ຫຼວງນໍ້າທາເຜີຍແຜ່ກົດໝາຍການຄຸ້ມຄອງສ່ວຍສາອາກອນ

   ວັນທີ 16 ທັນວາ 2019 ກົມສ່ວຍສາອາກອນກະຊວງການເງິນສົມທົບກັບພະແນກການເງິນ ແຂວງຫຼວງນໍ້າທາ ເຜີຍແຜ່ກົດໝາຍວ່າດ້ວຍການຄຸ້ມຄອງສ່ວຍ ສາອາກອນ, ກົດໝາຍວ່າດ້ວຍອາກອນມູນຄ່າເພີ່ມ, ກົດໝາຍວ່າດ້ວຍອາກອນລາຍໄດ້ ແລະ ກົດໝາຍວ່າດ້ວຍອາກອນຊົມໃຊ້ທີ່ສະໂມສອນແຂວງຫຼວງນໍ້າທາໂດຍການເປັນປະທານຂອງທ່ານກອນ ແສງ ຄັນທະວົງ ຮອງຫົວໜ້າພະແນກການເງິນແຂວງ, ທ່ານເພັດ ສະຫວັນ ມາລາບັນດິດຜູ້ຊີ້ນຳ ຮ່າງລະບຽບກົດໝາຍຮອງຫົວໜ້າກົມສ່ວຍສາອາກອນກະຊວງການເງິນມີຜູ້ຕາງໜ້າຈາກພະແນກການເງິນແຂວງອຸດົມໄຊ, ຜົ້ງສາລີ ແລະ ແຂວງບໍ່ແກ້ວ ພ້ອມດ້ວຍຜູ້ຕາງໜ້າຈາກສ່ວຍສາອາກອນ 5 ເມືອງ, ມີພະນັກງານວິຊາການທີ່ກ່ຽວຂ້ອງຂອງພະແນກການອ້ອມຂ້າງແຂວງເຂົ້າຮ່ວມທັງໝົດ 230 ຄົນ.

ທ່ານ ເພັດສະຫວັນ ມາລາບັນດິດຜູ້ຊີ້ນຳຮ່າງລະບຽບກົດໝາຍຮອງຫົວໜ້າກົມສ່ວຍສາອາກອນກະຊວງການເງິນໄດ້ຜ່ານຮ່າງກົດໝາຍວ່າດ້ວຍການຄຸ້ມຄອງສ່ວຍສາອາກອນ,ກົດໝາຍວ່າດ້ວຍອາກອນມູນຄ່າເພີ່ມ, ກົດໝາຍວ່າດ້ວຍອາກອນລາຍໄດ້ ແລະ ກົດໝາຍວ່າດ້ວຍອາກອນຊົມໃຊ້ປະຈຸບັນການ ຄຸ້ມຄອງວຽກງານສ່ວຍສາອາກອນໄດ້ມີກົດໝາຍວ່າດ້ວຍສ່ວຍສາອາກອນ ແລະ ກົດໝາຍວ່າດ້ວຍອາກອນມູນຄ່າເພີ່ມເປັນເຄື່ອງມືໃນການຄຸ້ມຄອງ ແລະຈັດຕັ້ງປະຕິບັດການເກັບລາຍຮັບງົບປະມານແຫ່ງລັດເຂົ້າໃນການພັດທະນາປະເທດຊາດຕາມແຜນພັດທະນາເສດຖະກິດ-ສັງຄົມແຫ່ງຊາດໃນ ແຕ່ລະໄລຍະ ຊຶ່ງກົດໝາຍວ່າດ້ວຍກົດໝາຍສ່ວຍສາອາກອນທີ່ໄດ້ຖືກຮັບຮອງເອົາໃນກອງປະຊຸມສະໄໝສາມັນຂອງສະພາແຫ່ງຊາດຊຸດ ທີ III ໃນປີ 1995, ສະບັບເລກທີ 04/95/ສພຊ, ລົງວັນທີ 14 ຕຸລາ 1995.

ຈາກນັ້ນໂດຍອີງໃສ່ສະພາບການຂະຫຍາຍຕົວທາງດ້ານເສດຖະກິດ ແລະ ສັງຄົມໃນແຕ່ລະໄລຍະ, ກົດໝາຍວ່າດ້ວຍສ່ວຍສາອາກອນໄດ້ມີການປັບປຸງມາ 5 ຄັ້ງ ໃນປີ 2001, 2002, 2005, 2011 ແລະປີ 2015 ເປັນສະບັບທີ່ນໍາໃຊ້ໃນປະຈຸບັນສະບັບເລກ ທີ 70/ສພຊ, ລົງວັນທີ 15 ທັນ ວາ  2015 ປະກອບມີ 11 ໝວດ ແລະ 100 ມາດຕາຊຶ່ງໄດ້ກວມເອົາປະເພດອາກອນເປັນຕົ້ນອາກອນຊົມໃຊ້, ອາກອນກໍາໄລ, ອາກອນລາຍໄດ້, ອາກອນມອບເໝົາ, ອາກອນສິ່ງແວດລ້ອມ ແລະ ຄ່າທໍານຽມ, ຄ່າບໍລິການ ແລະ ໄດ້ແຍກອາກອນມູນຄ່າເພີ່ມອອກເປັນກົດໝາຍສະເພາະໃນປີ 2006 ແລະ ປັບປຸງ 2 ຄັ້ງ ໃນປີ 2014 ແລະ 2018 (ສະບັບເລກທີ 48/ສພຊ, ລົງວັນທີ 20 ມິຖຸນາ 2018).

ຜ່ານການຈັດຕັ້ງປະຕິບັດກົດໝາຍວ່າດ້ວຍສ່ວຍສາອາກອນໃນໄລຍະຜ່ານມາເຫັນວ່າກົດໝາຍດັ່ງກ່າວ ເປັນເຄື່ອງມືທີ່ສໍາຄັນໃນການຄຸ້ມຄອງການເກັບລາຍຮັບງົບປະມານແຫ່ງລັດ, ສາມາດລະດົມແຫຼ່ງລາຍຮັບເຂົ້າງົບປະມານແຫ່ງລັດເພີ່ມຂຶ້ນຢ່າງຕໍ່່ເນື່ອງ ເພື່ອສະໜອງດ້ານທຶນຮອນໃຫ້ແກ່ແຜນພັດທະນາເສດຖະກິດ-ສັງຄົມໃນແຕ່ລະໄລຍະພ້ອມທັງເປັນການກະຕຸກຊຸກຍູ້, ສົ່ງເສີມການຜະລິດ ແລະ ການດໍາເນີນທຸລະກິດໃຫ້ມີປະສິດທິຜົນ ແລະ ສາມາດເຊື່ອມໂຍງກັບພາກພື້ນ ແລະ ສາກົນພ້ອມທັງປະຕິບັດຕາມທິດຂອງລັດຖະບານໃນການປະຕິຮູບການເງິນຢ່າງຮອບດ້ານ, ແນໃສ່ເຮັດໃຫ້ວຽກງານສ່ວຍສາອາກອນເປັນລະບົບຄົບຊຸດ, ດັດສົມລາຍໄດ້, ການຊົມໃຊ້ໃນສັງຄົມ, ໃຫ້ນະໂຍບາຍທາງດ້ານອາກອນເພື່ອສົ່ງເສີມ ແລະ ດືງດູດການລົງທຶນໃຫ້ສາມາດແຂ່ງຂັນກັບສາກົນເທື່ອລະກ້າວ. ພ້ອມນັ້ນຍັງອໍານວຍຄວາມສະດວກໃຫ້ແກ່ບຸກຄົນ, ນິຕິບຸກຄົນ ຫຼື ການຈັດຕັ້ງທີ່ເຄື່ອນໄຫວດໍາເນີນທຸລະກິດໃຫ້ມີລາຍໄດ້ສອດຄ່ອງກັບກົດໝາຍ ແລ ະລະບຽບການຢ່າງລວມສູນ ແລະ ເອກະພາບໃນທົ່ວປະເທດ.

----------------

ຂ່າວ:  ມຸນຕີ

แชร์