ເກີດເຫດແຜ່ນດິນໄຫວຢູ່ຟິລິບປິນ ເສຍຊີວິດ 3 ຄົນ

  ເກີດເຫດແຜ່ນດິນໄຫວຮຸນແຮງຢູ່ເກາະມິນດາເນົາ ທາງພາກໃຕ້ຂອງຟິລິບປິນວັດແທກແຮງສັ່ນສະເທືອນໄດ້ 6,8 ຣິກເຕີ ເບື້ອງຕົ້ນມີລາຍງານເສຍຊີວິດຢ່າງໜ້ອຍ 3 ຄົນ.

ຕາມຂ່າວຕ່າງປະເທດລາຍ ງານວ່າ ສຳນັກງານສຳຫຼວດທາງ ທໍລະນີວິທະຍາອາເມລິກາ (ຢູເອສ ຈີເອສ) ລະບຸວ່າ ເກີດເຫດແຜ່ນ ດິນໄຫວຂະໜາດ 6,8 ຣິກເຕີ ໃນ ເວລາ 13 ໂມງ 11 ນາທີ ຂອງວັນທີ 15 ທັນວາທີ່ຜ່ານມາ ຊຶ່ງມີຈຸດສູນ ກາງຢູ່ເລິກລົງໄປໃຕ້ດິນ 28,2 ກິໂລແມັດ ຫ່າງຈາກຕົວເມືອງດາເວົາ ເມືອງໃຫຍ່ສຸດຂອງເກາະມິນດາເນົາ ໄປທາງຕາເວັນຕົກ ສຽງເໜືອປະມານ 61 ກິໂລແມັດ ໂດຍເທື່ອທຳອິດ ຢູເອສຈີເອສ ແຈ້ງວ່າ ກວດສັນຍານແຜ່ນດິນໄຫວຄັ້ງນີ້ໄດ້ 6,9 ຣິກເຕີ ແລະໄດ້ປັບຫຼຸດລົງໃນເວລາຕໍ່ມາ, ທາງດ້ານສູນເຕືອນໄພສຶນາມິປາຊິຟິກແຈ້ງວ່າບໍ່ມີຄື້ນສຶນາມິຈາກແຜ່ນດິນໄຫວໃນຄັ້ງນີ້ຈາກການລາຍງານເບື້ອງຕົ້ນລະບຸວ່າມີຜູ້ເສຍຊີວິດ 3 ຄົນ ລວມທັງເດັກນ້ອຍແມ່ຍິງອາຍຸ 6 ປີ ຊຶ່ງຖືກຫຼັງຄາເຮືອນຫັກທັບໃນເມືອງປາດາດາ ແຂວງດາເວົາ ແລະມີຜູ້ໄດ້ຮັບ ບາດເຈັບອີກ 14 ຄົນ.

  ຄລິບວິດີໂອທີ່ມີການເຜີຍແຜ່ທາງໂຊຊຽວມິເດຍສະແດງໃຫ້ເຫັນສະລອຍນໍ້າຂອງໂຮງແຮມແຫ່ງໜຶ່ງສັ່ນໄຫວ ແລະນໍ້າລົ້ນອອກມາຈາກສະລອຍນໍ້າ ແລະປະຊາຊົນພາກັນແຕກຕື່ນໜີອອກຈາກຈາກຫ້າງຊັບພະສິນຄ້າ ແລະອາຄານສູງ.

------------------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์