ປະດັບຫຼຽນໃຫ້ບຸກຄົນທີ່ມີຜົນງານດີເດັ່ນໃນການພັດທະນາ

    ວັນທີ 13 ທັນວາຜ່ານມາ, ທີ່ຫໍວັດທະນະທຳໄກສອນ ພົມວິຫານ ໄດ້ຈັດພິທີປາຖະກະຖາວັນຊາດທີ 2 ທັນວາ ຄົບຮອບ 44 ປີ(2/12/1975-2/12/ 2019), ວັນຄ້າຍວັນເກີດປະທານໄກສອນ ພົມວິຫານ ຄົບຮອບ 99 ປີ (13/ 12/1920-13/12/2019) ແລະພິທີປະດັບຫຼຽນໄຊໃຫ້ຜູ້ທີ່ມີຜົນງານດີເດັ່ນໃນ ການປະກອບສ່ວນພັດທະນາປະເທດຊາດທັງເປີດຂະບວນການແຂ່ງຂັນຮັກຊາດ ແລະພັດທະນາຕິດພັນການລຶບລ້າງຄວາມທຸກຍາກໂດຍເຂົ້າຮ່ວມຂອງທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ, ທ່ານ ສົມສະຫວາດ ເລັ່ງສະຫວັດ ອະດີດກຳມະການກົມການເມືອງສູນກາງພັກ, ອະດີດຮອງນາຍົກລັດຖະມົນຕີ, ທີ່ປຶກສາຄະນະບໍລິຫານງານສູນກາງພັກ, ບັນດາທ່ານການນຳພັກ-ລັດ, ຄະນະພັກ-ຄະນະບັນຊາ ປກຊ-ປກສ, ສະຖາບັນການສຶກສາພາກລັດ-ເອກະຊົນ, ນັກທຸລະກິດ, ພໍ່ຄ້າຊາວຂາຍ, ພະນັກງານອາວຸໂສບຳນານ, ພະນັກງານ-ລັດ ຖະກອນພາຍໃນແຂວງເຂົ້າຮ່ວມ.

  ໃນພິທີກໍໄດ້ຮັບຟັງການເລົ່າຄືນມູນເຊື້ອວັນຊາດທີ 2 ທັນວາ ແລະວັນຄ້າຍວັນເກີດປະທານ ໄກສອນ ພົມວິຫານ ຜູ້ນຳທີ່ແສນເຄົາລົບຮັກຂອງປວງຊົນລາວທົ່ວປະເທດ ຈາກທ່ານ ສົມສະຫວາດ ເລັ່ງສະຫວັດ ຈາກນັ້ນ, ໃນພິທີກໍໄດ້ມີການປະດັບຫຼຽນໄຊພັດທະນາຊັ້ນ 1 ໃຫ້ຈຳນວນ 3 ທ່ານຄື: ທ່ານ ເກຍ ອູ໊ສິດທິເດດ ເຈົ້າຂອງໂຮງ ງານນໍ້າດື່ມ ແລະນໍ້າກ້ອນ ໂລມາຄຳ ທີ່ປະກອບສ່ວນທາງດ້ານເຫື່ອ ແຮງ, ສະຕິປັນຍາ ແລະທຶນຮອນສ່ວນຕົວ ເຂົ້າໃນໂຄງການລຶບລ້າງຄວາມທຸກຍາກຂອງປະຊາຊົນບ້ານຄຳປ່າແໜ ແລະບ້ານ ປ່າກ້ວຍ ເມືອງຈຳພອນ ໃຫ້ຫຼຸດພົ້ນຈາກ ຄວາມທຸກຍາກເທື່ອລະກ້າວຕາມແນວ ທາງຂອງພັກ-ລັດຊຶ່ງປະກອບທຶນເຂົ້າ ໃນໂຄງການໄລຍະສອງປີ 2017-2018 ເປັນມູນຄ່າ 12,46 ຕື້ກີບ, ທ່ານ ຄຳພູມີ ມີໄຊ ຜູ້ອຳນວຍການໂຮງງານປຸງແຕ່ງໄມ້ອຸດົມໄຊ ແລະທ່ານ ສີພັນດອນ ມີໄຊ ຜູ້ອຳນວຍການບໍລິສັດລາວມີໄຊກໍ່ສ້າງຈຳກັດ ທີ່ປະກອບສ່ວນວັດຖຸແລະທຶນ ຮອນສ່ວນໂຕເຂົ້າໃນການສ້າງສາພັດທະ ນາພື້ນຖານໂຄງລ່າງພາຍໃນອະນຸສາວະລີບັນດາການນຳກົມການເມືອງຮຸ່ນທຳອິດຂອງແຂວງສະຫວັນະເຂດ ລວມມູນຄ່າ 3,16 ຕື້ກີບ.

  ນອກນີ້ກໍໄດ້ປະດັບຫຼຽນໄຊພັດທະນາຊັ້ນ 2 ໃຫ້ຈຳນວນ 1 ທ່ານຄື: ທ່ານ ເກຍ ອູ໊ສິດທິເດດ ເຈົ້າຂອງໂຮງງານນໍ້າດື່ມ ແລະນໍ້າກ້ອນໂລມາຄຳ ທີ່ປະກອບສ່ວນທາງດ້ານເຫື່ອແຮງ, ສະຕິປັນຍາ ແລະ ທຶນຮອນສ່ວນຕົວເຂົ້າໃນໂຄງການລຶບລ້າງຄວາມທຸກຍາກປະຊາຊົນບ້ານຄຳປ່າແໜ ແລະ ບ້ານປ່າກ້ວຍ ເມືອງຈຳພອນ ໃຫ້ຫຼຸດພົ້ນຈາກຄວາມທຸກຍາກເທື່ອລະກ້າວຕາມແນວທາງຂອງພັກ-ລັດ ໂດຍໄດ້ປະກອບທຶນເຂົ້າໃນໂຄງການໄລຍະ 1 ປີ 2016-2017 ລວມມູນຄ່າ 2,59 ຕື້ກີບ.

  ທັງນີ້ຍັງປະດັບຫຼຽນໄຊແຮງງານຊັ້ນ 2 ໃຫ້ຈຳນວນ 11 ທ່ານ ແລະຫຼຽນໄຊ ແຮງງານຊັ້ນ 3 ໃຫ້ຈຳນວນ 8 ທ່ານ ທີ່ມີຜົນງານປະກອບສ່ວນທາງດ້ານເຫື່ອແຮງ, ສະຕິປັນຍາ ເຂົ້າໃນການຊຸກຍູ້ ແລະເຄື່ອນໄຫວໂຄງການລຶບລ້າງຄວາມທຸກຍາກປະຊາຊົນບ້ານຄຳປ່າແໜ ແລະ ບ້ານປ່າກ້ວຍ ເມືອງຈຳພອນ ທີ່ໄດ້ປະກອບທຶນເຂົ້າໃນໂຄງການໄລຍະ1 ແລະໄລຍະ 2.

ຈາກນີ້,ກໍມີການປະດັບຫຼຽນໄຊແຮງງານຊັ້ນ 2 ໃຫ້ຜູ້ຈັດການທີມ ແລະ ຄູຝຶກນັກກີລາເຮືອຊ່ວງຈຳນວນ 4 ທ່ານ, ປະດັບຫຼຽນໄຊແຮງງານຊັ້ນ 3 ໃຫ້ຜູ້ຈັດການທີມ, ຄູຝຶກ ແລະນັກກີລາເຮືອຊ່ວງ ຈຳນວນ 28 ທ່ານ, ທີ່ມີຜົນງານດີເດັ່ນທີ່ໄດ້ຕາງໜ້າ ສປປ ລາວ ເຂົ້າຮ່ວມການແຂ່ງຂັນຊ່ວງເຮືອນາໆຊາດປະເພດ 12 ສີພາຍ ທີ່ນະຄອນໜານໝິງ ສປ ຈີນ ໃນຄັ້ງວັນທີ 12 ຫາ20 ມິຖຸນາ 2018 ສາມາດຍາດໄດ້ 1 ຫຼຽນຄຳ ແລະ1 ຫຼຽນເງິນ ແລະມີຜົນງານດີເດັ່ນຕາງໜ້າ ສປປ ລາວ ເຂົ້າ ຮ່ວມການແຂ່ງຂັນ ຊ່ວງເຮືອນາໆຊາດປະເພດ 12 ສີພາຍ ທີ່ນະຄອນຮ່າໂນ້ຍ ສສ ຫວຽດນາມ ໃນ ຄັ້ງວັນທີ 12 ຫາ 19 ກຸມພາ 2019 ເຊິ່ງສາມາດຍາດໄດ້ 1 ຫຼຽນຄຳ ໂດຍແມ່ນທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ທີ່ຕາງໜ້າການນຳພັກ-ລັດໃຫ້ກຽດປະດັບຫຼຽນໃນຄັ້ງນີ້ຢ່າງສົມກຽດ.

  ໃນຕອນທ້າຍຂອງກອງປະຊຸມ ທ່ານ ສັນຕິພາບ ພົມວິຫານ ກໍໄດ້ສະແດງຄວາມຍ້ອງຍໍພາກສ່ວນທຸລະກິດທີ່ປະກອບສ່ວນໃນການພັດທະນາຊີວິດການເປັນຢູ່ຂອງປະ ຊາຊົນກໍ່ຄືການຮ່ວມພັດທະນາປະເທດຊາດໃນໄລຍະຜ່ານມາ,ພ້ອມນັ້ນພວກເຮົາຕ້ອງໄດ້ສຸມທຸກກຳລັງແຮງເຂົ້າໃສ່ການພັດທະນາຊົນນະບົດເພື່ອສ້າງໃຫ້ມີການຫັນປ່ຽນໃຫ້ດີຂຶ້ນ, ສຸມໃສ່ຈັດສັນພູມລໍາເນົາ ແລະອາຊີບໝັ້ນຄົງກັບທີ່ໃຫ້ໄດ້ໂດຍພື້ນຖານ, ກໍານົດແຈ້ງກ່ຽວກັບຄວາມຮັບຜິດຊອບຂອງແຕ່ລະພາກສ່ວນໂດຍຖືເອົາວຽກງານພັດ ທະນາ ແລະແກ້ໄຂຄວາມທຸກຍາກເຂົ້າໃນທິດທາງແຜນວຽກຈຸດສຸມຂອງຄະນະພັກຂັ້ນຂອງຕົນ,ຂໍຮຽກຮ້ອງມາຍັງພາກທຸລະກິດເພີ່ມທະວີສະຕິຕື່ນຕົວ ແລະຄວາມເປັນເຈົ້າການໃນການຮັກຫອມການພັດທະນາ ບ້ານເກີດເມືອງນອນ ອັນເປັນມູນເຊື້ອມາ ແຕ່ບູຮານນະການ ກໍຄືຜູ້ນໍາຮຸ່ນທຳອິດ ຂອງພວກເຮົາໂດຍການເຂົ້າມາມີສ່ວນຮ່ວມໃນຂະບວນການແຂ່ງຂັນຮັກຊາດ ແລະພັດທະນາຄັ້ງນີ້ໃຫ້ຫຼາຍຂຶ້ນແນໃສ່ພັດທະນາທ້ອງຖິ່ນ, ບ້ານທຸກຍາກ ແລະຫ່າງໄກສອກຫຼີກໃຫ້ເປັນຂະບວນຟົດຟື້ນ ແລະມີຜົນ ສຳເລັດຕາມລະດັບຄາດໝາຍ.

_____________

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์