ປະທານປະເທດໂອ້ລົມພະນັກພະນັກງານຫຼັກແຫຼ່ງແຂວງຊຽງຂວາງເອົາໃຈໃສ່ຫຼາຍບັນຫາສຳຄັນ

  ໃນໂອກາດເຄື່ອນໄຫວຢ້ຽມຢາມ ແລະເຮັດວຽກທີ່ແຂວງຊຽງຂວາງ ທ່ານ ບຸນຍັງ ວໍລະຈິດ ປະທານປະເທດແຫ່ງ ສປປລາວ ໄດ້ເປັນກຽດໂອ້ລົມພະນັກງານຫຼັກແຫຼ່ງຂອງແຂວງໃນຕອນເຊົ້າວັນທີ 18 ທັນວາ 2019 ທີ່ຫ້ອງວ່າການ ແຂວງຊຽງຂວາງເຂົ້າຮ່ວມຮັບຟັງມີການນຳແຂວງ, ເມືອງ, ພະແນກການ, ກອງບັນຊາການ, ອົງ ການຈັດຕັ້ງ, ລັດ ວິສາຫະກິດ ແລະພະນັກງານວິຊາການ ເຂົ້າຮ່ວມຮັບຟັງ.

ໂອກາດນີ້ທ່ານ ບຸນຕົ້ນ ຈັນທະພອນ ເຈົ້າແຂວງໆຊຽງຂວາງກໍໄດ້ລາຍງານໃຫ້ທ່ານປະທານປະເທດຊາບກ່ຽວກັບສະພາບການພັດທະນາເສດຖະກິດ-ສັງຄົມຂອງແຂວງໃນໄລຍະຜ່ານມາເປັນຕົ້ນແມ່ນການແກ້ໄຂຄວາມທຸກຍາກ, ວຽກງານປ້ອງກັນຊາດ-ປ້ອງກັນຄວາມສະຫງົບ, ວຽກງານການເມືອງແນວຄິດຂອງພະນັກງານ-ລັດຖະກອນ.

  ຫຼັງຈາກນັ້ນທ່ານປະທານປະເທດກໍ່ໄດ້ເປັນກຽດມີຄຳຄິດເຫັນຊີ້ນຳໂອ້ລົມຊຶ່ງກ່ອນທ່ານໄດ້ກ່າວຍ້ອງຍໍຊົມເຊີຍຕໍ່ຜົນງານຂອງແຂວງໃນໄລຍະຜ່ານມາພ້ອມໄດ້ເນັ້ນໃຫ້ເອົາໃຈໃສ່ການຜະລິດເປັນສິນຄ້າການປູກຝັງລ້ຽງສັດ, ເອົາໃຈໃສ່ພັດທະນາເສດຖະກິດຄອບຄົວ, ເອົາໃຈໃສ່ແກ້ໄຂຊີວິດການເປັນຢູ່ຂອງປະຊາຊົນ, ສົ່ງເສີມຫົວໜ່ວຍທຸ ລະກິດ, ການແກ້ໄຂຄວາມທຸກຍາກໂດຍເລີ່ມຈາກ ຄອບຄົວ, ກວດກາຄືນການກໍ່ສ້າງເສັ້ນ ທາງພື້ນຖານໂຄງລ່າງລາຄາຄຸນນະພາບຕ້ອງເໝາະສົມ, ພະນັກງານຕ້ອງໂປ່ງໃສ, ການກໍ່ສ້າງຊົນລະປະທານຕ້ອງໄດ້ຮັບຜົນສູງ, ຊຸກຍູ້ໃຫ້ປະຊາຊົນປູກພືດຕາມລະດູການບໍ່ໃຫ້ປະເນື້ອທີ່ການຜະລິດຫວ່າງ, ເອົາໃຈໃສ່ການຮ່ວມມືກັບຕ່າງປະ ເທດ.

  ສຳລັບການຈັດງານມະຫາກຳກີລາຕ້ອງໄປຄຽງຄູ່ກັບການທ່ອງທ່ຽວນຳໃຊ້ໃຫ້ເກີດປະໂຫຍດສູງ,ການສຶກສາເນັ້ນຄຸນນະພາບເພື່ອຍົກລະດັບການສຶກສາໃຫ້ດີຂຶ້ນ,ຊອກຫາວິທີທາງແກ້ໄຂວຽກເຮັດງານທຳ, ຄະນະພັກຢ່າເບິ່ງຂ້າມບັນຫາເລັກໆນ້ອຍໆ, ວຽກງານ ປກຊ-ປກສ ຕ້ອງເຂັ້ມແຂງ, ເອົາໃຈໃສ່ແກ້ໄຂບັນຫາຢາເສບຕິດຕ້ອງເລີ່ມຈາກຂັ້ນບ້ານ, ຊອກຫາວິທີທາງອອກເພື່ອຕ້ານບັນຫາອຸບັດເຫດຕາມທ້ອງຖະໜົນ, ປົກປັກຮັກສາຮີດຄອງປະເພນີວັດທະນະທຳອັນດີງາມໄວ້, ການດຳເນີນກອງປະຊຸມໃຫຍ່ຕ້ອງເອົາໃຈໃສ່ຕາມການເເນະນຳກະກຽມຮອບດ້ານ, ຫັນລົງກໍ່ສ້າງຮາກຖານໃຫ້ຫຼາຍຂຶ້ນເພື່ອກໍ່ສ້າງພະນັກງານແລະພັດທະນາບ້ານ, ກວດກາຄືນບ້ານ ພັດທະ ນາບັນດາເງື່ອນໄຂຕ່າງໆໂດຍເນັ້ນຄຸນນະພາບເປັນຫຼັກ.

__________

ຂຽນໂດຍ: ບຸນມີ ແສງທຸມມີ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

• 19/12/2019