວຽງຈັນ ພະແນກອຸດສາຫະກໍາ ແລະການຄ້າ (ອຄ) ໄດ້ຈັດກອງປະຊຸມເຜີຍແຜ່ແນະນໍາຂໍ້ຕົກລົງເລກທີ 0023/ອຄ. ກທຄວ, ລົງວັນທີ 9 ມັງກອນ 2019  ວ່າດ້ວຍການຂຶ້ນທະບຽນວິສາຫະກິດຢູ່ທົ່ວນະຄອນຫຼວງວຽງຈັນ ໂດຍການເຂົ້າຮ່ວມຂອງທ່ານ ແກ້ວພິລາວັນ ອາໄພລາດ ຮອງເຈົ້າຄອງນະຄອນຫຼວງວຽງຈັນ, ທ່ານ ພັນທອງ ພິດທຸມມາ ຮອງລັດຖະມົນຕີກະຊວງອຸດສາຫະກຳ ແລະການຄ້າ, ມີທ່ານເຈົ້າເມືອງ, ຮອງເຈົ້າເມືອງ, ຫົວໜ້າພະແນກ, ຮອງຫົວໜ້າພະແນກການອ້ອມຂ້າງນະຄອນຫຼວງວຽງຈັນ, ຫ້ອງການອຸດສາຫະກໍາ ແລະການຄ້າ 9 ເມືອງ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

  ທ່ານ ແກ້ວພິລາວັນ ອາໄພລາດ ກ່າວວ່າ: ການເຜີຍແຜ່ຄັ້ງນີ້ກໍເພື່ອເປັນການສ້າງບັນຍາກາດການດໍາເນີນທຸລະກິດໃຫ້ມີຄວາມສະດວກ ແລະ ເອື້ອຍອໍາ ນວຍແກ່ການຜະລິດ-ທຸລະກິດນັ້ນເປັນບັນຫາທີ່ພັກ ແລະລັດໃຫ້ຄວາມສໍາຄັນເປັນຢ່າງຍິ່ງ. ທັງນີ້ກໍ່ເພາະວ່າບັນຍາກາດການດໍາເນີນທຸລະກິດທີ່ດີເປັນປັດໃຈພື້ນຖານໃນການສ້າງປະຊາກອນທຸລະກິດໃຫ້ເຕີບໂຕເຂັ້ມແຂງ, ດຶງດູດການລົງທຶນເຂົ້າໃນການພັດທະນາເສດຖະກິດຂອງປະເທດໃຫ້ມີຄວາມເຂັ້ມແຂງ ແລະ ຍືນຍົງ. ດ້ວຍຄວາມມຸ້ງໝັ້ນໃນການສ້າງບາດກ້າວບຸກທະລຸ, ທັບມ້າງສິ່ງອັດຕັນ, ຂັ້ນຂອດທີ່ເປັນອຸປະສັກກີດຂວາງ, ກົດໜ່ວງສ້າງຄວາມລໍາຄານແກ່ການປະກອບອາຊີບຂອງປະຊາຊົນບັນດາເຜົ່າ, ແນໃສ່ພັດທະນາເສດຖະກິດໃຫ້ມີບາດກ້າວໃໝ່ທີ່ເປັນຮູບປະທໍາຢ່າງແທ້ຈິງ. ສະນັ້ນ,ລັດຖະບານເຮົາຈິງໄດ້ອອກຄໍາສັ່ງ,ສະບັບເລກ ທີ 02/ນຍ, ລົງວັນທີ 1 ກຸມພາ 2018 ເພື່ອປັບປຸງບັນດາລະບຽບການ ແລະກົນໄກປະສານງານໃນການດໍາເນີນທຸລະກິດຢູ່ ສປປ ລາວ ຊຶ່ງປະກອບໄປດ້ວຍ 10 ຕົວຊີ້ວັດ (ຕາມມາດຖານຂອງສາກົນ) ໃຫ້ດີຂຶ້ນ.

  ໜຶ່ງໃນ 10 ຕົວຊີ້ວັດທີ່ລະບຸໃນຄໍາສັ່ງຂອງທ່ານນາຍົກລັດຖະມົນຕີມີຕົວຊີ້ວັດກ່ຽວກັບການເລີ່ມຕົ້ນທຸລະກິດຊຶ່ງການຂຶ້ນທະບຽນວິສາຫະກິດເປັນຂອດສໍາຄັນໜຶ່ງຂອງຕົວຊີ້ວັດດ່ັງກ່າວ ແລະ ເປັນຫຼັກການພື້ນຖານຂອງມັນແມ່ນທຸກການເຄື່ອນໄຫວທຸລະກິດຢູ່ ສປປ ລາວ ຕ້ອງແຈ້ງຂຶ້ນທະບຽນວິສາຫະກິດຕາມທີ່ບົ່ງໄວ້ໃນກົດໝາຍວ່າດ້ວຍວິສາຫະກິດໃຫ້ຖືກຕ້ອງ 1. ກິດຈະການໃນບັນຊີຄວບຄຸມ ຫຼື ກິດຈະການສໍາປະທານແມ່ນໃຫ້ປະຕິບັດຕາມຂັ້ນຕອນທີ່ບົ່ງໄວ້ໃນກົດໝາຍວ່າດ້ວຍການສົ່ງເສີ່ມການລົງທຶນ ແລະ 2. ກິດຈະການທີ່ບໍ່ຢູ່ໃນບັນຊີຄວບຄຸມແມ່ນໃຫ້ປະຕິບັດຕາມຂັ້ນຕອນທີ່ບົ່ງໄວ້ໃນກົດໝາຍວ່າດ້ວຍວິສາ ຫະກິດໂດຍຂະແໜງອຸດສາຫະກິດ ແລະການຄ້າອອກທະບຽນວິສາຫະກິດໄດ້ເລີຍພາຍໃນກໍານົດເວລາ 10 ວັນລັດຖະການໂດຍພື້ນຖານແລ້ວການຈັດຕັ້ງປະຕິບັດການຂຶ້ນທະບຽນວິສາຫະກິດໃນສ່ວນທີ່ກ່ຽວກັບກິດຈະການທີ່ບໍ່ຢູ່ໃນບັນຊີຄວບຄຸມຕາມຄໍາສັ່ງ 02/ນຍ ນັ້ນແມ່ນສອດຄ່ອງກັບກົນໄກທີ່ເຄີຍປະ ຕິບັດກັບບັນດາຂະແໜງການໃນໄລຍະຜ່ານມາ.

แชร์