ອັດຕະປື ກຽມໃຊ້ແທັກລິສຄຸ້ມຄອງລາຍຮັບ

   ກົມສ່ວຍສາອາກອນສົມທົບກັບສ່ວຍສາອາກອນປະຈຳແຂວງອັດຕະປື ເປີດກອງປະຊຸມເຜີຍແຜ່, ແນະນຳການນຳໃຊ້ລະບົບຂໍ້ມູນຂ່າວສານຄຸ້ມຄອງລາຍຮັບສ່ວຍສາອາກອນແທັກລິສ (TaxRlS) ໃຫ້ແກ່ອົງການຈັດຕັ້ງລັດ ແລະຫົວໜ່ວຍທຸລະກິດທົ່ວແຂວງອັດຕະປື ຂຶ້ນທີ່ຫ້ອງປະຊຸມສຳນັກອົງການປົກຄອງແຂວງໃນວັນທີ 11 ທັນ ວາຜ່ານມາເປັນກຽດເຂົ້າຮ່ວມໂດຍທ່ານນາງ ມີນາ ພອນໄຊສົມພູ ຫົວໜ້າຄະນະຈັດຕັ້ງ ແຂວງອັດຕະປື, ມີຄະນະຮັບຜິດຊອບ (ວິທະຍາກອນ) ຈາກກົມສ່ວຍສາອາ ກອນ, ມີບັນດາຫົວໜ້າ-ຮອງຫົວໜ້າຈາກພະແນກ, ອົງການທຽບເທົ່າອ້ອມຂ້າງແຂວງຕະຫຼອດຮອດຫົວໜ່ວຍທຸລະກິດທົ່ວແຂວງ ແລະ ພາກສ່ວນທີ່ກ່ຽວຂ້ອງເຂົ້າ ຮ່ວມ 80 ກ່ວາຄົນ.

  ທ່ານ ນາງ ມີນາພອນ ໄຊສົມພູ ໃຫ້ກຽດຂຶ້ນມີຄຳເຫັນ ແລະ ກ່າວເປີດກອງປະຊຸມວ່າ: ຄະນະພັກ, ຄະນະການນຳແຂວງພວມຂຸ້ນຂ້ຽວປະຕິບັດໃນໄລຍະທ້າຍສະໄໝຂອງແຜນການພັດທະນາເສດຖະກິດ-ສັງຄົມ 5 ປີ ຄັ້ງທີ Vlll 2016-2020 ກໍຄືແຜນງົບປະມານແຫ່ງລັດປະຈຳປີ 2019 ໃຫ້ໄດ້ຕາມແຜນການທີ່ກໍານົດໄວ້, ເພື່ອຫັນວຽກງານການຄຸ້ມຄອງລາຍຮັບສ່ວຍສາອາກອນເປັນທັນສະໄໝຕາມແຜນຍຸດທະສາດຂອງກະຊວງການເງິນ ແລະ ວຽກງານຫັນເປັນທັນສະໄໜຂອງສ່ວຍສາອາກອນເພື່ອອໍານວຍຄວາມສະດວກໃນການແຈ້ງ-ມອບອາກອນຂອງຜູ້ເສຍອາກອນໃຫ້ນັບມື້ດີຂຶ້ນ ແລະ ທຽບເທົ່າກັບສາກົນ, ປັບປຸງກົນໄກການແຈ້ງມອບໃຫ້ທຸກຄົນຊັ້ນຄົນທຸກຊົນເຜົ່າໄດ້ຮັບຄວາມຍຸຕິທຳຕາມກົດໜາຍ.

ສະໜັບສະໜຸນໂດຍ: HONDA

  ມາຮອດປະຈຸບັນມີການນໍາໃຊ້ລະບົບດັ່ງກ່າວຢູ່ກົມສ່ວຍສາອາກອນ, ສ່ວຍສາອາກອນປະຈຳ 15 ແຂວງ (ຍັງພຽງແຕ່ 3  ແຂວງພາກໃຕ້ທີ່ຍັງບໍ່ທັນໄດ້ນຳໃຊ້) ສຳລັບແຂວງອັດຕະປືແມ່ນຈະເປີດການນຳໃຊ້ລະບົບຂໍ້ມູນຂ່າວສານຄຸ້ມຄອງເກັບລາຍຮັບສ່ວຍສາອາກອນແທັກລິສ (TaxRlS) ນັບແຕ່ເດືອນມັງກອນ 2020 ເປັນຕົ້ນໄປ.

 ທ່ານ ວົງສະຫັວນ ເດດວົງສາ ຮອງຫົວໜ້າພະແນກເຕັກໂນໂລຊີ-ຂໍ້ມູນຂ່າວສານໄດ້ແນະນຳການນຳໃຊ້ລະບົບຂໍ້ມູນຂ່າວສານຄຸ້ມຄອງລາຍຮັບສ່ວຍສາອາກອນແທັກລິສ (TaxRlS )ໃຫ້ແກ່ອົງການຈັດຕັ້ງລັດ ແລະ ຫົວໜ່ວຍທຸລະກິດທົ່ວແຂວງອັດຕະປືຊຶ່ງທ່ານໃຫ້ຮູ້ວ່າ: ລະບົບຂໍ້ມູນຂ່າວສານຄຸ້ມຄອງລາຍຮັບສ່ວຍສາອາກອນ ແທັກລິສ (TaxRlS ) ແມ່ນຈະໄດ້ສ້າງຄວາມສະດວກສະບາຍໃຫ້ແກ່ອົງການຈັດຕັ້ງລັດ ແລະທຸລະກິດສາມາດແຈ້ງອາກອນດ້ວຍຕົນເອງຜ່ານລະບົບອິນເຕີເນັດຊຶ່ງສາມາດແຈ້ງອາກອນໄດ້ໃນທຸກສະຖານທີ່ຖ້າມີສັນຍານອິນເຕີເນັດໂດຍບໍ່ຕ້ອງມາຫາປ່ອງບໍລິການຂອງສ່ວຍສາອາກອນຊຶ່ງຄຸນປະໂຫຍດຂອງການແຈ້ງຜ່ານລະບົບດັ່ງກ່າວມີຫຼາຍຢ່າງເຊັ່ນ: ມີຄວາມສະດວກ, ວ່ອງໄວ, ຫຼຸດຈໍານວນພະນັກງານ, ປະຍັດເວລາ ແລະຄ່າທຳນຽມຕ່າງໆ, ທີ່ສຳຄັນບໍລິການ 24 ຊົ່ວໂມງບໍ່ເວັ້ນວັນລັດຖະການ.

  ຈຸດປະສົງແມ່ນເພື່ອຫັນເອົາການຄຸ້ມຄອງເກັບລາຍຮັບສ່ວຍສາອາກອນປະເພດຕ່າງໆ ເຂົ້າສູ່ລະບົບແທັກລິສ (TaxRlS ) ຕາມຍຸດທະສາດພັດທະນາການເງິນແຫ່ງລັດຮອດປີ 2025 ເພື່ອກ້າວສູ່ລະບົບຄຸ້ມຄອງການເງິນແຫ່ງລັດໃຫ້ມີຄວາມເຂັ້ມແຂງ, ໂປ່ງໃສ, ທັນສະໄໝ ແລະຍຸຕິທຳ, ພ້ອມນີ້ກໍ່ໄດ້ເປັນການສ້າງເງື່ອນໄຂອຳນວຍຄວາມສະດວກໃຫ້ແກ່ຫົວໜ່ວຍທຸລະກິດໃນການແຈ້ງ ແລະຊຳລະພັນທະອາກອນຜ່ານລະບົບທະນາຄານແບບງ່າຍດາຍລະບົບແທັກລິສ (TaxRlS ) ແນ່ໃສ່ເຮັດໃຫ້ຫຼຸດຜ່ອນຂັ້ນຕອນຕ່າງໆລົງທັງປະຢັດເວລາ ແລະ ຄ່າໃຊ້ຈ່າຍຕ່າງໆຂອງຜູ້ປະກອບການ, ພ້ອມທັງເປັນການຮັບປະກັນການຮົ່ວໄຫຼລາຍຮັບງົບປະມານແຫ່ງລັດຂຶ້ນຕື່ມອີກ.

__________

ຂຽນໂດຍ: ຫຼວງອາໄພ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

 

แชร์