ບົວລະພາຈັດກິດຈະກຳກວດສຸຂະພາບໃຫ້ພະນັກງານ

  ໃນວັນທີ 17 ທັນວາ 2019 ທີ່ນະຄອນຫຼວງວຽງຈັນ ບໍລິສັດ ບົວລະພາ ກະສິກໍາ ແລະ ປ່າໄມ້ຈໍາກັດໄດ້ຈັດກິດຈະກໍາກວດສຸຂະພາບໃຫ້ແກ່ພະນັກງານປະຈໍາປີ 2019 ເພື່ອປະຕິບັດຕາມແຜນນະໂຍບາຍຂອງບໍລິສັດໃນການເອົາໃຈໃສ່ເບິ່ງແຍງສຸຂະພາບພະນັກງານ ແລະ ຕາມລະບຽບກົດໝາຍໃນການອອກແຮງງານຂອງປະເທດລາວ ແລະ ສາກົນໂດຍການເຂົ້າຮ່ວມຂອງທ່ານນາງ ສຸໄພວັນ ທ່ຽງຈັນໄຊ ຮອງຜູ້ອຳນວຍການບໍລິສັດ ບົວລະພາ ກະສິກຳ ແລະ ປ່າໄມ້ ຈໍາກັດ, ມີບັນດາແພດໝໍ ແລະ ພະນັກງານເຂົ້າຮ່ວມ. 

ທ່ານ ນາງ ສຸໄພວັນ ທ່ຽງຈັນໄຊ ກ່າວວ່າ: ການກວດສຸຂະພາບໃຫ້ພະນັກງານໃນທົ່ວບໍລິສັດບົວ ລະພາກະສິກໍາ ແລະ ປ່າໄມ້ຈໍາກັດແມ່ນຈັດຂຶ້ນທຸກໆປີ ສໍາລັບປີນີ້ໄດ້ໃຊ້ບໍລິການສູນກວດກາສຸຂະພາບແຮງງານພາຍໃນ ແລະ ຕ່າງປະເທດໂຮງໝໍມິດຕະພາບຊຶ່ງເປັນປີທໍາອິດທີ່ໃຊ້ບໍລິການ ແລະ ເຫັນວ່າສູນບໍລິການດັ່ງກ່າວສາມາດມາໃຫ້ບໍລິການກວດກາສຸຂະພາບພະນັກງານຢູ່ນອກສະຖານທີ່ໄດ້ຊຶ່ງການກວດສຸຂະພາບໃນຄັ້ງນີ້ກໍ່ກວດແບບປົກກະຕິທົ່ວໄປ.

ພະນັກງານບໍລິສັດບົວລະພາມີທັງໝົດ 140 ກວ່າຄົນ ຊຶ່ງການກວດສຸຂະພາບຈະແບ່ງກວດ 3 ຈຸດຄື: ຈຸດຫ້ອງການໃຫຍ່, ຈຸດໂຮງງານຢູ່ບ້ານແສນອຸດົມ ເມືອງ ໄຊທານີ ນະຄອນຫຼວງວຽງຈັນ ແລະ ຈຸດຫ້ອງການຢູ່ເມືອງຫີນເຫີບແຂວງວຽງຈັນ.

-----------------

ໜັງສືພີມເສດຖະກິດ-ສັງຄົມ

• 20/12/2019