ຊຽງຂວາງ ພ້ອມເປັນເຈົ້າພາບທີ່ດີ ຫວັງເປັນເຈົ້າຫຼຽນຄຳ

  ແຂວງຊຽງຂວາງ ພ້ອມ ເປັນເຈົ້າພາບທີ່ດີ ແລະກຽມນັກກີ ລາລູກຫຼານພໍ່ແມ່ປະຊາຊົນດິນ ແດນທົ່ງໄຫຫີນ ຈຳນວນ 705 ຄົນ, ຍິງ 274 ຄົນ ຈາກ 28 ປະເພດກີລາ ແລະຕັ້ງຄວາມຫວັງຈະພະຍາຍາມສູ້ຊົນສ້າງຜົນງານຍາດໃຫ້ໄດ້ 35 ຫຼຽນຄຳ ຕິດອັນດັບ 1 ໃນ 5 ຂອງຕາຕະລາງສະຫຼຸບ ຫຼຽນຄຳງານມະຫະກໍາກີລາແຫ່ງຊາດ ຄັ້ງທີ Xl ຫຼື ຊຽງຂວາງ ເກມ ລະຫວ່າງວັນທີ 22 ມີນາຫາ 1 ເມສາ 2020.

ທ່ານ ທອງຜິວ ສີປັນຍາ ຮອງ ຫົວໜ້າພະແນກສຶກສາທິການ ແລະ ກີລາແຂວງຊຽງຂວາງ ໃຫ້ຮູ້ເມື່ອ ບໍ່ດົນມານີ້ວ່າ: ສໍາລັບການກະກຽມຄວາມພ້ອມຈັດງານກີລາແຫ່ງຊາດ ຄັ້ງທີ Xl ທີ່ຈະເປີດສາກ ຂຶ້ນໃນເດືອນມີນາ 2020, ມາ ຮອດປະຈຸບັນຊາວແຂວງຊຽງ ຂວາງ ກໍາລັງຂຸ້ນຂ້ຽວໃນການກະກຽມຄວາມພ້ອມຮອບດ້ານ ໂດຍ ສະເພາະທາງດ້ານພື້ນຖານໂຄງລ່າງມີຄວາມພ້ອມແລ້ວ 90% ເປັນຕົ້ນແມ່ນບັນດາສະໜາມຕ່າງໆ ທີ່ກຽມຮອງຮັບງານດັ່ງກ່າວແມ່ນສໍາເລັດເປັນສ່ວນໃຫຍ່,ສ່ວນສະໜາມເປີດ-ປິດແມ່ນຍັງເຫຼືອແຕ່ ການປູກຫຍ້າເລັກໜ້ອຍ ແລະບົວລະບັດເພີ່ມຕື່ມເທົ່ານັ້ນສ່ວນທີ່ພັກກໍໄດ້ກະກຽມບັນດາໂຮງແຮມ, ບ້ານພັກ ແລະບ່ອນພັກຂອງຄູຝຶກ ນັກກີລາກໍມີຄວາມພ້ອມ 100%, ຂະນະທີ່ນັກກີລາຂອງແຂວງພວກເຮົາກໍກຽມເຂົ້ານອນສູນໃນໄວໆນີ້.

ແນວໃດກໍດີຊຽງຂວາງ ເກມ 2020 ໃນນາມເຈົ້າພາບຈະສົ່ງ ນັກກີລາເຂົ້າຮ່ວມປະມານ 705 ຄົນ (ຍິງ 274 ຄົນ) ຈາກ 28 ປະເພດພ້ອມຕັ້ງເປົ້າຈະພະຍາຍາມສູ້ຊົນສ້າງຜົນງານໃຫ້ໄດ້ 35 ຫຼຽນຄໍາຂຶ້ນໄປ ແລະຕິດອັນດັບ1ໃນ 5 ຂອງຕາຕະລາງສະຫຼຸບຫຼຽນ ໃນງານດັ່ງກ່າວ,ແນວໃດກໍຕາມ,ສໍາລັບກີລາປາຍແຫຼມ ຫຼື ກີລາ ຄວາມຫວັງຂອງແຂວງຊຽງຂວາງ ສ່ວນໃຫຍ່ເປັນກີລາພື້ນເມືອງເຊັ່ນ: ຍິງໜ້າ, ໝາກຂ່າງ ແລະຍິງທະນູ ເປັນຕົ້ນຕໍ.

ທ່ານ ທອງຜິວ ສີປັນຍາ ກ່າວ ຕື່ມວ່າ: ງານມະຫະກໍາກີລາແຫ່ງ ຊາດ ຄັ້ງນີ້ເປັນຄັ້ງປະຫວັດສາດ ຂອງແຂວງຊຽງຂວາງ ສະນັ້ນຖືໂອກາດນີ້ພວກເຮົາຈະເຮັດໃຫ້ດີ ທີ່ສຸດ ແລະເຜີຍແຜ່ໂຄສະນາໃຫ້ບັນດາສັງຄົມລາວ ແລະສັງຄົມໃນ ໂລກໄດ້ຮັບຮູ້ແຂວງພວກເຮົາຢ່າງ ໜ້າພາກພູມໃຈ, ໃນນັ້ນກໍມີບັນດາ ແຫຼ່ງທ່ອງທ່ຽວຕ່າງໆ ພ້ອມທັງຈະເປີດ 3 ງານໃຫຍ່ໆຄື:ຮອງຮັບທົ່ງໄຫຫີນເປັນມໍລະດົກໂລກ,ການສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ແລະງານມະຫາກໍາກີລາແຫ່ງຊາດຄາດວ່າ 3 ງານດັ່ງກ່າວຈະສາມາດດຶງດູດນັກທ່ອງທ່ຽວ ແລະແຂກທັງພາຍໃນ ແລະຕ່າງປະເທດມາທ່ຽວຊົມແຂວງຊຽງຂວາງ ຢ່າງ ຫຼວງຫຼາຍ.

ສໍາລັບແຂວງຊຽງຂວາງ ກໍານົດຈັດການແຂ່ງຂັນໃນງານມະຫະກໍາກິລາແຫ່ງຊາດ ຄັ້ງທີ 11 ລະຫວ່າງ 22 ມີນາ ຫາ 1 ເມສາ 2020 ຊຶ່ງຈະມີການຊີງໄຊ 28 ປະເພດປະກອບມີບານເຕະ, ແລ່ນ-ລານ, ບານບ້ວງ, ເທັນນິສ, ດອກ ປີກໄກ່, ກະຕໍ້, ປິ່ງປ່ອງ, ເທຄວັນ ໂດ, ມວຍປໍ້າ, ຢູໂດ, ປັນຈັກສີ ລັດ, ວູຊູ, ໝາກແລ້, ໝາກເສິກ, ເຮືອຊ່ວງ, ໝາກຂ່າງ, ໜ້າເກັກ, ຍິງທະນູ, ລົດຖີບ, ລອຍນໍ້າ, ບານ ສົ່ງໃນຮົ່ມ, ເປຕັງ, ໂບລິ້ງ, ກ໊ອຟ, ຍິີງປືນ, ມວຍລາວ, ມວຍສາກົນ ແລະສະນຸກເກີ.

----------------

ພາບ: ຂ່າວ  ໂດຍ: ບຸນນິກ

 

แชร์