ຜູ້ວ່າການ ທຫລ ເຄື່ອນໄຫວເຮັດວຽກຢູ່ພາກເໜືອ

 ໃນລະຫວ່າງວັນທີ 11 ຫາ 13 ທັນວາ 2019 ຜ່ານມາ, ທ່ານ ສອນໄຊ ສິດ ພະໄຊ ຜູ້ວ່າການທະນາຄານແຫ່ງ ສປປ ລາວພ້ອມຄະນະໄດ້ເດີນທາງເຄື່ອນໄຫວເຮັດວຽກຢູ່ແຂວງຫຼວງນໍ້າທາ ແລະ ແຂວງອຸດົມໄຊຊຶ່ງໄດ້ຕ້ອນຮັບຢ່າງອົບອຸ່ນຈາກບັນດາພະນັກງານຂັ້ນນຳ-ຂັ້ນວິຊາການຂອງສາຂາ ທຫລ ພາກເໜືອ ແຂວງອຸດົມໄຊ, ບັນດາສາຂາທະນາຄານທຸລະກິດ, ທະນາຄານສະເພາະກິດ ແລະພາກສ່ວນກ່ຽວຂ້ອງ.

  ໃນໂອກາດດັ່ງກ່າວ; ທ່ານຜູ້ວ່າການທະນາຄານແຫ່ງ ສປປ ລາວ ຍັງໄດ້ພົບປະ ແລະປຶກສາຫາລືວຽກງານກັບທ່ານ ເພັດຖາວອນ ພິລາວັນ ເຈົ້າແຂວງຫຼວງນໍ້າທາ ແລະພົບປະທ່ານຮອງເຈົ້າ ແຂວງອຸດົມໄຊ ໂດຍໄດ້ແຈ້ງສະພາບການເຄື່ອນໄຫວວຽກງານທີ່ພົ້ນເດັ່ນໃນຫຼາຍດ້ານຂອງຂະແໜງການ-ທ້ອງຖິ່ນ, ບັນຫາຂໍ້ຄົງຄ້າງ-ສິ່ງທ້າທາຍ ແລະວິທີການແກ້ໄຂໃຫ້ກັນຊາບໂດຍສະເພາະວຽກງານຂະແໜງການທະນາຄານຢູ່ພາຍໃນແຂວງຫຼວງນໍ້າທາ ແລະແຂວງອຸດົມໄຊ; ຈາກນັ້ນ, ທ່ານຍັງໄດ້ເຂົ້າເຮັດວຽກກັບຄະນະພັກ-ຄະນະບັນຊາກອງບັນຊາການປ້ອງກັນຄວາມສະຫງົບແຂວງ, ຄະນະນໍາອົງການສານປະຊາຊົນທັງ 2 ແຂວງ ຊຶ່ງແຕ່ລະແຫ່ງແມ່ນໄດ້ຍົກໃຫ້ເຫັນສະພາບການທີ່ຕິດພັນກັບກັບການຊໍາລະສະສາງ, ການນໍາໃຊ້ເງິນຕາຕ່າງປະເທດ ແລະ ບັນຫາອື່ນໆຢູ່ທ້ອງຖິ່ນດັ່ງກ່າວ; ພ້ອມນີ້, ຍັງໄດ້ເຮັດວຽກຢູ່ບໍລິສັດພັດ ທະນາເຂດພິເສດບໍ່ເຕ່ນແດນງາມ ແລະຢ້ຽມຢາມເບິ່ງການຜະລິດຂອງໂຮງງານປຸງແຕ່ງໄມ້ຢູ່ບ້ານກໍນ້ອຍ ເມືອງໄຊ ແຂວງອຸດົມໄຊ.

  ຈາກນັ້ນ, ທ່ານຍັງໄດ້ໃຫ້ກຽດໂອ້ລົມ ແລະໃຫ້ທິດຊີ້ນໍາແກ່ບັນດາພະນັກງານທະນາຄານທຸລະກິດ ແລະທະນາຄານສະເພາະກິດຂອງແຂວງຫຼວງນໍ້າທາ, ບໍ່ແກ້ວ, ອຸ ດົມໄຊ ແລະ ຜົ້ງສາລີ ຊຶ່ງໃນຂະ ນະດຽວກັນ, ກໍ່ໄດ້ໂອ້ລົມ ແລະຊີ້ນໍາວຽກງານແກ່ພະນັກງານຫຼັກແຫຼ່ງ, ການນໍາ ແລະ ພະນັກງານວິຊາການຂອງສາຂາທະນາຄານແຫ່ງ ສປປ ລາວ ພາກເໜືອ ແຂວງອຸດົມໄຊ ຊຶ່ງແຕ່ລະແຫ່ງແມ່ນທ່ານໄດ້ຕີລາຄາສູງຕໍ່ຜົນສໍາເລັດຂອງຂະແໜງການທະນາຄານທີ່ໄດ້ປະກອບສ່ວນຢ່າງຕັ້ງໜ້າ ແລະສົມກຽດເຂົ້າໃນການພັດທະນາເສດຖະກິດ-ສັງຄົມຂອງຊາດ ແລະ ຂອງທ້ອງຖິ່ນໃຫ້ມີບາດກ້າວຫັນປ່ຽນໃໝ່ຢ່າງຕັ້ງໜ້າ;

  ພ້ອມນັ້ນຍັງເນັ້ນໃຫ້ພະນັກງານທະນາຄານທຸກຄົນຈົ່ງເສີມຂະຫຍາຍມູນເຊື້ອຜົນງານອັນພົ້ນເດັ່ນໃນຫຼາຍດ້ານຂອງຕົນ, ປັບປຸງແກ້ໄຂຈຸດອ່ອນ ແລະຂໍ້ຄົງຄ້າງເປັນຕົ້ນປະກົດການຫຍໍ້ທໍ້ໃຫ້ຫຼຸດລົງເປັນກ້າວໆ ແລະ ຈົ່ງເພີ່ມທະວີຄວາມສາມັກຄີໃຫ້ສູງຂຶ້ນ, ເອົາໃຈໃສ່ວຽກງານຊໍາລະສະສາງ, ວຽກງານບໍລິການ, ການປະສານງານ, ການຄຸ້ມຄອງເງິນຕາຕ່າງປະເທດ ແລະວຽກງານອື່ນໆໃຫ້ດີຂຶ້ນກ່ວາເກົ່າແນໃສ່ເພື່ອຮັບໃຊ້ປະຊາຊົນລາວບັນດາເຜົ່າໃຫ້ມີຄວາມສະດວກສະບາຍ, ວ່ອງໄວ ແລະທັນໃຈ ສົມກັບວ່າ: ເປັນທະນາຄານຂອງປະຊາຊົນ.

__________

ຂຽນໂດຍ: ຣັດສະໝີ ດວງສັດຈະ      
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์