ກົມປິ່ນປົວສະຫຼອງວັນເບົາຫວານໂລກ

   ກະຊວງສາທາລະນະສຸກກົມປິ່ນປົວ ແລະຟື້ນຟູໜ້າທີ່ການ ແລະອົງການສາກົນບໍລິການປະຊາຊົນໄດ້ພິທີສະເຫຼີມສະຫຼອງວັນເບົາຫວານໂລກປີ 2019 ພາຍໃຕ້ຫົວ ຂໍ້ “ຮັກຄອບຄົວຈົ່ງປ້ອງກັນ ແລະ ປິ່ນປົວພະຍາດເບົາຫວານ” ຂຶ້ນໃນວັນທີ 14 ທັນວາ ຜ່ານມາທີ່ນະຄອນຫຼວງວຽງຈັນ ເປັນປະທານຂອງ ທ່ານ ດຣ ພູທອນ ເມືອງປາກ ຮອງລັດຖະມົນຕີກະຊວງ ສາທາລະນະສຸກ, ມີຫົວໜ້າກົມປິ່ນປົວ ແລະ ຟື້ນຟູໜ້າທີ່ການ, ອົງ ການ PSI, ຊ່ຽວຊານພະຍາດບໍ່ຕິດຕໍ່ຈາກໂຮງໝໍສູນກາງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

  ເພື່ອເປັນການລະນຶກເຖິງວັນເບົາຫວານໂລກ ແລະເຫັນຄວາມສໍາຄັນໃນການປ້ອງກັນ ແລະຄວບຄຸມພະຍາດເບົາຫວານຊຶ່ງພະຍາດເບົາຫວານຍັງເປັນສາເຫດໃນການເສຍຊີວິດ ແລະເປັນສາເຫດໃນການເກີດມີພະຍາດແຊກຊ້ອນຕາມມາເຊັ່ນ: ພະຍາດແຊກຊ້ອນໃສ່ຈໍປະສາດຕາເຮັດໃຫ້ອັກເສບຕາ,ຈໍປະສາດຕາເຊື່ອມ, ຕາບອດ; ແຊກຊ້ອນໃສ່ໄຂ່ຫຼັງເຮັດໃຫ້ໄຂ່ຫຼັງອັກເສບ,ໄຂ່ຫຼັງຊຸດໂຊມ, ແຊກຊ້ອນໃສ່ຫຼອດເລືອດຫົວໃຈເຮັດໃຫ້ຫຼອດເລືອດສະໝອງ ແລະຫຼອດເລືອດສ່ວນປາຍອຸດຕັນຊຶ່ງເປັນສາຍເຫດໃຫ້ເກີດບາດແຜຢູ່ຕີນສົ່ງຜົນໃຫ້ຄົນເຈັບບາງຄົນຕ້ອງໄດ້ຖືກຕັດຂາກາຍເປັນຄົນພິການມັນໄດ້ສົ່ງຜົນຕໍ່ຄຸນນະພາບຊີວິດຂອງຄົນເຈັບ ແລະຄົນໃນຄອບຄົວທີ່ຕ້ອງມີພາລະເພີ່ມຂຶ້ນ.

 ພາຍໃນງານໄດ້ມີກິດຈະກຳຫຼາກຫຼາຍເຊັ່ນ: ກວດພະຍາດເບົາຫວານຟຣີແກ່ພໍ່ແມ່ປະຊາຊົນ, ໃຫ້ຄວາມຮູ້ພື້ນຖານກ່ຽວກັບພະຍາດເບົາຫວານ ແລະໂພຊະນາການສໍາລັບຄົນເຈັບເບົາຫວານ, ເຕັ້ນອອກກໍາລັງກາຍໂດຍເຕັ້ນຈັງຫວະເພງລາວປະຍຸກເຮັດໃຫ້ຜູ້ເຂົ້າຮ່ວມທຸກຄົນໄດ້ຮັບຄວາມຮູ້, ຄວາມເບີກບານມ່ວນຊື່ນ ແລະ ພ້ອມກັນເບິ່ງແຍງສຸຂະພາບໃຫ້ຫ່າງໄກຈາກພະຍາດດັ່ງກ່າວ.

__________

ຂຽນໂດຍ: ວົງມະນີ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

แชร์