ສະຫຼຸບວຽກຄວບຄຸມ ແລະຈຳກັດໄຂ້ມາລາເຣຍ

 ເພື່ອສ້າງຄວາມເຂົ້າໃຈໃຫ້ແກ່ຄະນະນຳພາຂັ້ນແຂວງ, ທີມງານວິຊາການ ແລະເພື່ອນຮ່ວມງານທຸກລະດັບກ່ຽວກັບຍຸດທະສາດໃນ 5 ປີ ຂ້າງໜ້າທີ່ທຸກຄົນຕ້ອງປະສານໃຈໃຫ້ເປັນອັນດຽວຮ່ວມມືກັນດຳເນີນຢ່າງມີແບບແຜນ ແລະຕັ້ງໜ້າໂດຍເອົາວຽກງານຄວບຄຸມ ແລະ ກຳຈັດພະຍາດດັ່ງກ່າວເປັນໜຶ່ງໃນກິດຈະກຳບູລິມະສິດກວມທຸກຂົງເຂດຂອງແຜນງານ, ໃນລະຫວ່າງວັນທີ 16-20 ທັນວາ 2019 ທີ່ເມືອງວັງວຽງ ແຂວງວຽງຈັນ ສູນໄຂ້ຍຸງແມ່ກາຝາກ ແລະ ແມງໄມ້ໄດ້ຈັດກອງປະຊຸມສະຫຼຸບວຽກງານຄວບຄຸມ ແລະກໍາຈັດພະຍາດໄຂ້ມາລາເຣຍ 2019 ແລະແຜນ 2020 ການຈັດຕັ້ງປະຕິບັດເພື່ອຄວບຄຸມ ແລະກໍາຈັດພະຍາດໄຂ້ມາລາເຣຍໂດຍການເປັນປະ ທານຂອງ ທ່ານ ຮສ ດຣ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ, ມີຫົວໜ້າ, ຄະນະກົມ, ຫົວໜ້າ, ຄະນະພະແນກສາ ທາລະນະສຸກແຂວງ, ເພື່ອນຮ່ວມງານສາກົນ, ຄູ່ຮ່ວມພັດທະນາພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

  ພະຍາດໄຂ້ມາລາເຣຍ ແມ່ນເປັນບັນຫາສາທາລະນະສຸກມາແຕ່ດົນນານແລ້ວຢູ່ໃນ ສປປ ລາວ ກໍ່ຄ້າຍຄືກັນກັບບັນດາປະເທດລຸ່ມແມ່ນໍ້າຂອງໃນປະຈຸບັນຍັງພົບພໍ້ຫຼາຍກໍລະນີຢູ່ບາງເຂດພາກໃຕ້ຂອງລາວສະນັ້ນຕ້ອງໄດ້ເອົາໃຈໃສ່ຢ່າງຈິງຈັງໃນການຄວບຄຸມເພື່ອຫຼຸດຜ່ອນການສົ່ງເຊື້ອໃຫ້ຕໍ່າລົງ ແລະ ໃນຫຼາຍເຂດຕ້ອງໄດ້ກຳຈັດໃຫ້ໝົດສິ້ນໄປເປັນ ແຕ່ລະໄລຍະ ໂດຍສະເພາະໃນບັນດາ ແຂວງເໜືອຊຶ່ງມາຮອດປະຈຸບັນໃນທົ່ວປະເທດພົບເຊື້ອທັງໝົດ 8,084 ກໍລະນີ, ເສຍຊີວິດ 06 ໃນປີ 2018; ພົບ 5,600 ກໍລະນີ, ເສຍຊີວິດ 00 ໃນປີ 2019 ສົມທຽບປີຜ່ານມາເຫັນວ່າກໍລະນີພົບເຊື້ອຫຼຸດລົງ 30.73%.

  ເພື່ອຜັນຂະຫຍາຍບົດບັນທຶກຊ່ວຍຈຳຂອງກອງປະຊຸມສຸດຍອດຜູ້ນຳປະເທດອາຊີຕາເວັນອອກຄັ້ງທີ 9, ສູນໄຂ້ຍຸງແມ່ກາຝາກແລະແມງໄມ້ ໄດ້ມີທິດທາງເປົ້າໝາຍເພື່ອບັນລຸການກຳຈັດພະຍາດໄຂ້ມາລາເຣຍໃນປີ 2030 ຄື: ໄລຍະ 1 ແຕ່ປີ 2016-2020 ແນໃສ່ຄວບຄຸມການລະບາດຂອງພະຍາດໄຂ້ມາລາເຣຍ ແລະ ຫຼຸດຜ່ອນຜົນກະທົບຂອງເຊື້ອຕ້ານຕໍ່ຢາໃນບັນດາແຂວງພາກໃຕ້ ແລະ ກ້າວເຂົ້າສູ່ການກຳຈັດພະຍາດໄຂ້ມາລາເຣຍໃນບັນດາແຂວງພາກເໜືອໂດຍສອດຄ່ອງກັບຄວາມພະຍາຍາມ ຂອງບັນດາປະເທດໃນພາກພື້ນລຸ່ມແມ່ ນໍ້າຂອງເພື່ອການກຳຈັດພະຍາດດັ່ງກ່າວ, ໄລຍະ 2 ແຕ່ປີ 2021-2025 ຈະແນໃສ່ກໍາຈັດພະຍາດໄຂ້ມາລາເຣຍຊະນິດຟານຊີປາຣອມໃນທົ່ວປະເທດຄຽງຄູ່ກັບບັນດາປະເທດໃນພາກພື້ນລຸ່ມແມ່ນໍ້າຂອງ ແລະກຳຈັດພະຍາດໄຂ້ມາລາເຣຍທຸກຊະນິດໃນບັນດາແຂວງພາກເໜືອ ແລະໄລຍະທີ 3 ແຕ່ປີ 2026-2030 ແນໃສ່ກໍາຈັດພະຍາດໄຂ້ມາລາເຣຍທຸກຊະນິດໃນຂອບເຂດທົ່ວປະເທດ.

__________

ຂຽນໂດຍ: ວົງມະນີ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

ບໍລິການໂຄສະນາທາງເຟສບຸກ ແລະເວັບໄຊ

ໂທ: 021 313645, 316511

แชร์