ເອັດສຊີຈີ ມອບທຶນການສຶກສາໃຫ້ນັກຮຽນ

 ບໍລິສັດ ເອັດສຊີຈີ ຮ່ວມກັບກະຊວງສຶກສາທິການ ແລະກີລາ ແລະ ສະມາຄົມຮ່ວມນໍ້າໃຈກັບເດັກນ້ອຍລາວສານຕໍ່ໂຄງການ “SCG Sharing the Dream” ໃນ ສປປ ລາວ ເປັນປີທີ 8 ເພື່ອສ້າງໂອກາດທາງການສຶກສາໃຫ້ເຍົາວະຊົນທີ່ເປັນຄົນເກັ່ງ ແລະດີມີຄວາມກະຕັນຍູແຕ່ຂາດເຂີນທຶນຮອນ ແລະເປັນອະນາຄົດຂອງຊາດຕໍ່ໄປ, ພິທີດັ່ງກ່າວ​ຈັດຂຶ້ນທີ່ນະຄອນຫຼວງວຽງຈັນ ໃນວັນທີ 17 ທັນວາ ຜ່ານ​ມາເປັນກຽດເຂົ້າຮ່ວມໂດຍທ່ານ ນາງ ດາລາວອນ ກິດຕິພັນ ຮັກສາການຫົວໜ້າຫ້ອງການກະ ຊວງສຶກສາທິການ ແລະກີລາ, ພ້ອມດ້ວຍພາກສ່ວນທີ່ກ່ຽວຂ້ອງ, ພະນັກງານ, ຄູ-ອາຈານ ແລະນັກຮຽນ-ນັກສຶກສາທີ່ໄດ້ຮັບທຶນ.

 ທ່ານ ວິໂຣດ ຣັດຕະນະໄຊສິດ Head of Distribution and Retail Business, ບໍລິສັດ ເອັດສຊີຈີ ຊີມັງ-ຜະລິດຕະພັນກໍ່ສ້າງ ຈໍາກັດກ່າວວ່າ: “ເອັດສຊີຈີ ເຊື່ອວ່າປະເທດຊາດຈະເຂັ້ມແຂງໄດ້ກໍ່ຕ້ອງເລີ່ມຈາກ “ຄົນ” ທີ່ມີຄຸນນະພາບ ຊຶ່ງບໍ່ໄດ້ໝາຍເຖິງແຕ່ຄົນເກັ່ງ ຫຼືມີຄວາມສາມາດຢ່າງດຽວແຕ່ຕ້ອງເປັນຄົນດີກະຕັນ ຍູຕໍ່ຄອບຄົວ, ຊຸມຊົນ, ສັງຄົມ ແລະຕົນເອງ, ນອກນັ້ນເອັດສຊີຈີເຫັນຄວາມສໍາຄັນຂອງຄວາມໄຝ່ຝັນແລະຄວາມມຸ້ງໝັ້ນຢາກເຊີນຊວນໃຫ້ນ້ອງໆທຸກຄົນຮ່ວມຈຸດປະ ກາຍຄວາມໄຝ່ຝັນ ແລະ ຄວາມມຸ້ງໝັ້ນສູ່ຄວາມສຳເລັດໃນອະນາຄົດ ແລະສະແດງໃຫ້ເຫັນວ່າຄວາມໃຝ່ຝັນຄືພະລັງສຳຄັນທີ່ເປັນຈຸດເລີ່ມຕົ້ນໄປສູ່ການພັດທະນາສັງຄົມ ແລະ ປະເທດຊາດໃຫ້ກ້າວຕໍ່ໄປໃນອະນາຄົດ”. ຜ່ານ​ມາເອັດສຊີຈີ ຊຸກຍູ້ໂຄງການຕ່າງໆທີ່ຊ່ວຍພັດທະນາບຸກຄະລາກອນຂອງປະເທດຜ່ານການສົ່ງເສີມດ້ານການສຶກສາ ຊຶ່ງເປັນທີ່ມາຂອງໂຄງການທຶນການສຶກສາ SCG Sharing the Dream ໃນພູມມີພາກອາຊຽນເຊັ່ນ: ສປປ ລາວ, ໄທ, ຫວຽດນາມ, ອິນໂດເນເຊຍ, ຟິລິບປິນ, ກຳປູເຈຍ ແລະມຽນມາປະຈຸບັນໂຄງການໄດ້ມອບທຶນການສຶກສາໃຫ້ນັກຮຽນປີລະ 6.000 ກວ່າຄົນທົ່ວພູມມີພາກອາຊຽນເພື່ອຮ່ວມພັດທະນາປະເທດທີ່ເອັດສຊີຈີເຂົ້າໄປດຳເນີນທຸລະກິດ.

 ສຳລັບ ສປປ ລາວ ເອັດສຊີຈີ ດຳເນີນໂຄງການນີ້ດ້ວຍຄວາມຕັ້ງໃຈ ແລະໃສ່ໃຈຢ່າງຕໍ່ເນື່ອງຕະຫຼອດ 8 ປີ ແລະໃນປີນີ້ມອບທຶນການສຶກສາລະດັບມັດທະຍົມຕອນປາຍລວມ 300 ທຶນ ​ໃນ​ນີ້ນະຄອນຫຼວງວຽງຈັນ 160 ທຶນ, ແຂວງຄໍາມ່ວນ 140 ທຶນ ​ແລະທຶນການສຶກສາລະດັບປະລິນຍາຕີເພີ່ມຈໍານວນ 10 ທຶນ ຫຼັງຈາກທີ່ໄດ້ມອບທຶນລະດັບປະລິນຍາຕີໄປໃນປີແລ້ວເປັນປີທໍາອິດຈໍານວນ 10 ທຶນ,ທຶນດັ່ງກ່າວເນັ້ນສະໜັບສະໜູນນັກສຶກສາທີ່ມີຄວາມໄຝ່ຝັນໃນການສໍາເລັດການສຶກສາ ແລະປະກອບອາຊີບ.

_____

 

 ໂອກາດດັ່ງກ່າວ ທ່ານ ນາງ ດາລາວອນ ກິດຕິພັນ ​ໄດ້​ສະ​ແດງ​ຄວາມ​ຂອບ​ໃຈທາງເອັດສຊີຈີ ທີ່ສະໜັບສະໜູນໃຫ້ມີໂຄງການດີໆແບບນີ້ ແລະຂໍຂອບໃຈຜູ້ອໍານວຍການໂຮງຮຽນ, ຄູ-ອາຈານທີ່ໃສ່ໃຈປະຕິບັດໜ້າທີ່ຂອງຕົນໃຫ້ດີຂຶ້ນໄປເລື້ອຍໆ ເພື່ອບັນລຸຜົນສຳເລັດໃນການຈັດຕັ້ງປະຕິບັດແຜນພັດທະນາການສຶກສາໃຫ້ມີການພັດທະນາທີ່ມີຄຸນນະພາບດີຂຶ້ນຕາມນະໂຍບາຍຂອງກະຊວງສຶກສາທິການ ແລະກີລາຕະຫຼອດເຖິງນ້ອງນັກຮຽນໃຫ້ຕັ້ງໃຈຮຽນ ແລະເຮັດຄວາມດີຕະຫຼອດໄປ.

​   

 ເອັດສຊີຈີ ກຸ່ມບໍລິສັດຊັ້ນນໍາໃນຂອບເຂດອາຊຽນປະຈຸບັນປະກອບດ້ວຍ 3 ທຸລະກິດຫຼັກໄດ້ແກ່ທຸລະກິດຊີມັງ-ຜະລິດຕະພັນກໍ່ສ້າງ, ທຸລະກິດເຄມີໂຄ ແລະ ທຸລະກິດແພັກເກັດຈິ້ງ ຕະຫຼອດໄລຍະຫຼາຍກວ່າ 106 ປີ ເອັດສຊີຈີດໍາເນີນທຸລະກິດຕາມແນວທາງການພັດທະນາແບບຍືນຍົງພາຍໃຕ້ຫຼັກການທີ່ດີມຸ້ງສູ່ຄວາມເປັນຜູ້ນໍາໃນອາຊຽນ ແລະ ກຽມພ້ອມສໍາລັບການແຂ່ງຂັນລະດັບໂລກ, ເອັດສຊີຈີ ເລີ່ມດໍາເນີນທຸລະກິດໃນ ສປປ ລາວ ຕັ້ງແຕ່ປີ 2003 ພາຍໃຕ້ 4 ບໍລິສັດຄື: Khammouane Cement Limited, SCG International Laos Co., Ltd., CPAC Lao ແລະ SCG Logistics (Lao) ເພື່ອຜະລິດ ແລະ ຈັດຈໍາໜ່າຍຊີມັງສິນຄ້າວັດສະດຸກໍ່ສ້າງ ແລະເຄື່ອງຕົບແຕ່ງເຮືອນຄົບວົງຈອນ ພາຍໃຕ້ຍີ່ຫໍ້ SCG ແລະ Cotto.

____________

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

ບໍລິການໂຄສະນາທາງເຟສບຸກ ແລະເວັບໄຊ

ໂທ: 021 313645, 316511

แชร์