ສະຫຼອງງານມະໂຫລານເທສະການກຸດຈີນ

   ໃນລະຫວ່າງວັນທີ 26-27 ມັງກອນຜ່ານມາທີ່ນະຄອນຫຼວງວຽງຈັນສູນວັດທະນາທໍາຈີນປະຈໍາລາວໄດ້ຈັດງານບຸນມະໂຫລານເທສະການກຸດຈີນໂດຍການ ເຂົ້າຮ່ວມຂອງທ່ານ ວັນສີ ກົວມົວ ຫົວໜ້າຫ້ອງການກະຊວງຖະແຫຼ່ງຂ່າວວັດທະນະທໍາ ແລະທ່ອງທ່ຽວ, ທ່ານ ຈ້າວເສິງກ່າງ ທູດທີ່ປຶກສາ ການເມືອງ ສະຖານທູດຈີນປະຈໍາລາວ, ມີຫົວໜ້າພະແນກການເມືອງສະຖານທູດຈີນປະຈໍາລາວ, ບັນດາທູຕະນຸທູດ ແລະແຂກລາວ-ຈີນເຂົ້າຮ່ວມ.

   ການຈັດງານມະໂຫລານເທສະການກຸດຈີນໃນປີນີ້ເປັນປີທີ 5 ຊຶ່ງການສະເຫຼີມສະຫຼອງບຸນກຸດຈີນເປັນປະເພນີສຳຄັນທີ່ສຸດຂອງຊາວຈີນທີ່ສືບທອດກັນມາແຕ່ດົນນານ, ການຈັດງານໃນຄັ້ງນີ້ແມ່ນເພື່ອສືບສານຕາມຮີດຄອງປະເພນີທັງເປັນການຈັດກິດຈະກຳເພື່ອສົ່ງເສີມປີທ່ອງທ່ຽວລາວ-ຈີນ 2019 ໃຫ້ທຸກຄົນທີ່ເຂົ້າມາໄດ້ສໍາຜັດບັນຍາກາດທີ່ຟົດຟື້ນຂອງປີໃໝ່ຈີນໂດຍບໍ່ຕ້ອງໄດ້ເດີນທາງອອກນອກປະເທດ.

   ງານຄັ້ງນີ້, ມີປະກອບມີຫຼາຍກິດຈະກຳແຕກຕ່າງກັນເປັນຕົ້ນແມ່ນການວາງສະແດງຫັດຖະກໍາທີ່ເປັນມໍລະດົກວັດທະນະທໍາຂອງຈີນຄື: ການເປົ່າຕຸກກະຕານໍ້າຕານ, ການສານເຄື່ອງຫ້ອຍນໍາໂຊກ, ຮູບພາບປີໃໝ່, ວາງສະແດງອາຫານຈີນ, ຫຼິ້ນເກມ, ຖາມ-ຕອບເອົາຂອງລາງວັນ, ການສະແດງກາຍະສິນລະດັບສູງທີ່ໜ້າປະທັບໃຈໂດຍນັກສະແດງຈາກຄະນະກາຍະສິນແຂວງເຫີເປີ່ຍພູມລໍາເນົາແຫ່ງກາຍະສິນ, ການສະແດງມວຍຈີນວູຊູທີ່ເຄີຍໄດ້ຮັບລາງວັນຊະນະເລີດລະດັບໂລກ ແລະການສະແດງມາຍາກົນທີ່ໜ້າເຫຼືອເຊື່ອເພື່ອຢັ້ງຢືນອີກຄັ້ງກັບຄໍາເວົ້າທີ່ວ່າ“ກາຍະສິນໃນໂລກໃຫ້ເບິ່ງຈີນ, ການຍະສິນຈີນໃຫ້ເບິ່ງເຫີເປີ່ຍ” ແລະການສະແດງອື່ນໆອີກຫຼາກຫຼາຍລາຍການ.

   ພາຍໃນງານຍັງມີກິດຈະກຳຮ້ອງເພງຕ່າງໆຊຶ່ງແມ່ນນັກຮ້ອງສິລະປິນຂອງລາວ ແລະນັກສຶກສາມາຮ່ວມຮ້ອງເພງ ແລະມີການຈັບສະຫຼາກແຈກຂອງລາງວັນໃຫ້ຜູ້ໂຊກດີທີ່ເຂົ້າຮ່ວມງານເຊັ່ນ: ປີ້ຍົນໄປກັັບຈາກນະຄອນຫຼວງວຽງຈັນຫາເມືອງໃດກໍໄດ້ພາຍໃນ ສປ ຈີນ ແລະຜະລິດຕະພັນໃໝ່ຫຼ້າສຸດຈາກຫົວເຫວີຍ.

แชร์