ຄວສຜ ອັດຕະປືໄຂກອງປະຊຸມຄົບຄະນະປະຈຳປີ

  ກອງປະຊຸມຄົບຄະນະປະຈໍາປີ 2019 ຂອງຄະນະກຳມະ ການວັດທະນະທໍາ-ສັງຄົມ ແລະ ບັນດາເຜົ່າ (ຄວສຜ) ສະພາປະຊາຊົນແຂວງອັດຕະປື (ສພຂ) ໄຂຂຶ້ນໃນວັນທີ 18 ທັນວາ 2019 ທີ່ຫ້ອງປະຊຸມ ສພຂ ໂດຍການເປັນປະທານຂອງທ່ານ ນາງ ພອນ ມະນີ ຂຽນໄຊຍະວົງ ປະທານ ຄວສຜ, ຮອງປະທານ ສພຂ, ມີ ທ່ານ ສີທົນ ຊາວພູວົງ ຮອງປະທານ ຄວສຜ, ບັນດາທ່ານຄະນະກຳມະການ, ສະມາຊິກສະພາປະຊາຊົນແຂວງ (ສສຂ), ຫົວໜ້າ, ຮອງຫົວໜ້າພະແນການຂອງແຂວງ, ອົງການທຽບເທົ່າພ້ອມດ້ວຍພະນັກງານ-ວິຊາການພາຍໃນຂົງເຂດວັດທະນະທໍາ-ສັງຄົມ ແລະ ບັນດາເຜົ່າເຂົ້າຮ່ວມ.

ທ່ານ ນາງ ພອນມະນີ ຂຽນໄຊ ຍະວົງ ກ່າວໄຂກອງປະຊຸມວ່າ: ກອງປະຊຸມຄັ້ງນີ້ເປັນການສະຫຼຸບທົບທວນຄືນທຸກວຽກງານໃນການຈັດຕັ້ງປະຕິບັດພາລະບົດບາດ, ສິດ ແລະໜ້າທີ່ ຕາມມະຕິ 09/ສພຂ ວ່າດ້ວຍການຮັບຮອງເອົາບົດລາຍ ງານຂອງອົງການປົກຄອງແຂວງກ່ຽວກັບການຈັດຕັ້ງປະຕິບັດແຜນ ພັດທະນາເສດຖະກິດ-ສັງຄົມ ປະຈໍາປີ 2018 ແລະ ທິດທາງແຜນການປະຈໍາປີ 2019 ແລະ ວຽກງານຟື້ນຟູ, ຈັດສັນພູມລຳເນົາບ່ອນທໍາມາຫາກິນຂອງປະຊາຊົນທີ່ຖືກຜົນກະທົບຕາມຂອບເຂດຂະແໜງການທີ່ກ່ຽວຂ້ອງ, ໄລຍະຜ່ານມາເຫັນໄດ້ດ້ານຕັ້ງໜ້າ, ຂໍ້ຄົງຄ້າງ ແລະ ທັງເປັນການຍາດແຍ່ງຄໍາຄິດຄຳເຫັນທີ່ເປັນບົດຮຽນທີ່ດີໃນການຊອກຫາວິທີການ, ມາດຕະ ການແກ້ໄຂໃຫ້ຖືກຕ້ອງສອດຄ່ອງຕາມລະບຽບກົດໝາຍ, ພ້ອມກັນຄົ້ນຄວ້າປະກອບຄຳຄິດຄໍາເຫັນໃສ່ຮ່າງບັນດາເອກະສານເຊັ່ນ: ຮ່າງບົດສະຫຼຸບການເຄື່ອນໄຫວຂອງ ຄວສຜ 2019 ແລະ ທິດທາງແຜນການປະຈໍາປີ 2020; ຮ່າງບົດສະຫຼຸບຂອງໜ່ວຍສະມາຊິກ ສະພາເພດຍິງຂັ້ນແຂວງປະຈໍາປີ 2019 ແລະ ທິດທາງແຜນການ ປະຈໍາປີ 2020; ຮ່າງແຜນການຕິດຕາມກວດກາປະຈໍາປີ 2019 ຂອງ ຄວສຜ; ຮ່າງບົດລາຍງານຂອງພະແນກການທີ່ກ່ຽວຂ້ອງ ແລະ ຮ່າງມະຕິຂອງກອງປະຊຸມປະຈໍາ ປີ 2019 ຂອງ ຄວສຜ.

ພ້ອມກັນນັ້ນ ທ່ານ ສີທົນ ຊາວ ພູວົງ ຂຶ້ນລາຍງານບົດສະຫຼຸບການ ເຄື່ອນໄຫວວຽກງານ ຄວສຜ ປະ ຈໍາປີ 2019 ແລະທິດທາງແຜນ ການເຄື່ອໄຫວ ປະຈໍາປີ 2020 ໃຫ້ ຮູ້ວ່າ: ຕະຫຼອດໄລຍະ 1 ປີ ຄວສຜ ໃນຖານະເປັນເສນາທິການໂດຍກົງໃຫ້ແກ່ກໍາມາທິການສະພາແຫ່ງຊາດ ແລະ ຄະນະປະຈໍາ ສພຂ ເຊິ່ງ ໄດ້ເອົາໃຈໃສ່ຄົ້ນຄວ້າບັນດາເນື້ອໃນສໍາຄັນຕ່າງໆໃນຂົງເຂດຄວາມຮັບຜິດຊອບຂອງຕົນເພື່ອປະກອບຄໍາຄິດຄໍາເຫັນ ແລະ ນໍາສະເໜີຕໍ່ກອງປະຊຸມຂອງຄະນະປະຈໍາ ສພຂ, ກອງປະຊຸມສະໄໝສາມັນແຕ່ລະຄັ້ງເພື່ອຄົ້ນຄວ້າ, ພິຈາລະນາ ແລະ ຮັບຮອງເອົາບັນດາໜ້າວຽກທີ່ສໍາຄັນ, ໃນນັ້ນກໍຕິດພັນກັບວຽກງານໃນຂົງເຂດວັດທະນະທໍາ-ສັງຄົມ ແລະ ບັນດາເຜົ່າເປັນຕົ້ນ: ວຽກງານຂອງຄະນະ  ສສຂ, ວຽກງານຂອງອົງການປົກຄອງແຂວງ, ວຽກງານອົງການຕຸລາການ, ວຽກງານການແກ້ໄຂຜົນກະທົບຂອງປະຊາຊົນບັນດາເຜົ່າຈາກໄພພິບັດນໍ້າຖ້ວມເຊັ່ນ: ການຊົດເຊີຍ, ການຟື້ນຟູ, ການດຳລົງຊີວິດ ແລະ ບັນຫາການບໍລິໂພກ-ອຸປະໂພກໃຫ້ປະຊາຊົນ.

ຜ່ານມາ ຄວສຜ ໄດ້ເອົາໃຈໃສ່ເຄື່ອນໄຫວຕິດຕາມກວດກາ ແລະ ຊຸກຍູ້ພະແນກການທີ່ກ່ຽວຂ້ອງ ແລະ ບັນດາຫ້ອງການ 5 ຕົວ ເມືອງໃນການຈັດຕັ້ງປະຕິບັດລັດ ຖະທໍາມະນູນ, ກົດໝາຍ ແລະນິຕິ ກໍາລຸ່ມກົດໝາຍ ແລະນະໂຍບາຍ ອື່ນໆ ທີ່ພົວພັນກັບວຽກງານວັດທະນະທໍາ-ສັງຄົມ ແລະ ບັນດາເຜົ່າ, ຊຸກຍູ້ພາກສ່ວນທີ່ກ່ຽວຂ້ອງແກ້ໄຂ ບັນຫາທີ່ສໍາຄັນເປັນຕົ້ນ: ສະພາບ ການຈັດຕັ້ງປະຕິບັດບັນດາໜ້າວຽກຈຸດສຸມການສືກສາ, ວຽກງານນະໂຍບາຍດ້ານການສືກສາ ແລະ ຍຸດທະສາດຕ່າງໆ, ຕິດຕາມກວດກາສະພາບເຂົ້າຮຽນ, ປະລະການຮຽນຂອງນັກຮຽນ, ສົ່ງເສີມໃຫ້ນັກຮຽນທີ່ຮຽນຈົບຊັ້ນມັດທະ ຍົມຕອນຕົ້ນ, ຕົ້ນປາຍເຂົ້າຮຽນຕໍ່ວິຊາຊີບ, ຕິດຕາມການຄຸ້ມຄອງ ແລະ ນໍາໃຊ້ງົບປະມານບໍລິຫານ, ສົ່ງເສີມວິຊາການ, ກອງທືນ ແລະ ລວມທັງໂຄງການລົງທຶນທີ່ມີໃນຂົງເຂດສຶກສາ, ແຮງງານ ແລະ ຕິດຕາມສະພາປະຊາຊົນໄປອອກແຮງງານນໍາບໍລິສັດຢູ່ແຕ່ລະນິຄົມ.

------------------

ຂ່າວ: ເທວາ

 

แชร์