ເມືອງເຊບັ້ງໄຟປະກາດການຈັດຕັ້ງ 3 ຫ້ອງການ

  ເພື່ອແນໃສ່ເຮັດໃຫ້ການເຄື່ອນໄຫວຈັດຕັ້ງປະຕິບັດໜ້າທີ່ວຽກງານພາຍໃນເມືອງໃຫ້ຖືກຕ້ອງສອດຄ່ອງຕາມລະບຽບການປະຕິບັດໜ້າທີ່ວຽກງານຕາມການມອບໝາຍ ດັ່ງນັ້ນໃນວັນທີ  13 ທັນວາ 2019 ທີ່ສະໂມສອນ ເມືອງເຊບັ້ງໄຟ ໄດ້ຈັດພິທີປະກາດການຈັດຕັ້ງຮອງຫົວໜ້າຫ້ອງການອຸດສາຫະກຳການຄ້າ,ຫ້ອງການແຜນການ ແລະການລົງທຶນ ແລະຫ້ອງການພາຍໃນເມືອງເຊບັ້ງໄຟ, ພາຍໃຕ້ການເປັນປະທານຂອງ ທ່ານ ບຸນສີ ພົມມະໄຊ ເຈົ້າເມືອງໆເຊບັ້ງໄຟເຂົ້າຮ່ວມໂດຍ ທ່ານ ເດດສັກດາ ມະນີຄຳ ຫົວໜ້າພະແນກແຜນການ ແລະການລົງທຶນແຂວງຄຳມ່ວນ, ທ່ານ ທອງໄຊ ມັງໜໍເມກ ຫົວໜ້າພະແນກອຸດສາຫະກໍາ ແລະການຄ້າແຂວງພ້ອມບັນດາຄະ ນະປະຈຳພັກເມືອງ, ກຳມະການພັກເມືອງ, ຫົວໜ້າ, ຮອງຫົວໜ້າຫ້ອງການອ້ອມຂ້າງ ແລະແຂກຖືກເຊີນເຂົ້າຮ່ວມ.

  ທ່ານ ສົມພົງ ແອ້ສຸລິຍັນ ຫົວໜ້າຄະນະຈັດຕັ້ງເມືອງໄດ້ຜ່ານຂໍ້ຕົກລົງຂອງທ່ານເຈົ້າເມືອງວ່າດ້ວຍການຕົກລົງແຕ່ງຕັ້ງທ່ານ ຄຳສະຫວັນ ຄຳມິ່ງສະຫວັດ ໜ້າທີ່ຮັບ ຜິດຊອບວຽກງານການຄ້າພາຍໃນຂຶ້ນເປັນຮອງຫົວໜ້າຫ້ອງການອຸດສາຫະກຳ ແລະ ການຄ້າເມືອງ, ຕົກລົງແຕ່ງຕັ້ງທ່ານ ສອນໄຊ ອຸປະລາດ ວິຊາການຫ້ອງການແຜນການ ແລະການລົງທຶນເມືອງຂຶ້ນເປັນຮອງຫົວໜ້າຫ້ອງການແຜນການແລະການລົງທຶນເມືອງ ແລະແຕ່ງຕັ້ງ ທ່ານ ພົງສະກອນ ອິນດາສັກ ວິຊາການຫ້ອງການພາຍໃນຂຶ້ນເປັນຮອງຫົວໜ້າຫ້ອງການພາຍໃນເມືອງເຊບັ້ງໄຟ.  

 ໃນພິທີດັ່ງກ່າວເຈົ້າເມືອງໆເຊບັ້ງໄຟໄດ້ກ່າວມີຄຳເຫັນໂອ້ລົມສະແດງຄວາມຍ້ອງຍໍຊົມເຊີຍ ຕໍ່ຜົນງານໃນຫຼາຍໆດ້ານທີ່ຍາດມາໄດ້ແລະໃນໂອກາດດຽວກັນທ່ານກໍ່ໄດ້ຮຽກ ຮ້ອງເຖິງບັນ ດາສະຫາຍທີ່ຖືກແຕ່ງຕັ້ງພ້ອມກັນສຸມສະຕິປັນຍາເຂົ້າໃນການສ້າງສາພັດທະນາເມືອງເຊບັ້ງໄຟໃຫ້ດີຂຶ້ນເປັນກ້າວໆ ແລະ ສຸມໃສ່ປະກອບສ່ວນເຫື່ອແຮງເຂົ້າໃນການຫ້າງຫາກະກຽມກອງປະຊຸມໃຫຍ່ຄັ້ງທີ VI ຂອງອົງຄະນະພັກເມືອງທີ່ຈະຈັດຂຶ້ນໃນມໍ່ໆນີ້.

___________

ຂຽນໂດຍ: ສີສຸພັນ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

• 18/12/2019