ເປີດໂຄງການສ້າງສະພາບແວດລ້ອມທີ່ເອື້ອອຳນວຍຕໍ່ທຸລະກິດລາວ

  ວັນທີ 12 ທັນວາຜ່ານມາ ໄດ້ມີພິທີເປີດໂຄງການສ້າງສະພາບແວດລ້ອມທີ່ເອື້ອອຳນວຍຕໍ່ທຸລະກິດລາວໂດຍເຂົ້າຮ່ວມຂອງທ່ານ ນາງ ເຂັມມະນີ ພົນເສນາ, ລັດຖະ ມົນຕີກະຊວງອຸດສາຫະກຳ ແລະການຄ້າ, ທ່ານນາງ ຣີນາ ບິດເຕີ ເອກອັກຄະລັດຖະທູດສະຫະລັດອາເມລິກາປະຈໍາ ສປປ ລາວ, ໂຄງການດັ່ງ ກ່າວມີອາຍຸການ 5 ປີ ໄດ້ຮັບການສະໜັບສະໜູນດ້ານງົບປະມານຈາກອົງການພັດທະນາສາກົນປະເທດສະຫະລັດອາເມລິກາ (USAID) ຊຶ່ງເປັນການຮ່ວມມືຫຼ້າສຸດລະຫວ່າງສະຫະລັດອາເມລິກາ ແລະ ສປປ ລາວ ແນໃສ່ຍົກສູງຄວາມອາດສາມາດຂອງພາກເອກະຊົນ ແລະອຳນວຍຄວາມສະດວກທາງ ດ້ານການຄ້າ.

  ທ່ານ ນາງ ຣີນາ ບິດເຕີ ກ່າວວ່າ: ໂຄງການດັ່ງກ່າວເປັນອີກໜຶ່ງຕົວຢ່າງຂອງການຮ່ວມມືທີ່ດີເລີດລະຫວ່າງສະຫະລັດອາເມລິກາ ແລະ ສປປ ລາວ ໃນຂົງເຂດການຄ້າ ແລະການລົງທຶນ, ຮ່ວມກັນໃນການສ້າງອະນາຄົດທີ່ຈະເລີນສຳລັບ ສປປ ລາວ ໂດຍມີການເຕີບໂຕດ້ານເສດຖະກິດທີ່ຍືນຍົງ, ແບບກວມລວມ ແລະກວ້າງຂວາງ.”

  ໂຄງການສ້າງສະພາບແວດລ້ອມທີ່ເອື້ອອຳນວຍຕໍ່ທຸລະກິດລາວຈະສະໜັບສະໜູນການສ້າງຂີດຄວາມສາມາດ ແລະການໃຫ້ຄຳປຶກສາແນໃສ່ຍົກສູງຄວາມອາດສາມາດໃນການແຂ່ງຂັນຂອງວິສາຫະກິດຂະໜາດນ້ອຍ ແລະ ກາງ (SM Es) ຂອງ ສປປ ລາວ ໄປຄຽງຄູ່ກັບການປັບປຸງວຽກງານຈັດຕັ້ງປະຕິບັດນະໂຍບາຍການຄ້າ, ກົດ ໝາຍ ແລະ ລະບຽບດ້ານການຄ້າSMEs ກວມເອົາອັດຕາສ່ວນສູງສຸດຂອງວິສາຫະກິດທັງໝົດ ແລະ ສາມາດສ້າງວຽກເຮັດງານທຳຈຳນວນຫຼາຍຢູ່ ສປປ ລາວ, ໂຄງ ການດັ່ງກ່າວຈະເນັ້ນໃສ່ຂະແໜງອຸດສາຫະກຳ ແລະການບໍລິການທີ່ມີທ່າແຮງດ້ານການເຕີບໂຕ ແລະສ້າງວຽກເຮັດງານທຳສູງ.

  ສະຫະລັດອາເມລິກາມີປະຫວັດການຮ່ວມມືອັນຍາວນານກັບ ສປປ ລາວ ແນໃສ່ພັດທະນາເສດຖະກິດຂອງປະເທດລວມທັງການຊ່ວຍເຫຼືອຜ່ານສອງໂຄງການທີ່ຜ່ານມາຂອງ USAID ເຊັ່ນ: ໂຄງການເຊື່ອມໂຍງສາກົນ ແລະ ອາຊຽນ (LUNA Lao) ແລະ USAID LUNA II, ໃນຊຸມປີຜ່ານມາສະຫະລັດໄດ້ໃຫ້ການສະໜັບ ສະໜູນໃນມູນຄ່າທັງໝົດຫຼາຍກວ່າ 22 ລ້ານໂດລາສະຫະລັດ ແນໃສ່ສ້າງຄວາມເຂັ້ມແຂງດ້ານການພັດທະນາເສດຖະກິດຂອງ ສປປ ລາວ ແລະ ອຳນວຍຄວາມສະ ດວກດ້ານການຄ້າໃນພາກພື້ນ ແລະສາກົນ.

  ນອກຈາກການປັບປຸງສະພາບແວດລ້ອມທີ່ເອື້ອອຳນວຍຕໍ່ທຸລະກິດລາວ ແລະການຂະຫຍາຍການຄ້າແລ້ວສະຫະລັດອາເມລິກາຍັງຮ່ວມມືກັບລັດຖະບານ ແລະ ປະຊາ ຊົນລາວໃນການປັບປຸງຄວາມອາດສາມາດຂອງຈຸນລະວິສາຫະກິດກະສິກຳ, ສ້າງຄວາມເຂັ້ມແຂງດ້ານຫຼັກນິຕິທຳ, ສົ່ງເສີມສຸຂະພາບ ແລະໂພສະນາການ, ຊ່ວຍເຫຼືອຄົນພິການ ແລະພັດທະນາການສຶກສາ.

_____________

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์