ເຜີຍແຜ່ວຽກການຕະຫຼາດໃຫ້ກຸ່ມຫັດຖະກຳຍ້ອມສີທຳມະຊາດ

  ເມື່ອບໍ່ດົນມານີ້ທີ່ບ້ານໜອງປີງ ເມືອງຍົມມະລາດ ໄດ້ຈັດຝຶກອົບຮົມເຜີຍແຜ່ວຽກງານການຕະຫຼາດໃຫ້ກັບກຸ່ມຍ້ອມສີທຳມະຊາດເຂົ້າຮ່ວມໂດຍທ່ານ ວົງໄຊຊະນະ ໄຊຍະກຸມມານ ຫົວໜ້າຂະແໜງອຸດສາຫະກຳ ແລະ ຫັດຖະກຳ, ທ່ານ ສຸລິເດດ ຄູສະກຸນ ຮອງຂະແໜງສົ່ງເສີມວິສາຫະກິດຂະໜາດນ້ອຍ ແລະ ກາງ, ທ່ານ ຄຳຫວາ ແກ້ວມາລາ ຮອງຫົວໜ້າຫ້ອງການອຸດສາຫະກຳ ແລະ ການຄ້າເມືອງພ້ອມ ດ້ວຍວິຊາການ, ອາສາສະໝັກໄຈກາ ແລະ ພະນັກງານຮ້ານດັກແດ້ຕະຫຼອດຮອດປະຊາຊົນກຸ່ມຫັດຖະກຳຍ້ອມສີທຳມະຊາດບ້ານໜອງປີງ.

ເພື່ອປະຕິບັດຕາມແຜນພັດທະນາວິສາຫະກິດຂະໝາດນ້ອຍ ແລະ ກາງຂອງກະຊວງອຸດສາຫະກຳ ແລະ ການຄ້າອີງໃສ່ຕາມທິດຊີ້ນຳຂອງອຳນາດການປົກຄອງແຂວງ ຄຳມ່ວນໃນການສົ່ງເສີມວິສາຫະກິດ SME ຂອງແຂວງແມ່ນໄດ້ຊີ້ນຳພະແນກອຸດສາຫະກຳ ແລະ ການຄ້າຮ່ວມກັບອົງການໄຈກາໄດ້ຊຸກຍູ້ປະກອບການ SME ໃນວຽກງານການຕະຫຼາດຊຶ່ງໄດ້ມີການສຳຫຼວດຜູ້ປະກອບການມີຊື່ສິນຄ້າກຸ່ມຍ້ອມສີທຳມະຊາດຈາກການເອົາສິນຄ້າເຂົ້າຮ່ວມງານຕະຫຼາດວາງສະແດງ ແລະ ຂາຍສິນຄ້າຢູ່ນະຄອນຫຼວງວຽງຈັນ ແລະ ງານວາງສະແດງສິນຄ້າອື່ນຊຶ່ງໄດ້ມີການກຳນົດໜ້າວຽກສຳຄັນທີ່ເຫັນວ່າເປັນບາດກ້າວເບື້ອງຕົ້ນກ່ຽວການສົ່ງເສີມການຕະຫຼາດ ແລະ ວິທີການເພື່ອຂາຍສິນຄ້າໃຫ້ແກ້ກຸ່ມເປັນຕົ້ນແມ່ນການຕັດສິນໃຈກຳນົດ ລູກຄ້າເປົ້າໝາຍ, ກຳນົດກ່ຽວກັບ ຄວາມຕ້ອງການຂອງລູກຄ້າ, ການກວດກາສິນຄ້າ ແລະ ເຕັກນິກ, ວິທີການຕັ້ງລາຄາສິນຄ້າໃຫ້ເໝາະກັບລູກຄ້າເປົ້າໝາຍນັ້ນແມ່ນບາດກ້າວໝຶ່ງທີ່ອີງໃສ່ພາລະບົດບາດຂອງພະແນກອຸດສາຫະກຳ ແລະ ການຄ້າເປັນຕົ້ນຂະແໜງວິຊາສະເພາະຂະແໜງສົ່ງເສີມວິສາຫະກິດຂະໜາດນ້ອຍ ແລະ ກາງ ແລະ ການ ຄ້າເພື່ອສ້າງຄວາມພ້ອມໃຫ້ຜູ້ປະກອບການເຂົ້າໃຈ ແລະ ກຽມຕົວໃນການຈັດຕັ້ງປະຕິບັດວຽກງານດັ່ງກ່າວໃຫ້ໄດ້ຕາມຈຸດປະສົງເປົ້າໝາຍເຮັດໃຫ້ຜູ້ປະກອບການ SME ມີການພັດທະນາດີຂຶ້ນ.

-----------------

ໂດຍ: ຄໍາພູວາ 

• 20/12/2019