ເຕັກນິກການກ້າ ແລະປູກ ແຄນຕາລູບ

  ແຄນຕາລູບເປັນພືດທີ່ນິຍົມກັນບໍລິໂພກເນື່ອງຈາກມີລົດຊາດແຊບດີ, ເນື້ອຫວານ, ມີກິ່ນຫອມ, ເປັນພືດຕະກຸນລົ້ມລຸກມີລະບົບຮາກແກ້ວເລິກປະມານ 80-120 ຊັງຕີແມັດ.

ອີງຕາມຂໍ້ມູນຈາກສະຖາບັນຄົ້ນຄວ້າກະສິກຳ-ປ່າໄມ້ແຫ່ງຊາດໃຫ້ຮູ້ວ່າ: ເຕັກນິກການກ້າ ແລະ ປູກແຄນຕາລູບແມ່ນລວມມີຂັ້ນຕອນ ຄື: 1) ນໍາເອົາແກ່ນແຄນຕາລູບມາແຊ່ນໍ້າອຸ່ນໃນພະຊະນະ ຫຼື ອາດປະສົມສານຊີວະພັນພືດຄື: ເຊື້ອຣາໄຕຣ ໂຄເດິມາ ຕັ້ງແຕ່ເລີ່ມກ້າແກ່ນເພື່ອປ້ອງກັນພະຍາດຕ່າງໆ ເຊັ່ນ: ຮາກເນົ່າ, ເຫງົ້າເນົ່າທີ່ອາດເຮັດໃຫ້ແກ່ນບໍ່ງອກອອກມາໄດ້, ໂດຍການເອົາແກ່ນແຊ່ປະສົມປະສານຊີວະພັນໄວ້ປະມານ 4-6 ຊົ່ວໂມງອັດຕາສ່ວນນໍ້າ 20 ຊີຊີຕໍ່ນໍ້າ 1 ລິດ; 2) ນໍາເອົາແກ່ນທີ່ແຊ່ນໍ້າໄວ້ມາຫໍ່ດ້ວຍເຈ້ຍທິດຊູ້ທີ່ປຽກຊື້ນເພາະເວລາຮາກເລີ່ມອອກຈະດຶງແກ່ນອອກຈາກຮາກໄດ້ງ່າຍເຮັດໃຫ້ຮາກບໍ່ຂາດ, ຫຼັງຈາກນັ້ນໃຫ້ນໍາໄປໃສ້ກ່ອງໄວ້ປະມານ 24- 48 ຊົ່ວໂມງພໍຮາກຍາວໄດ້ 1 ຊັງ ຕີແມັດ  ໃຫ້ນໍາໄປກ້າໃນຖາດກ້າເບ້ຍທີ່ກຽມໄວ້ເລີຍ; 3) ກຽມຖາດທີ່ເປັນຂຸມໄວ້ກ້າເບ້ຍ ຫຼື ຈະໃຊ້ຖົງກ້າເບ້ຍກໍໄດ້ແລ້ວຄ່ອຍເອົາຝຸ່ນໝັກໃສ່ຖາດກ້າເບ້ຍໃຫ້ເຕັມແລ້ວໃຊ້ນິ້ວບີບຝຸ່ນໝັກລົງໄປຂຸມ 1 ຂໍ້ມື, ຂັ້ນຕອນນີ້ບາງຄົນອາດເອົານໍ້າໝັກເຊື້ອຣາໄຕຣໂຄເດິມາມາລົງນໍາ ຫຼື ປະສົມຝຸ່ນໝັກເພື່ອປ້ອງກັນເຊື້ອຣາ ແລະ ຊ່ວຍໃຫ້ຕົ້ນກ້າແຂງແຮງໄດ້, 4) ເອົາແກ່ນລົງຂຸມໂດຍວາງດ້ານປາຍແຫຼມຂອງແກ່ນລົງ ຫຼື ອາດຈະເອົາແກ່ນລົງຂຸມໃນແນວນອນກໍໄດ້ເພາະເວລາແກ່ນງອກອອກມາພົ້ນດິນຈະໄດ້ເອົາເປືອກຖິ້ມໄດ້ເລີຍ.

ສ່ວນຂັ້ນຕອນທີ 5) ເມື່ອເອົາແກ່ນລົງຂຸມແລ້ວຄວນປົກດ້ວຍຝຸ່ນໝັກອີກຄັ້ງແລ້ວໃຊ້ມືກົດຄ່ອຍໆໃຫ້ແໜ້ນ ແລະ ສີດນໍ້າດ້ວຍສະເປ, ສີດໃຫ້ຊຸ່ມທຸກຂຸມແຕ່ຖ້າບາງຄົນປູກຫຼາຍໆກໍສາມາດເອົາຝັກບົວມາຫົດເລີຍຈະງ່າຍດີແຕ່ກໍຄວນລະວັງຢ່າໃຫ້ປຽກຫຼາຍ 6) ປະ ມານ 2 ວັນ ແກ່ນຈະເລີ່ມງອກໂຜ່ພົ້ນຝຸ່ນໝັກຂຶ້ນມາໂດຍມີຍອດໃບອ່ອນ 2 ໃບ ຈາກນັ້ນອີກ 10 ວັນກໍຈະມີໃບແທ້ຂຶ້ນມາອີກ 2 ໃບ; 7) ເມື່ອໄດ້ໃບແທ້ມາແລ້ວຄວນຍ້າຍກ້າແຄນຕາລູບໄປປູກໃນສະຖານທີ່ກຽມປູກໄດ້ເລີຍແຕ່ໃນໄລຍະທີ່ຍ້າຍຕ້ອງລະວັງ ແລະ ຄວນຍ້າຍເວລາຝຸ່ນແຫ້ງເລັກໜ້ອຍເນື່ອງຈາກຖ້າຍ້າຍຕອນປຽກໆຈະເຮັດໃຫ້ຮາກຫຼຸດອອກບໍ່ເກາະກັບຝຸ່ນເຮັດໃຫ້ຮາກຂາດໄດ້, ດັ່ງນັ້ນຄວນຍ້າຍຕອນຝຸ່ນແຫ້ງ ແລະ ພະຍາຍາມດຶງຖາດຂອງແຕ່ລະຕົ້ນຄ່ອຍໆ ແລະ ດຶງມາຢ່າງລະມັດລະວັງ, 8) ຂໍ້ຄວນລະວັງການເພາະກ້າໃນຮົ່ມກັບບ່ອນທີ່ມີແສງແດດອ່ອນໆແຕກຕ່າງກັນຫຼາຍຄື: ຖ້າໃນຮົ່ມລໍາຕົ້ນຈະຍາວໆ ແລະ ຕົ້ນນ້ອຍ, ແຕ່ຖ້າເພາະກ້າທີ່ມີແສງແດດອ່ອນໆໝົດມື້ຈະເຮັດໃຫ້ຕົ້ນກ້າສັ້ນ ແລະງາມ.

ເຕັກນິກທີ່ຄວນຈື່ສໍາລັບການກ້າເບ້ຍແຄນຕາລູບ: 1) ແກ່ນພັນບາງຊະນິດມີເປືອກໜາອາດຕ້ອງໃຊ້ມີດຕັດເລັບຕັດປາຍແຫຼມຂອງແກ່ນເພື່ອຊ່ວຍການອອກຂອງຮາກເພີ່ມອັດຕາການອອກໄດ້ອີກ 2) ກ່ອນທີ່ຈະຍ້າຍກ້າລົງຖົງເພາະຊໍາ ຫຼື ຂຸມປູກຄວນຢຸດໃຫ້ນໍ້າຕົ້ນ ກ້າ 1 ວັນ ແລະ ຄວນຍ້າຍກ້າໃນຕອນແລງ ຫຼື ຄໍ່າໆບໍ່ຄວນຍ້າຍໃນຊ່ວງແດດກ້າເພື່ອໃຫ້ຕົ້ນກ້າປັບສະພາບໄດ້ດີ; 3) ຄວນກ້າເບ້ຍແຄນຕາລູບໃນບ່ອນແຈ້ງຖືກແດດຖືກແສງຈະເຮັດໃຫ້ຕົ້ນກ້າແຂງແຮງກວ່າ. 

------------------

ຂ່າວ: ກິ່ງລັດຕະນະ

แชร์