ຮອງລັດຖະມົນຕີ ສສກ ຊີ້ນຳວຽກງານຢູ່ສະຫວັນນະເຂດ

  ເມື່ອອາທິດຜ່ານມາທີ່ຫ້ອງປະຊຸມພະແນກສຶກສາທິການ ແລະກີລາແຂວງສະຫວັນນະເຂດ, ທ່ານນາງ ຂັນທະລີ ສິລິພົງພັນ ຮອງລັດຖະມົນຕີກະຊວງສຶກສາ ແລະກີລາໄດ້ພົບປະໂອ້ລົມພະນັກງານຫຼັກແຫຼ່ງພະແນກສຶກສາທິການ ແລະ ກີລາແຂວງ, ໂດຍການຕ້ອນຮັບຂອງທ່ານນາງ ຫຼິງທອງ ແສງຕາວັນ ຫົວໜ້າພະແນກສຶກສາທິ ການ ແລະກີລາແຂວງພ້ອມຄະນະ.

  ທ່ານນາງ ຫຼິງທອງ ແສງຕາ ວັນ ກໍ່ໄດ້ລາຍງານສະພາບການຈັດຕັ້ງປະຕິບັດການສືກສາໃນໄລຍະ 1ປີຜ່ານມາວ່າ: ການຈັດຕັ້ງວຽກງານການສຶກສາໃນສົກ 2018-2019 ການຈັດຕັ້ງປະຕິບັດຕົວຊີ້ບອກຂອງການສຶກສາໃນແຕ່ລະຊັ້ນເມື່ອທຽບໃສ່ຄາດໝາຍມະຕິຂອງກອງປະຊຸມສະພາປະຊາຊົນແຂວງໃນຈຳນວນ 15 ຄາດໝາຍທີ່ກຳນົດໄວ້ເຫັນວ່າມີ 7 ຄາດໝາຍທີ່ບັນລຸ ແລະ1ຄາດໝາຍຍ່ອຍຖ້າທຽບໃສ່ປີ 2017-2018 ມີພຽງ 4 ຄາດໝາຍທີ່ບັນລຸ, ການປະກາດຈົບຊັ້ນມັດທະຍົມຕອນຕົ້ນບຳລຸງໃນທົ່ວແຂວງໄດ້ 12 ເມືອງ,1ນະຄອນຍັງອີກ 2 ເມືອງຄື:ເມືອງພີນ ແລະເຊໂປນ;ທົ່ວແຂວງມີລັດຖະກອນສຶກສາທັງໝົດ 8.326 ຄົນ, ຍິງ 4.820 ຄົນໃນນັ້ນລັດຖະກອນຄູ 7.669 ຄົນ, ຍິງ 4.591 ຄົນ, ມີອາສາສະໝັກທັງໝົດ2.890 ຄົນ, ສະພາບການສຶກສາກ່ອນໄວຮຽນ ແລະສາມັນສຶກສາທົ່ວແຂວງມີໂຮງຮຽນຝາກເດັກ ແລະ ໂຮງຮຽນອຸບານທັງໝົດ 544 ແຫ່ງ, ທຽບໃສ່ປີຜ່ານມາເພີ່ມຂຶ້ນ 18 ແຫ່ງ, ເກືອບເທົ່າກັບ 4%, ໂຮງຮຽນປະຖົມ 1.237 ແຫ່ງ ໃນນັ້ນເອກະ ຊົນ 19 ແຫ່ງ ເພີ່ມຂຶ້ນ 2 ແຫ່ງ,ປະຖົມສົມບູນ 1.050 ແຫ່ງ ເພີ່ມຂຶ້ນ 15 ແຫ່ງ, ໂຮງຮຽນມັດທະຍົມ 134 ແຫ່ງເພີ່ມຂຶ້ນ 3 ແຫ່ງ, ໂຮງຮຽນມັດທະຍົມສົມ ບູນ 95 ແຫ່ງ ແລະ ມ ປາຍ 5 ແຫ່ງພາກເອກະຊົນ 5 ແຫ່ງ.

   ໂອກາດນີ້, ທ່ານຮອງລັດຖະມົນຕີກະຊວງສຶກສາ ແລະກີລາກໍ່ໄດ້ມີຄຳເຫັນໂອ້ລົມໂດຍໄດ້ເນັ້ນໜັກຜົນການປະຕິບັດຕົວຈິງຂອງຜູ້ບໍລິຫານການສືກສາກໍ່ຄືພະນັກງານຫຼັກແຫຼ່ງຕ້ອງໄດ້ສືບຕໍ່ຊີ້ນຳໆ ພາພ້ອມກັນທົບທວນຄືນຢູ່ໃນວຽກງານທາງດ້ານການເມືອງແນວຄິດ,ຄຸນທາດການເມືອງໜັກແໜ້ນ,ຮູ້ມິດຮູ້ສັດຕູ, ກໍາແໜ້ນແນວທາງນະໂຍບາຍຂອງພັກ, ມີຄວາມຮັບຜິດຊອບສູງຕໍ່ໜ້າທີ່, ມີຄວາມເຊື່ອໝັ້ນຕໍ່ກຳລັງແຮງ,ສະຕິປັນຍາຂອງພະນັກງານແລະມະຫາຊົນ,ແບບວິທີເຮັດວຽກໃນ 5 ຫຼັກການເຮັດວຽກຕ້ອງມີແຜນການມີຈຸດສຸມ,ສະຫຼຸບລາຍງານຂັ້ນເທິງໃຫ້ເປັນປົກກະຕິ, ໃນການເຮັດວຽກຂອງພະ ແນກສຶກສາທິການ ແລະກີລາໃນແຕ່ລະຂະແໜງການເມື່ອເຮັດວຽກດີແລ້ວຕ້ອງໄດ້ຕິດຕາມກວດກາວ່າໄດ້ເວົ້າເຖິງ 3 ເນື້ອໃນດັ່ງກ່າວຫຼື ບໍເປັນຕົ້ນການຂະຫຍາຍໂອກາດ ແລະການເທົ່າທຽມ, ຄຸນນະພາບການສອດຄ່ອງ ແລະແຜນງານບໍລິຫານຄຸ້ມຄອງ, ພ້ອມນັ້ນກໍ່ໃຫ້ເບິ່ງຄືນປາກົດການຫຍໍ້ທໍ້ໃນຂົງເຂດຂອງການສຶກສາຕື່ມອີກ.

--------------------

ພາບ ແລະຂ່າວຈາກ:ໜັງສືພິມເສດຖະກິດ-ສັງຄົມ

แชร์