ເຈົ້າແຂວງສະຫວັນນະເຂດຕິດຕາມການສ້ອມແປງ ຊົນລະປະທານ

   ເມື່ອທ້າຍອາທິດຜ່ານມາ ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດພ້ອມຄະນະພະແນກກະສິກຳ ແລະ ປ່າໄມ້ແຂວງໄດ້ລົງໄປເບິ່ງການສ້ອມ ແປງລະບົບຈັກສູບນໍ້າເຂດໂຄງການຊົນລະປະທານລະຫານໍ້າ 1 ແລະ ການສ້ອມແປງຄອງຊົນລະປະທານຂອງປະຊາຊົນເຂດໂຄງການດົງສະຫວ່າງເມືອງສອງ ຄອນ, ໂດຍມີທ່ານ ລຳຄູນ ວໍລະວົງ ເຈົ້າເມືອງສອງຄອນພ້ອມຄະນະຮ່ວມຕິດຕາມ.

ທ່ານ ທະວີສຸກ ໂພທິຈັກ ຫົວ ໜ້າຫ້ອງການກະສິກຳ ແລະ ປ່າໄມ້ເມືອງສອງຄອນລາຍງານວ່າ: ທົ່ວເມືອງມີໂຄງການຈັກສູບນໍ້າທັງໝົດ 8 ຫົວງານທີ່ນຳໃຊ້ໄດ້ 100%, ເພື່ອໃຫ້ການຜະລິດລະດູແລ້ງຂອງຊາວນາທັນກັບລະດູການທາງພາກລັດຈຶ່ງໄດ້ເລັ່ງໃສ່ການສ້ອມແປງລະບົບຫົວງານທີ່ໄດ້ຮັບຜົນກະທົບຈາກໄພນໍ້າຖ້ວມໃນລະດູຝົນຜ່ານມາ, ສ່ວນລະບົບຄອງເໝືອງບາງບ່ອນທີ່ເປ່ເພໜັກກໍ່ແມ່ນພາກລັດ ແລະ ບາງບ່ອນທີ່ປະຊາຊົນສາມາດເຮັດໄດ້ແມ່ນໄດ້ ສ້ອມແປງໄປແລ້ວ, ທົ່ວເມືອງມີ ເນື້ອທີ່ແຜນປູກເຂົ້ານາແຊງໃຫ້ ໄດ້ 4.300 ເຮັກຕາ ຊຶ່ງຕ້ອງ ການແນວພັນ 300 ກວ່າໂຕນ, ໃນນັ້ນແມ່ນນາຫວ່ານ 60% ປະຈຸບັນຊາວນາຕົກກ້າໄດ້ 35%, ສໍາລັບພືດລະດູແລ້ງມີແຜນປູກໃຫ້ໄດ້ 2.900 ເຮັກຕາ, ສ່ວນຫຼາຍແມ່ນໝາກໂມ, ສາລີ, ມັນຕົ້ນ, ຄາມ, ຝ້າຍ ແລະພືດຜັກຕ່າງໆ.

ອັນທີ່ພົ້ນເດັ່ນກໍ່ແມ່ນຄວາມຕື່ນຕົວຂອງຊາວນາເຂດໂຄງການຊົນລະປະທານດົງສະຫວ່າງທີ່ມີການສ້ອມແປງຄອງເໝືອງເພື່ອເອົານໍ້າໄປຫົດເນື້ອທີ່ນາແຊງ ໃຫ້ທັນກັບລະດູການປີນີ້, ທ່ານ ບຸນເລີດ ສີຫາໝຸດ ຮອງນາຍບ້ານດົງສະຫວ່າງໃຫ້ສຳພາດຕໍ່ຜູ້ສື່ຂ່າວວ່າ: ຊາວນາໃນ 3 ບ້ານ ລວມມີບ້ານດົງສະຫວ່າງ, ບ້ານສອງຄອນ ແລະ ບ້ານວິໄຊສົງໄດ້ພ້ອມກັນສ້ອມແປງຄອງຊົນລະປະທານດ້ວຍເຫື່ອແຮງຂອງປະຊາຊົນເພື່ອນຳເອົານໍ້າໄປຫົດເນື້ອທີ່ນາແຊງໃຫ້ໄດ້ 100 ເຮັກຕາ, ໃນນັ້ນແມ່ນໄດ້ຂຸດຄອງເໝືອງແມ່ຍາວ 300 ແມັດ, ມູນຄ່າ 8 ລ້ານກີບ, ພ້ອມນັ້ນກໍຍັງມີຄອງຊອຍ 9 ເສັ້ນ, ເສັ້ນລະ 500 ແມັດ ແລະ ທາງສຳລັບລົດໄຖນາທຽວໄດ້ 1 ເສັ້ນ, ຍາວ 650 ແມັດ, ຕໍ່ທໍ່ 72 ທໍ່, ຍາວ 348 ແມັດ, ຄາດວ່າພາຍໃນສອງອາທິດຈະສາມາດປະຕິບັດໄດ້ 100% ຂອງເນື້ອທີ່ 100 ເຮັກຕາ.

ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ໄດ້ ຍ້ອງຍໍຊົມເຊີຍຕໍ່ຄວາມຫ້າວຫັນ ຕື່ນຕົວຂອງປະຊາຊົນຊາວນາຊາວ ກະສິກອນທົ່ວເມືອງສອງຄອນ ສະເພາະກໍແມ່ນປະຊາຊົນບ້ານດົງ ສະຫວ່າງທີ່ບໍ່ລໍຖ້າແຕ່ການຊ່ວຍ ເຫຼືອຂອງພາກລັດ ພ້ອມກັນສ້ອມ ແປງຄອງຊົນລະປະທານ ເພື່ອຕ້ອງ ການນຳໃຊ້ນໍ້າຫົດເນື້ອທີ່ນາແຊງ ໃຫ້ທ່ວງທັນຕາມລະດູການ, ດັ່ງ ນັ້ນພາກລັດກໍຄວນອຳນວຍຄວາມ ສະດວກຕື່ມເຮັດແນວໃດເພື່ອເຮັດ ໃຫ້ນໍ້າໄຫຼຕາມຄອງດິນໄປຫາເນື້ອ ທີ່ນາຂອງປະຊາຊົນໂດຍໄວ ແລະ ບໍ່ເສຍຫາຍໄປນຳດິນຫຼາຍເກີນໄປ. ຊຸກຍູ້ສົ່ງເສີມປະຊາຊົນຜະລິດລະດູແລ້ງປີນີ້ໃຫ້ທັນຕາມລະດູການ.

ໃນເວລາຕໍ່ມາທ່ານເຈົ້າແຂວງສະຫວັນນະເຂດໄດ້ໄປຢ້ຽມຢາມການຜະລິດລະດູແລ້ງຂອງປະຊາຊົນເຂດເມືອງຊົນນະບູລີ, ຄະນະຫ້ອງການກະສິກຳ ແລະ ປ່າ ໄມ້ເມືອງໃຫ້ຮູ້ວ່າ: ທົ່ວເມືອງມີແຜນປູກເຂົ້ານາແຊງໃນເນື້ອທີ່ 3.250 ເຮັກຕາ, ປະຈຸບັນໄດ້ຮັບແນວພັນເຂົ້າຊ່ວຍເຫຼືອ 40 ໂຕນ, ຄາດວ່າປະຊາຊົນຈະຜະລິດໄດ້ເກີນແຜນທີ່ວາງໄວ້ເພາະໃນລະດູແລ້ງປີນີ້ຊາວນາຫ້າວຫັນໃສ່ການຜະລິດສະແດງອອກຢູ່ບ່ອນວ່າຕາມເນື້ອທີ່ແຜນຕົວຈິງຊາວນາເຮັດນາຫວ່ານກວມ 70% ແລະ ຕົກກ້າໄດ້ແລ້ວ 90% ແລະ ປັກດຳຕົວຈິງໄດ້ 50%. ນອກນັ້ນກໍມີແຜນປູກພືດລະດູແລ້ງໃຫ້ໄດ້ 1.545 ເຮກຕາສ່ວນຫຼາຍແມ່ນປູກໝາກສາລີລຽບຕາມແຄມນໍ້າເຊຊັງຊອຍ ແລະ ພືດຜັກຕ່າງໆຕາມຫ້ວຍຮ່ອງຄອງບຶງ.

-----------------

ໜັງສືພີມເສດຖະກິດ-ສັງຄົມ

 

แชร์