2020ໂຄງການລ້ຽງສັດເພື່ອຜະລິດເປັນສີນຄ້າພາກເໜືຈະໃຫ້ໄດ້ 300 ກຸ່ມ

  ກອງປະຊຸມຊີ້ນຳໂຄງການລ້ຽງສັດເພື່ອຜະລິດເປັນສິນຄ້າຢູ່ເຂດພາກເໜືອໄດ້ຈັດຂຶ້ນໃນລະຫວ່າງວັນທີ 16-17 ຢູ່ຫໍວັດທະນະທຳແຂວງຫົວພັນໂດຍການ ເປັນປະທານຂອງທ່ານພວງປາຣິສັກປຣະວົງວຽງຄໍາຮອງລັດຖະມົນຕີກະຊວງກະສິກຳ ແລະ ປ່າໄມ້, ທັງເປັນປະທານຊີ້ນໍາໂຄງການ ລ້ຽງສັດເພື່ອຜະລິດເປັນສິນຄ້າພາກເໜືອຂອງລາວ, ມີພາກສ່ວນທີ່ກ່ຽວຂ້ອງຂັ້ນສູນກາງ, ຂັ້ນແຂວງ, ພະນັກງານວິຊາການພະແນກກະສິກຳ ແລະ ປ່າໄມ້ 4 ແຂວງເປົ້າໝາຍເຂົ້າຮ່ວມນໍາ.

ໂຄງການລ້ຽງສັດເພື່ອຜະລິດເປັນສິນຄ້າຢູ່ເຂດພາກເໜືອຂອງ ສປປ ລາວ ແມ່ນໂຄງການສົ່ງເສີ່ມໃຫ້ຊາວກະສິກອນກໍຄືປະຊາຊົນຫັນມາປູກ, ລ້ຽງ ແລະ ຜະ ລິດໃຫ້ກາຍເປັນສິນຄ້າເພື່ອພັດທະນາຊີວິດການເປັນຢູ່ໃຫ້ດີຂຶ້ນເຊິ່ງປະກອບມີ 4 ແຂວງເປົ້າໝາຍຄື: ຫົວພັນ, ຫຼວງພະບາງ, ຊຽງຂວາງ ແລະ ແຂວງຫຼວງນໍ້າທາ, ໂດຍໄດ້ເລີ່ມຈັດຕັ້ງປະຕິບັດແຕ່ປີ 2015 ເປັນຕົ້ນມາ, ໃນປີ2019 ໂຄງການໄດ້ກຳນົດເອົາ 59 ກິດຈະກຳຫຼັກ ໃນ 14 ໜ້າວຽກຕົ້ນຕໍທີ່ນອນຢູ່ໃນ 3 ອົງປະກອບຫຼັກຄື:  ການຈັດຕັ້ງ ແລະ ພັດທະນາກຸ່ມລ້ຽງສັດເພື່ອຜະລິດເປັນສິນຄ້າ, ສະໜັບສະໜູນການວາງແຜນນໍາໃຊ້ທີ່ດິນ ແລະ ບໍລິການດ້ານເຕັກນິກການລ້ຽງສັດ, ໂດຍແມ່ນທຶນສະໜັບສະໜູນຈາກທະນາຄານພັດທະນາອາຊີ ແລະ ທຶນຈາກກອງທຶນສາກົນເພື່ອພັດທະນາກະສິກຳຈຳນວນ 7,1 ລ້ານກວ່າໂດລາສະຫະລັດ.

ໃນ 4 ແຂວງໄດ້ສ້າງຕັ້ງກຸ່ມລ້ຽງສັດເພື່ອຜະລິດເປັນສິນຄ້າທັງໝົດ 304 ກຸ່ມ, ມີ 210 ບ້ານ ມີສະມາຊິກທັງໝົດ  4 ພັນກວ່າ ຄອບຄົວໃນນີ້, ແຂວງຫົວພັນໄດ້ ຈັດຕັ້ງປະຕິບັດຢູ່ 3 ເມືອງເປົ້າໝາຍຄື: ເມືອງວຽງໄຊ, ເມືອງແອດ ແລະ ເມືອງຊຽງຄໍ້ລວມມີ 52 ບ້ານ, 70 ກຸ່ມ, 913 ຄອບຄົວ, ນໍາໃຊ້ທຶນ 3 ແສນກວ່າໂດລາສະຫະລັດ;   ກິດຈະກຳຫຼັກຂອງໂຄງການແມ່ນສ້າງກຸ່ມລ້ຽງສັດນ້ອຍ, ສັດໃຫ່ຍ, ການວາງແຜນນໍາໃຊ້ທີ່ດິນເພື່ອລ້ຽງສັດ, ຝຶກອົບຮົມດ້ານເຕັກນິກ ແລະ ສາທິດ, ສົ່ງເສີມການເຂົ້າຮ່ວມຂອງຜູ້ທຸກຍາກ ແລະ ບົດບາດຍິງຊາຍ, ການສະໜອງອຸປະກອນຮັບໃຊ້ການຜະລິດໃຫ້ແກ່ກຸ່ມລ້ຽງສັດເປັນສິນຄ້າ, ການຍົກລະດັບຄວາມອາດສາມາດໃນການເຂົ້າເຖິງສິນເຊື່ອເພື່ອສະໜອງທຶນໃຫ້ແກ່ກຸ່ມລ້ຽງສັດ, ສັກຢາປ້ອງກັນພະຍາດປາກເປື່ອຍລົງເລັບງົວ, ຄວາຍໄດ້ 4.193 ໂຕ, ອະຫິວາໝູໄດ້ 323 ໂຕ, ລົງຕິດ ຕາມກິດຈະກຳທອມງົວໄດ້ 28 ຄອບຄົວ, ກິດຈະກຳປູກຫຍ້າໄດ້ 586 ຄອບຄົວ ມີເນື້ອທີ່ 282 ເຮັກຕາກວ່າ, ໃນນີ້ຫຍ້າຣູຊີ 243  ເຮັກຕາກວ່າ, ຫຍ້າກີນີ 20 ເຮັກ ຕາກວ່າ, ຫຍ້າເນເປຍ 9 ເຮັກຕາ ແລະຫຍ້າສະໄຕໂລ 8 ເຮັກຕາກວ່ານອກຈາກນີ້, ຍັງໄດ້ອຳນວຍຄວາມສະດວກດ້ານສິນເຊື່ອ, ສ້າງຕັ້ງກຸ່ມຄອບຄົວທຸກຍາກ ແລະ ຜູ້ທີ່ບໍ່ແມ່ນສະມາຊິກໄດ້ເຮັດກິດຈະກຳລ້ຽງເປັດ, ລ້ຽງໄກ່ ແລະ ລ້ຽງປາ ຕື່ມອີກ.

ປີ 2020 ໂຄງການລ້ຽງສັດເພື່ອຜະລິດເປັນສິນຄ້າຢູ່ເຂດພາກເໜືອຂອງລາວຈະເອົາໃຈໃສ່ສ້າງຄວາມເຂັ້ມແຂງໃຫ້ແກ່ຊາວກະສິກອນຜູ້ລ້ຽງສັດໃຫ້ເພີ່ມຂຶ້ນ, ເປັນ ຕົ້ນແມ່ນຈະສ້າງຕັ້ງ ແລະພັດທະ ນາກຸ່ມລ້ຽງສັດເປັນສິນຄ້າໃຫ້ໄດ້ 300 ກຸ່ມ, ປັບປຸງຕະຫຼາດຂາຍຊີ້ນ ສົດຂັ້ນແຂວງໃຫ້ໄດ້ 2 ແຫ່ງ, ຂັ້ນເມືອງໃຫ້ໄດ້ 12 ແຫ່ງ, ອອກແບບກໍ່ສ້າງ,  ສະໜອງອຸປະກອນໃຫ້ໂຮງຂ້າສັດ 2 ແຫ່ງ ແລະ ເອົາໃຈໃສ່ຈັດຕັ້ງປະຕິບັດວຽກງານຕ່າງໆຂອງໂຄງການໃຫ້ມີຄວາມສໍາເລັດ.

------------------

ຂ່າວ: ນິດຖະໜອມ

แชร์