ເຊກອງເອາໃຈໃສ່ຄຸ່ມຄອງປ່າຜະລິດຕາມທິດສີຂຽນ ແລະ ຍືນຍົງ

    ໃນທົ່ວແຂວງເຊກອງມີເນື້ອທີ່ປ່າໄມ້ປ່າຜະລິດແຫ່ງຊາດກວມເອົາທັງໝົດ 7 ແຫ່ງ, ມີເນື້ອທີ່ 188.505 ເຮັກຕາ, ຊຶ່ງວຽກງານຄຸ້ມຄອງປ່າຜະລິດຕາມທິດສີຂຽວ ແລະ ຍືນຍົງເປັນມາດຕະການອັນສໍາຄັນອັນໜຶ່ງທີ່ນອນຢູ່ໃນ 4 ງານຄຸ້ມຄອງມາດຕະການຫຼັກສໍາລັບການຈັດຕັ້ງປະຕິບັດຍຸດທະສາດປ່າໄມ້ເຖິງປີ 2020 ໃຫ້ປະກົດຜົນເປັນຈິງ, ໂດຍສະເພາະເຮັດໃຫ້ສາມາດຮັບປະກັນຄວາມຍືນຍົງຂອງການສະໜອງໄມ້ສໍາລັບການປຸ່ງແຕ່ງ-ນໍາໃຊ້ພາຍໃນ ແລະ ສົ່ງອອກ, ວຽກງານນີ້ກວມເອົາວຽກວາງແຜນຈັດສັນປ່າໄມ້, ຄຸ້ມຄອງການຈັດຕັ້ງປະຕິບັດວາງແຜນການຈັດສັນປ່າໄມ້, ປ່າໄມ້ບ້ານ, ລວມທັງການຄຸ້ມຄອງການຂຸດຄົ້ນໄມ້, ເກັບເຄື່ອງປ່າຂອງດົງ ແລະ ວຽກງານຢັ້ງຢືນປ່າໄມ້, ການຈັດຕັ້ງປະຕິບັດວຽກງານດັ່ງກ່າວໃນໄລຍະຜ່ານມາແມ່ນມີຜົນສໍາເລັດສູງສົມຄວນ.

ຕາມບົດລາຍງານຂອງຂະແໜງປ່າໄມ້ພະແນກກະສິກໍາ ແລະ ປ່າໄມ້ແຂວງເຊກອງໃຫ້ຮູ້ວ່າ: ໄລຍະຜ່ານມາຄະນະພັກ, ຄະນະພະແນກກະສິກໍາ ແລະ ປ່າໄມ້ແຂວງ ເຊກອງໄດ້ເອົາໃຈໃສ່ຊຸກຍູ້ວຽກງານຄຸ້ມຄອງປ່າຜະລິດຕາມທິດສີຂຽວ ແລະ ຍືນຍົງໂດຍສະເພາະແມ່ນວຽກງານຄຸ້ມຄອງປ່າໄມ້ຂັ້ນບ້ານຊຶ່ງເປັນວຽກງານໜຶ່ງທີ່ມີຄວາມສໍາຄັນ ແລະ ຕິດພັນກັບວຽກງານສາມສ້າງຢູ່ທ້ອງຖິ່ນຮາກຖານ ແລະ ມີຈຸດປະສົງເພື່ອຮັບປະກັນເຮັດໃຫ້ປະຊາຊົນທ້ອງຖິ່ນມີສິດ ແລະ ຄວາມສາມາດເຂົ້າຮ່ວມໃນວຽກງານຄຸ້ມຄອງ, ປົກປັກຮັກສາ ແລະ ນໍາໃຊ້ປ່າໄມ້ຢູ່ໃນຂອບເຂດບ້ານຂອງຕົນ, ວາງແຜນຄຸ້ມຄອງປ່າໄມ້ຂັ້ນບ້ານຊຶ່ງຖືວ່າເປັນພາລະໜັກໜ່ວງສົມຄວນ, ໂດຍຕິດພັນກັບບັນດາໂຄງການຊຶ່ງໄດ້ເກັບກູ້ ແລະ ຂຸດຄົ້ນໄມ້ຕິ້ວຈໍານວນ 7.038 ແມັດກ້ອນໄມ້ຟືນ, ເຄື່ອນຍ້າຍຖ່ານຂາວອອກຕ່າງປະ ເທດຈໍານວນ 770 ໂຕນ, ເຄື່ອນຍ້າຍ ຖ່ານຂາວພາຍໃນປະເທດ 190 ໂຕນ, ເຄື່ອນຍ້າຍໝາກຈອງບານໄປຕ່າງປະເທດ 127.463 ກິ ໂລກຣາມ, ເຄື່ອນຍ້າຍດອກແຂມ ໄປຕ່າງປະເທດ 5 ພັນກິໂລກຣາມ, ເຄື່ອນຍ້າຍເຄືອແຫມ (ເປັນຝຸ່ນ) ພາຍໃນປະເທດ 211 ກິໂລ ກຣາມ, ລົງສຶກສາ ແລະ ປະເມີນຄວາມເປັນໄປໄດ້ໃນການຈັດຕັ້ງກຸ່ມຜະລິດຫັດຖະກໍາ-ເຟີນີເຈີ ຫວາຍ ແລະ ໄມ້ປ່ອງຢູ່ໃນ 4 ບ້ານ ເປົ້າໝາຍຂອງໂຄງການຫວາຍ ແລະ ໄມ້ປ່ອງ: ຄືບ້ານລະວີນ້ອຍ, ບ້ານປະອໍເມືອງລະມາມ, ບ້ານປະແຫຼງໃຕ້, ບ້ານເກາະຫົວພູເມືອງທ່າແຕງ; ໄດ້ສ້າງ ແລະ ປັບປຸງກຸ່ມປ່າໄມ້ບ້ານ ໃນ 4 ເປົ້າໝາຍ (ບ້ານຕຸ່ບດ່ານ, ວັງຊ້າງ, ນໍ້າຫຽງ ແລະ ບ້ານປະອໍເມືອງລະມາມ), ໄດ້ສໍາເລັດການສ້າງຕັ້ງກຸ່ມປ່າໄມ້ຊຸມຊົນ, ສ້າງບັນຊີລາຍຊື່, ໂຄງຮ່າງການຈັດຕັ້ງກຸ່ມປ່າໄມ້ຊຸມຊົນ ແລະ ສ້າງລະບຽບການຂອງກຸ່ມ.

ນອກຈາກນີ້ ຍັງຝຶກອົບຮົມການຄຸ້ມຄອງປ່າໄມ້ຊຸມຊົນໃຫ້ອໍານາດການປົກຄອງ ແລະ ອາສາໝັກປ່າໄມ້ບ້ານມີເປົ້າໝາຍ ແລະ ປະຊາຊົນ ໃນ 4 ບ້ານເຂົ້າຮ່ວມ 15 ຄົນ, ຊຶ່ງເປັນອໍານາດການປົກຄອງບ້ານ ແລະ ຄະນະກຸ່ມປ່າໄມ້ບ້ານທີ່ໄດ້ຮັບການຝຶກອົບຮົມເລື່ອງ ການຄຸ້ມຄອງປ່າໄມ້ບ້ານຊຸມຊົນ, ໃນນັ້ນ 30% ແມ່ນແມ່ຍິງ ແລະ ຊົນເຜົ່າ; ໄດ້ມອບທຶນພັດທະນາບ້ານໃຫ້ 4 ບ້ານເປົ້າໝາຍເພື່ອປະຕິບັດກິດຈະກໍາລ້ຽງງົວ, ລ້ຽງ ໝູ, ລ້ຽງໄກ່, ຕໍ່າຫູກ, ຈັກສານ ບ້ານລະ 13 ລ້ານກີບ; ການຄຸ້ມຄອງ ແລະຈັດສັນປ່າໄມ້ບ້ານ ຢູ່ເມືອງ ດາກຈຶງ ໄດ້ 17 ບ້ານ, ຜູ້ທີ່ມີສ່ວນຮ່ວມຈັດຕັ້ງປະຕິບັດ 1.007 ຄົວ ເຮືອນ, ເນື້ອທີ່ປູກທັງໝົດ 1.487 ເຮັກຕາ, ໃນນັ້ນ ປູກໄມ້ປ່ອງ 17 ເຮັກຕາ, ມີ 1.763 ຄົວເຮືອນ, ປູກໝາກແໜ່ງເສີມກ້ອງປ່າ 11 ເຮັກຕາ, ມີ 927 ຄົວເຮືອນ, ປູກໄມ້ໃຫ້ໝາກ ແລະ ໄມ້ອື່ນໆ 1.460 ເຮັກຕາ, ສະເລ່ຍບ້ານລະ 73 ລ້ານກວ່າກີບ; ຊຶ່ງຟື້ນຟູປ່າແມ່ນນອນໃນເຂດຟື້ນຟູຕາມແລວຈັດສັນ ແລະ ມີບາງບ້ານບໍ່ນອນໃນແລວ ຈັດສັນ; ສໍາເລັດເກັບກໍາຂໍ້ມູນເຄື່ອງປ່າຂອງດົງທີ່ນອນໃນເຂດຄຸ້ມຄອງຂອງແຕ່ລະບ້ານ, ເກັບກໍາຂໍ້ມູນຊະນິດພັນສັດປ່າທີ່ໃກ້ຈະສູນພັນທີ່ນອນໃນເຂດຄຸ້ມຄອງຂອງບ້ານ ແລະ ເຊັນບົດບັນທຶກຮ່ວມກັບບ້ານ ໃນ 79 ບ້ານເປົ້າໝາຍ.  

-----------------

ຂ່າວ: ພຸດທະສອນ

    

แชร์