ມອບ-ຮັບໜ້າທີ່ຫົວໜ້າພະແນກ ຖວທ ແຂວງຫົວພັນ

   ພິທີມອບ-ຮັບໜ້າທີ່ເລຂາຄະນະພັກຮາກຖານ, ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງຫົວພັນໄດ້ຈັດຂຶ້ນໃນອາທິດຜ່ານມາທີ່ຫໍວັດທະນາທຳຂອງແຂວງໂດຍມີທ່ານ ຄຳຜິວ ວົງສະຫວັນ ຮອງເລຂາພັກແຂວງ, ປະທານແນວລາວສ້າງຊາດແຂວງຫົວພັນ, ບັນດາພາກສ່ວນທີ່ກ່ຽວຂ້ອງຂັ້ນແຂວງ, ຕາງໜ້າຫ້ອງການຖວທເມືອງ, ຕະຫຼອດຮອດພະນັກງານ-ລັດຖະກອນພາຍໃນພະແນກ ຖວທ ແຂວງ ຫົວພັນເຂົ້າຮ່ວມຢ່າງພ້ອມພຽງ.

ທ່ານ ຕົ່ງລີເຕັ່ງ ຮອງຫົວໜ້າຄະນະຈັດຕັ້ງແຂວງໄດ້ຜ່ານຂໍ້ຕົກລົງຂອງທ່ານເຈົ້າແຂວງຫົວພັນສະບັບເລກທີ 1212/ຈຂ-ຫພ ວ່າດ້ວຍການອະນຸມັດໃຫ້ພະນັກງານພັກຜ່ອນວຽກທາງລັດຖະການເພື່ອລໍຖ້າຮັບເບ້ຍບຳນານຕາມນະໂຍບາຍ ພ້ອມມະຕິຕົກລົງຂອງຄະນະປະຈຳພັກແຂວງເລກທີ 472/ ຄປຈຂ ລົງວັນທີ 7 ຕຸລາ 2019 ວ່າດ້ວຍການແຕ່ງຕັ້ງເລຂາຄະນະພັກຮາກຖານພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງຫົວພັນ, ຂໍ້ຕົກລົງຂອງ ທ່ານເຈົ້າແຂວງສະບັບເລກ ທີ 1210/ຈຂ-ຫພ ວ່າດ້ວຍການຍົກຍ້າຍພະນັກງານໄປປະຈຳການຢູ່ບ່ອນໃໝ່ ແລະ ຂໍ້ຕົກລົງຂອງທ່ານເຈົ້າແຂວງວ່າດ້ວຍການແຕ່ງຕັ້ງຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງຫົວພັນສະບັບເລກທີ 1209/ ຈຂ-ຫພ ລົງວັນທີ 7 ຕຸລາ 2019 ໂດຍແຕ່ງຕັ້ງທ່ານ ນາງ ໝັ້ນ ເພັງ ຄະຕິຍະກຳມະການພັກແຂວງເປັນຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ແຂວງຫົວພັນ ແລະ ໄດ້ຕົກລົງໃຫ້ ທ່ານ ຄຳສິງ ລາດດາວົງ ເລຂາຄະນະພັກຮາກຖານ, ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງຫົວພັນຜູ້ເກົ່າພັກຜ່ອນວຽກທາງລັດຖະການເພື່ອລໍຖ້າຮັບເບ້ຍບຳນານຕາມນະໂຍບາຍ.

ໂອກາດດັ່ງກ່າວທ່ານ ຄຳຜິວ ວົງສະຫວັນ  ຮອງເລຂາພັກແຂວງ, ປະທານແນວລາວສ້າງຊາດແຂວງຫົວພັນໄດ້ໂອ້ລົມຊຶ່ງທ່ານໄດ້ຕີລາຄາສູງ ແລະ ສະແດງຄວາມຍ້ອງຍໍຊົມເຊີຍຕໍ່ສະຫາຍເລຂາຄະນະພັກຮາກຖານ, ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວຜູ້ເກົ່າໄດ້ເອົາໃຈໃສ່ຊີ້ນຳໆພາຂົງເຂດວຽກງານຖະແຫຼງຂ່າວ, ວັດທະນະທຳ ແລະ ທ່ອງທ່ຽວສາມາດຍາດໄດ້ຜົນງານຫຼາຍດ້ານພ້ອມທັງໃຫ້ທິດຊີ້ນຳໃນການປະຕິບັດວຽກງານໂດຍທ່ານໄດ້ ເນັ້ນໜັກໃຫ້ຄະນະນຳພະແນກຕະຫຼອດຮອດພະນັກງານລັດຖະກອນພ້ອມກັນເອົາໃຈໃສ່ບຸກທະລຸສາມກະແສແນວຄິດ, ເພີ່ມທະວີການຊີ້ນຳໆພາໃຫ້ມີປະສິດທິພາບເປັນຕົ້ນແມ່ນການຄຸ້ມຄອງ-ນໍ້າໃຊ້ພາຫະນະສື່ມວນຊົນໃຫ້ມີປະສິດທິຜົນ, ປັບປຸງລະບົບການທ່ອງທ່ຽວຢູ່ແຂວງຫົວພັນໃຫ້ທຽບທັນກັບພາກ ພື້ນ ແລະ ສາກົນ, ປົກປັກຮັກ-ເສີມຂະຫຍາຍມູນມໍລະດົກທາງດ້ານວັດທະນະທຳຂອງແຂວງ ໂດຍສະເພາະແມ່ນສຽງຂັບລຳທ້ອງຖິ່ນ; ເອົາໃຈໃສ່ກໍ່ສ້າງພັກ, ພະນັກງານແນໃສ່ຮັກສາໄດ້ໜ່ວຍພັກປອດໃສ, ເຂັ້ມແຂງ, ໜັກແໜ້ນຮັບປະກັນດ້ານຄຸນນະພາບ ແລະ ການກໍ່ສ້າງພະນັກງານຕ້ອງຕິດພັນກັບການ ສົ່ງເສີມຄວາມກ້າວໜ້າ, ເຕົ້າໂຮມຄວາມສາມັກຄີພາຍໃນໃຫ້ໜັກແໜ້ນ, ພາຍນອກກວ້າງຂວາງ, ຕີຕ້ານແນວຄວາມຄິດກຸ່ມກ້ອນ, ຖືເອົາຄວາມສາມັກຄີເປັນສຳຄັນ; ເອົາໃຈໃສ່ປັບປຸງແບບແຜນວິທີເຮັດວຽກຂອງຄະນະພັກ, ຄະນະພະແນກຮັບປະກັນລວມສູນປະຊາທິປະໄຕ, ເຮັດວຽກເປັນໝູ່ຄະນະ ແລະ ສຽງສ່ວນໜ້ອຍຂຶ້ນກັບສຽງສ່ວນຫຼາຍເພື່ອພັດທະນາວຽກງານຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງຫົວພັນກ້າວໄປຢ່າງບໍ່ຢຸດຢັ້ງ.

---------------

ຂ່າວ: ໄອແກ້ວ

แชร์