ນວ ຈະເປິດໃຊ້ຊົນລະປະທານທຸກແຫ່ງດພື່ອສະໜອງການຜະລິດ

ເພື່ອເຮັດໃຫ້ການຜະລິດລະດູແລ້ງຂອງນະຄອນຫຼວງວຽງຈັນບັນລຸໄດ້ຕາມແຜນການໃນເນື້ອທີ່ສູ້ຊົນທັງໝົດ 15.650 ເຮັກຕາໃນນີ້ເນື້ອທີ່ປູກເຂົ້ານາແຊງ 14.300 ເຮັກຕາ ແລະທີ່ປູກພືດ 1.350 ເຮັກຕາ,ພະແນກກະສິກຳ ແລະປ່າໄມ້ນະຄອນຫຼວງວຽງຈັນ (ນວ) ຈະເປີດນຳໃຊ້ຊົນລະປະທານທັງໝົດ 84 ແຫ່ງ ມາຮອດປະຈຸ ບັນໄດ້ເປີດແລ້ວ 32 ແຫ່ງ ຈາກຊົນລະປະທານທັງໝົດ 84 ແຫ່ງ ສ່ວນທີ່ຍັງເຫຼືອແມ່ນກໍາລັງປັບປຸງສ້ອມແປງຊຶ່ງຄາດວ່າຈະສືບຕໍ່ເປີດໃຫ້ສໍາເລັດໃນເດືອນທັນວານີ້.

  ທ່ານ ສຸວັນ ຂັນທະວົງ ຮອງ ຂະແໜງຊົນລະປະທານພະແນກກະສິກໍາ ແລະ ປ່າໄມ້ນະຄອນຫຼວງວຽງຈັນໃຫ້ຮູ້ວ່າ: ທົ່ວນະຄອນຫຼວງວຽງຈັນມີຊົນລະປະທານທັງ ໝົດ 84 ແຫ່ງ, ມາຮອດປະຈຸບັນໄດ້ເປີດນ້ຳຊົນລະປະທານ 32 ແຫ່ງ, ສ່ວນທີ່ຍັງເຫຼືອແມ່ນຢູ່ຂັ້ນຕອນການປັບປຸງສ້ອມແປງຊຶ່ງຄາດວ່າຈະສືບຕໍ່ເປີດໃຫ້ສຳເລັດພາຍໃນເດືອນທັນວາ 2019, ທັງນີ້ກໍເພື່ອສະໜອງນ້ຳຊົນລະປະທານໃຫ້ເນື້ອທີ່ການຜະລິດລະດູແລ້ງສົກປີ 2019-2020 ຕາມແຜນສູ້ຊົນໃນເນື້ອທີ່ທັງໝົດ 15.650 ເຮັກຕາໃນນີ້ເນື້ອທີ່ເຂົ້ານາແຊງ 14.300 ເຮັກຕາ ແລະ ເນື້ອທີ່ປູກ ພືດ 1.350 ເຮັກຕາ, ຊຶ່ງປີນີ້ການຜະລິດພົບບັນຫາຍ້ອນແຫຼ່ງນ້ຳທີ່ ນຳໃຊ້ເຂົ້າໃນການຜະລິດມີນ້ຳຂອງ ແລະ ນ້ຳງື່ມໄດ້ບົກແຫ້ງໄວຜິດປົກກະຕິກວ່າປີຜ່ານມາ.

ສະໜັບສະໜຸນໂດຍ: HONDA

  ແນວໃດກໍຕາມຂະແໜງຊົນລະປະທານກໍຄືພະແນກກະສິກຳ ແລະປ່າໄມ້ນວກໍບໍ່ໄດ້ລົດລະໃນເມື່ອມີສະພາບນ້ຳບົກແຫ້ງແລ້ງຄືແນວນັ້ນກໍໄດ້ມີວິທີແກ້ໄຂໂດຍສະເພາະໄດ້ສົມທົບກັບອຳນາດການປົກຄອງທ້ອງຖິ່ນ ແລະ ປະຊາຊົນກຸ່ມຜູ້ນຳໃຊ້ນ້ຳລະດົມຊອກທ່າແຮງທາງອອກດ້ວຍການຂຸດເປັນຜົ້ງເກັບນ້ຳ ຕໍ່ທໍ່ລົງໄປໃສ່ໃຫ້ສາມາດດູດນ້ຳຂຶ້ນມາໄດ້ຄືນ້ຳງື່ມໄດ້ແກ້ໄຂແບບນີ້ 3 ສະຖານີຄື ສະຖານີນາກຸງ-ທົ່ງມັ່ງ ສະຖານີນາບົງ- ໂຄກສາ ແລະ ສະຖານີນາພອກ-ດົງບັງທີ່ໄດ້ຂຸດເປັນຜົ້ງຢູ່ກາງນ້ຳງື່ມແລ້ວຕໍ່ທໍ່ຕໍ່ສາຍໄຟຟ້າໄປໃສ່ສາມາດມີຄວາມພ້ອມສະໜອງນ້ຳໃຫ້ເນື້ອທີ່ການຜະລິດໄດ້ 100%, ສ່ວນນ້ຳຂອງທີ່ມີການບົກແຫ້ງບໍ່ຫຼາຍກວ່ານ້ຳງື່ມກໍມີການແກ້ໄຂໃຫ້ທັນການດ້ວຍການຕໍ່ທໍ່ເຫຼັກລົງໄປຫາກາງນ້ຳຂອງສາມາດແກ້ໄຂໄດ້.

ນອກຈາກນີ້ ຂະແໜງຊົນລະປະທານຍັງໄດ້ສ້າງຂະບວນການອະນາໄມຄອງເໝືອງໄດ້ເກືອບ 30 ກິໂລແມັດ ໃນນັ້ນອະນາໄມດ້ວຍແຮງງານຄົນໄດ້ 9 ກິໂລແມັດ ແລະ ອະນາໄມດ້ວຍກົນຈັກ 20 ກິໂລແມັດ ຊຶ່ງການອະນາໄມດ້ວຍ ກົນຈັກຂະແໜງຊົນລະປະທານໄດ້ລະດົມຜູ້ປະກອບການຊ່ວຍກົນຈັກ ແລະປະຊາຊົນກຸ່ມຜູ້ນຳໃຊ້ນ້ຳເປັນຜູ້ສົມທົບນ້ຳມັນລົດພ້ອມນີ້ຍັງຈະສືບຕໍ່ຊຸກຍູ້ປະຊາຊົນອະນາໄມຄອງເໝືອງຂັ້ນສາມ ແລະ ຄອງຫົດດ້ວຍແຮງງານຄົນຈຸດທີ່ຍັງບໍ່ທັນສຳເລັດອີກດ້ວຍ.

__________

ຂຽນໂດຍ: ນໍ້າເໝີຍ   
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

 

 

แชร์