ຫາລືບັນຫາ ແລະສິ່ງທ້າທາຍຕ່ອງໂສ້ມັນຕົ້ນ ເພື່ອສົ່ງເສີມຄຸນນະພາບການຜະລິດ ແລະການຕະຫຼາດ

   ເມື່ອອາທິດຜ່ານມາທີ່ແຂວງສາລະວັນກອງປະຊຸມປຶກສາຫາລືກ່ຽວກັບບັນຫາ ແລະສິ່ງທ້າທາຍຂອງຕ່ອງໂສ້ມັນຕົ້ນເພື່ອສົ່ງເສີມຄຸນນະພາບການຜະລິດ ແລະການຕະຫຼາດໂດຍການເປັນປະທານຂອງ ທ່ານ ຈັນທາ ທິບພະວົງພັນຫົວໜ້າກົມປູກຝັງກະຊວງກະສິກຳ ແລະປ່າໄມ້, ທ່ານ ອະນຸສັກ ຈຳປາຄຳ ຫົວໜ້າພະແນກກະສິກຳ ແລະ ປ່າໄມ້ແຂວງສາລະວັນ ແລະ ທ່ານ ອາເຫຼັກຊາເດີ ດາຮານ ຫົວໜ້າໂຄງການຄິຣນ (CLEAN) ອົງ ການວິນຣອກປະຈໍາລາວ, ມີຫົວໜ້າພະແນກກະສິກໍາປ່າໄມ້ຈາກແຂວງຈຳປາສັກ, ເຊກອງ ແລະພະນັກງານວິຊາການ, ພ້ອມດ້ວຍໜ້າສູນ, ຮອງສູນ, ນອກຈາກນັ້ນກໍຍັງມີຜູ້ຕາງໜ້າຈາກບໍລິສັດຜະລິດຝຸ່ນຊີວະພາບ, ໂຮງງານປຸງແຕ່ງມັນຕົ້ນລາວ-ອິນໂດໄຊນາ, ກຸ່ມຊາວສວນ, ກຸ່ມເກັບຊື້ມັນຕົ້ນ, ທະນາຄານ, ໂຄງການ CLEAN ແລະໂຄງການ CIAT ເຂົ້າຮ່ວມ.

  ທ່ານ ຈັນທາ ທິບພະວົງພັນຫົວໜ້າກົມປູກຝັງກະຊວງກະສິກຳ ແລະປ່າໄມ້ກໍໄດ້ກ່າວວ່າ: ໂຄງການສ້າງຄວາມເຊື່ອມໂຍງເພື່ອຂະຫຍາຍເຄືອຂ່າຍກະສິກຳ ຫຼື CLEA N project ເປັນໂຄງການໜຶ່ງທີ່ໄດ້ຮັບການສະໜັບສະໜູນດ້ານງົບປະມານຈາກກະຊວງກະສິກຳຂອງປະເທດສະຫະລັດອາເມລິກາ (USDA) ໄດ້ມອບໃຫ້ອົງການວິນຣອກສາກົນເປັນຜູ້ຈັດຕັ້ງປະຕິບັດກິດຈະກຳຂອງໂຄງການ CLEAN ໂດຍຮ່ວມກັບກົມປູກ ຝັງ (DOA) ຊຶ່ງມີຈຸດປະສົງເປົ້າໝາຍຫຼັກແມ່ນເພື່ອຍົກສະມັດຕະພາບການຜະລິດໂດຍການຝຶກອົບຮົມໃຫ້ຊາວກະສິກອນໃນຮູບແບບການຜະລິດກະສິກຳ, ສ້າງຄວາມເຂັ້ມແຂງໃຫ້ວຽກງານປ້ອງກັນພືດ, ກັກກັນພືດ ແລະ ສະໜອງເຄື່ອງ ມື, ປັດໄຈການຜະລິດ, ນອກນັ້ນກໍເປັນການຂະຫຍາຍການຄ້າດ້ານກະສິກຳທັງພາຍໃນ ແລະ ພາກພື້ນດ້ວຍການເຊື່ອມໂຍງຜະລິດຕະພັນ ກະສີກຳຂອງລາວໃຫ້ເຂົ້າສູ່ຕະຫຼາດໃນພາກພື້ນໂດຍເນັ້ນໃສ່ພັດ ທະນາຍີ່ຫໍ້ຂອງຜະລິດຕະພັນກະສິກຳ ແລະຂະຫຍາຍຜູ້ຜະລິດໃນຮູບແບບກະສິກຳທີ່ດີໃຫ້ຫຼາຍຂຶ້ນ, ໂຄງການ CLEAN ນີ້ມີໄລຍະເວລາຈັດຕັ້ງປະຕິບັດ 4 ປີ (2018-2021) ໂດຍກໍານົດເອົາ 2 ພື້ນທີ່ຈຸດສຸມການຜະລິດ ພືດເປັນສິນຄ້າຂອງລັດຖະບານຄື: ເຂດພູພຽງບໍລິເວນມີເມືອງປາກຊ່ອງ ແຂວງຈຳປາສັກ, ເມືອງທ່າແຕ່ງ, ແຂວງເຊກອງ ແລະ ເມືອງເລົ່າງາມ ແຂວງສາລະວັນ ແລະ ເຂດທົ່ງພຽງວຽງຈັນມີເມືອງ ໄຊທານີ, ເມືອງປາກງື່ມ, ເມືອງສັງທອງນະຄອນຫຼວງວຽງຈັນ ແລະ ເມືອງວັງວຽງ, ເມືອງກາສີ ແຂວງວຽງຈັນ ໂດຍໄດ້ກໍານົດເອົາ 4 ພືດໃນການພັດທະນາຄື: ຜັກກະລໍ່າປີ, ມັນຕົ້ນ, ກາເຟ ແລະຖົ່ວດາວອິນຄາ.

  ສະເພາະຢູ່ແຂວງສາລະວັນການປູກມັນຕົ້ນແມ່ນເປັນຂະບວນຟົດຟື້ນດີຊຶ່ງເລີ່ມແຕ່ປີ 2013 ເປັນຕົ້ນມາຈາກເນື້ອທີ່ 4 ພັນກວ່າ ເຮັກຕາຜົນໄດ້ຮັບເທົ່າກັບ 1,25 ແສນໂຕນ ແລະມາຮອດປີ 2019 ມີເນື້ອທີ່ 31 ພັນກວ່າເຮັກຕາ ແລະ ຄາດຄະເນຜົນຜະລິດຈະຕົກຢູ່ 6,78 ແສນໂຕນ, ສ່ວນໃຫຍ່ເມືອງທີ່ປູກມີເມືອງເລົ່າງາມ, ລະຄອນເພັງ, ຄົງເຊໂດນ, ວາປີ, ສາລະວັນ ແລະ ເມືອງພູດອຍສ່ວນໜຶ່ງ, ແນວພັນສ່ວນໃຫຍ່ແມ່ນເອົາມາແຕ່ຫວຽດນາມ ແລະ ໄທ, ເປັນແນວພັນກະເສດສາດ, ແນວພັນລະຍອງ ແລະອື່ນໆ, ດ້ານລາຄາປະເພດມັນດິບໃນປີ 2018 ມັນດິບແມ່ນຢູ່ໃນ 700-800 ກີບຕໍ່ກິໂລ ແລະມັນແຫຼ້ງແມ່ນ 1.400-1.500 ກີບຕໍ່ກິໂລ.

  ຈາກນັ້ນທີ່ປະຊຸມກໍໄດ້ມີການປຶກສາຫາລືກັນເປັນຕົ້ນກໍແມ່ນພາບລວມຂອງຕ່ອງໂສ້ການຜະລິດມັນຕົ້ນ ແລະ ສິ່ງທ້າທາຍ, ຄວາມຄືບໜ້າການກະກຽມຫຼັກສູດຝຶກອົບຮົມສຳລັບການຜະລິດກະສິກຳທີ່ດີ ແລະ ການປ້ອງກັນພືດແບບປະສົມປະສານ, ເຕັກນິກການປູກ, ຂັ້ນຕອນການສົ່ງຜົນຜະລິດ, ຜົນກະທົບຕໍ່ສິ່ງແວດລ້ອມ ແລະ ການຄຸ້ມຄອງດິນ,ສ່ິງທ້າທາຍ ແລະໂອກາດຕໍ່ການຂະຫຍາຍຕົວ,ການເຂົ້າເຖິງແຫຼ່ງທຶນທະນາຄານ, ພ້ອມທັງປັດໄຈກະສິກຳ ແລະການບໍລິການຝຸ່ນຊີວະພາບ, ອຸປະ ກອນການປູກ-ເກັບກ່ຽວ, ທຶນຊ່ວຍເຫຼືອລ້າ ແລະ ອື່ນໆເພື່ອຫຼີກເວັ້ນຈາກຄູ່ແຂ່ງ ແລະ ການລົ້ມລະລາຍຂອງມັນຕົ້ນ.

__________

ຂຽນໂດຍ: ສິດຕາ ເພັດວົງສາ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

ບໍລິການໂຄສະນາທາງເຟສບຸກ ແລະເວັບໄຊ

ໂທ: 021 313645, 316511

แชร์