ໄຊຍະ ເຊື່ອມຊຶມຄຳສັ່ງ ເລກທີ 064 ຂອງກົມການເມືອງສູນກາງພັກ

   ພະແນກກະສິກຳ ແລະ ປ່າໄມ້ແຂວງໄຊຍະບູລີ ໄດ້ຈັດກອງປະຊຸມເຜີຍແຜ່ເຊື່ອມຊຶມຄຳສັ່ງເລກທີ 064 ຂອງກົມການເມືອງສູນກາງພັກວ່າດ້ວຍວຽກງານຂະຫຍາຍພັກ ແລະຄຳແນະນຳການສະຫຼຸບຕີລາຄາການຈັດຕັ້ງປະຕິບັດກົດລະບຽບຂອງພັກສະໄໝທີ X ຂຶ້ນເມື່ອວັນທີ 13 ທັນວາ ຜ່ານມາໂດຍການເປັນກຽດເຂົ້າຮ່ວມເຜີຍແຜ່ຂອງ ສະຫາຍ ຍັນຍົງ ສີປະເສີດ ຮອງເລຂາພັກແຂວງຮອງເຈົ້າ ແຂວງໄຊຍະບູລີ, ເຂົ້າຮ່ວມຮັບຟັງມີ 3 ຮາກຖານພັກພະແນກ ຄືຮາກຖານພັກພະແນກກະສິກຳ ແລະ ປ່າໄມ້ແຂວງ, ຮາກຖານພັກພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງ ຮາກຖານພັກພະແນກພະລັງງານ ແລະບໍ່ແຮ່ແຂວງ, ມີໜ່ວຍພັກພະແນກການຕ່າງປະເທດ,ໜ່ວຍພັກອຸດສາຫະກຳ ແລະການຄ້າແຂວງ,ໜ່ວຍພັກພະແນກຍຸຕິທຳແຂວງ, ໜ່ວຍພັກໄອຍະການແຂວງ, ໜ່ວຍພັກສານປະຊາຊົນແຂວງ, ພ້ອມດ້ວຍສະມາຊິກພັກ-ພະນັກງານຫຼັກແຫຼ່ງ.

 ກອງປະຊຸມຄັ້ງນີ້ຜູ້ເຂົ້າຮ່ວມກໍ່ໄດ້ຮັບຟັງການເຜີຍແຜ່ຄຳສັ່ງເລກທີ 064 ຂອງກົມການເມືອງສູນກາງພັກລົງວັນທີ 9 ເມສາ 2019 ວ່າດ້ວຍວຽກງານຂະຫຍາຍພັກ, ຮັບຟັງຄຳແນະນຳຂອງຄະນະຈັດຕັ້ງສູນກາງພັກເລກທີ 201 ລົງວັນທີ 29 ທັນວາ 2019 ກ່ຽວກັບການຈັດຕັ້ງປະຕິບັດຄໍາສັ່ງຂອງກົມການເມືອງສູນກາງພັກວ່າດ້ວຍວຽກງານຂະຫຍາຍພັກ, ຮັບຟັງຄຳແນະນຳເລກທີ 13 ຂອງອານຸກຳມະການກົດລະບຽບ ແລະ ບຸກຄະລາກອນກອງປະຊຸມໃຫຍ່ຄັ້ງທີ XI ຂອງພັກລົງວັນທີ 29 ຕຸລາ 2019 ກ່ຽວກັບການສະຫຼຸບຕີລາຄາການຈັດຕັ້ງປະຕິບັດກົດລະບຽບພັກສະໄໝທີ X ໃນທົ່ວອົງຄະນະພັກຕົນ, ຫຼັງຈາກນັ້ນກໍ ໄດ້ຮັບຟັງມະຕິຕົກລົງຂອງຄະນະ ປະຈຳພັກເມືອງຫົງສາ ສະບັບ ເລກທີ 351/ ຄພມຫສ, ລົງວັນທີ 11 ທັນວາ 2019 ວ່າດ້ວຍການແຕ່ງຕັ້ງຄະນະຮັບຜິດຊອບລົງເຜີຍແຜ່ເຊື່ອມຊຶມຄຳສັ່ງເລກທີ 064 ຂອງກົມການເມືອງສູນກາງພັກວ່າດ້ວຍວຽກງານຂະຫຍາຍພັກ ແລະ ການສະຫຼຸບຕີລາຄາການຈັດຕັ້ງປະຕິບັດກົດລະບຽບຂອງພັກສະໄໝທີ X ທົ່ວອົງຄະນະພັກເມືອງຫົງສາ.

ທັ້ງນີ້ກໍເພື່ອເຮັດໃຫ້ຜູ້ເຂົ້າຮ່ວມໄດ້ຮັບຮູ້ເຂົ້າໃຈແນໃສ່ເພີ່ມທະວີບົດບາດການນຳພາຈັດຕັ້ງປະຕິບັດໜ້າທີ່ການເມືອງຂອງໜ່ວຍພັກ, ສະມາຊິກພັກໃຫ້ມີຜົນສຳເລັດ ແລະ ມີປະສິດທິຜົນ, ເພື່ອປະກອບຂໍ້ມູນທີ່ເປັນພື້ນຖານໃຫ້ແກ່ການຄົ້ນຄວ້າ, ປັບປຸງ, ດັດແປງກົດລະບຽບຂອງພັກທີ່ຈະສະເໜີຜ່ານກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກໃຫ້ມີເນື້ອໃນຖືກຕ້ອງ, ຄົບຖ້ວນ, ຮັດກຸມ ແລະສ່ອງແສງເຖິງສະພາບຄວາມເປັນຈິງດ້ານການຈັດຕັ້ງ ແລະການເຄື່ອນໄຫວຂອງລະບົບການຈັດຕັ້ງພັກ ແລະ ສະມາຊິກພັກໃນເງື່ອນໄຂໃໝ່.

----------------

ໜັງສືພີມເສດຖະກິດ-ສັງຄົມ

แชร์