ຜະລິດຕະພັນຊາບູຮານລາວລີ ຮັບລາງວັນຊາອິນຊີລະດັບສາກົນ

 ການປຸງແຕ່ງຜະລິດຕະພັນກະສິກຳອິນຊີແມ່ນການປຸງແຕ່ງທີ່ໃຊ້ວັດຖຸດິບກະສິກຳທີ່ນຳມາປຸງແຕ່ງກໍແມ່ນວັດຖຸດິບທີ່ຜະລິດໂດຍອາໄສການເກື້ອກູນຈາກທຳມະຊາດບໍ່ມີການໃຊ້ປຸ໋ຍ ແລະ ສານເຄມີ, ບໍ່ມີການຕັດຕໍ່ດັດແປງພັນທຸກຳຂອງພືດພັນເນັ້ນພືດທ້ອງຖິ່ນຊຶ່ງການປຸງແຕ່ງແມ່ນບໍ່ໃຊ້ສານເຄມີໃດໆໃຊ້ຕົ້ນທຶນການຜະລິດຕໍ່າ, ເຮັດໃຫ້ຜູ້ຜະລິດ, ຜູ້ບໍລິໂພກມີຄວາມປອດໄພ ແລະປາສະຈາກສານເຄມີ, ປະຈຸບັນຄວາມຕ້ອງການຜະລິດຕະພັນອິນຊີຍັງມີການເຕີບໂຕຢ່າງຕໍ່ເນື່ອງທັງພາຍໃນ ແລະ ສາກົນຊຶ່ງຜູ້ບໍລິໂພກມີຄວາມກັງວົນເພີ່ມຂຶ້ນກ່ຽວກັບຄວາມປອດໄພຂອງອາຫານຢູ່ໃນ ສປປ ລາວ ແລະ ປະເທດເພື່ອນບ້ານຄຽງຄູ່ກັບນະໂຍບາຍຂອງ ສປປ ລາວ ກ່ຽວກັບການຜະລິດກະສິກຳສະອາດຖືເປັນຈຸດໃຈກາງໃນການຂັບເຄື່ອນຂະແໜງການກະສິກຳໃຫ້ໄປສູ່ຄວາມຍືນຍົງທາງດ້ານການຜະລິດ, ການປຸງແຕ່ງ ແລະການສົ່ງເສີມໃຫ້ມີຈັນ ຍາບັນໃນການຜະລິດອາຫານທີສະອາດ ແລະປອດໄພຕໍ່ແນວທາງດັ່ງກ່າວທັງອົງການປົກຄອງຂອງແຂວງຜົ້ງສາລີສົມທົບກັບພາກສ່ວນກ່ຽວຂ້ອງໄດ້ລົງຊຸກຍູ້ປະຊາຊົນ, ຜູ້ປະກອບການສົ່ງເສີມການປູກ ແລະປຸງແຕ່ງຊາຢູພາຍໃນແຂວງໃຫ້ຫັນໄປສູ່ການຜະລິດແບບມາດຕະຖານອິນຊີທີ່ສະອາດ.

 ໂຮງງານປຸງແຕ່ງຊາແສງຄຳລາວລີກໍ່ແມ່ນໂຮງງານໜຶ່ງທີ່ປະຕິບັດຕາມມາດຕະຖານການຜະລິດອິນຊີປອດສານພິດຈຶ່ງເຮັດໃຫ້ຜະລິດຕະພັນຊາບູຮານລາວລີຈາກໂຮງ ງານໄດ້ຮັບລາງວັນຊະນະເລີດໃນການແຂ່ງຂັນຊາສາກົນ 2019 ທີ່ຮົງກົງໂດຍມີຊາຈາກ 57 ປະເທດເຂົ້້າຮ່ວມແຂງຂັນ.

  ໂຮງງານໄດ້ປະຕິບັດຢ່າງເຂັ້ມງວດກ່ຽວກັບການປຸງແຕ່ງຜະລິດຕະພັນຊາອິນຊີໂດຍພາຍໃຕ້ການຄຸ້ມຄອງ ແລະກວດສອບຜະລິດຕະພັນຈາກຂະແໜງການທີ່ກ່ຽວຂ້ອງໂດຍເບື້ອງຕົ້ນປີ 2010 ແມ່ນເຮັດເປັນພຽງທຸລະກິດແບບຄອບຄົວໂດຍໃຊ້ແຮງງານຂອງສະມາຊິກຄອບຄົວຕົນເອງ 6 ຄົນ ປະສົມປະ ສານກັບການປະກອບການຂ້າສັດສະໜອງຊີ້ນໃຫ້ຕະຫຼາດເທສະບານເມືອງຜົ້ງສາລີ ແລະ ມາຮອດປີ 2014 ເຫັນວ່າຄວາມຕ້ອງການຜະລິດຕະພັນເພີ່ມຂຶ້ນ ທ່ານ ແສງ ຄຳ ລາວລີຈຶ່ງໄດ້ລົງທຶນຊື້ດິນຢູ່ແຄມເສັ້ນທາງເຂດບ້ານຈ່າພູລະຫວ່າງທາງໄປສວນຊາ 400 ປີ ຫ່າງຈາກເທສະບານເມືອງຜົ້ງສາ ລີ 6 ກິໂລແມັດ ເພື່ອສ້າງເປັນໂຮງງານປຸງແຕ່ງຊາ ແລະສ້າງເປັນຜະລິດຕະພັນຊາເປັນຂອງຕົນເອງໂດຍໃສ່ຊື່ວ່າຊາບູຮານລາວລີ.

ສະໜັບສະໜຸນໂດຍ: HONDA

 ການປຸງແຕ່ງຊາອິນຊີປອດສານພິດຂອງໂຮງງານປຸງແຕ່ງຊາແສງຄຳລາວລີແມ່ນນຳໃຊ້ແຮງງານຂອງພະນັກງານປະສົມປະສານກັບເຄື່ອງຈັກທີ່ທັນສະໄໝມີພະນັກງານປະຈຳ 5 ຄົນ ແລະ ໃນໄລຍະລະດູການເກັບຊາທີ່ມີຊາປົ່ງຫຼາຍກໍຈະຈ້າງແຮງງານມາເສີມຕື່ມອີກ 20-25 ຄົນ, ການປຸງແຕ່ງຕາມມາດຕະຖານຜະລິດຕະພັນອິນຊີນັ້ນແມ່ນເລີ່ມຈາກການຄັດເລືອກເກັບຊື້ຍອດຊາຈາກປະຊາຊົນໃນບ້ານເປົ້້າໝາຍທີ່ມີສວນຊາ 400 ກວ່າປີ ແລະ ຊານ້ອຍທີ່ເປັນຕະກຸນແນວພັນຊາ 400 ປີ ທີມີການປູກ ແລະ ບົວລະບັດຮັກສາດ້ວຍຂະບວນການທາງທຳມະຊາດແບບດັ່ງເດີມທີ່ປອດສານເຄມີເປັນຕົ້ນແມ່ນເກັບຊື້ຊາຈາກປະຊາຊົນບັນດາເຜົ່າເຂດບ້ານລຸ້ງຈິງ, ບ້ານກໍ່ແດງ, ບ້ານພະຍາສີ, ບ້ານບໍ່ກົ້ງ, ບ້ານນໍ້າແລ້ງ ແລະ ບ້ານອື່ນໆຂອງເມືອງຜົ້ງສາລີໃນລາຄາລະດູການເກັບຍອດຊາແຕ່ເດືອນກຸມພາຫາເດືອນເມສາຊາໃຫຍ່ຊື້ໃນລາຄາ 50-60 ພັນກີບຕໍ່ກິໂລກຣາມ, ຊານ້ອຍ 10 -15  ພັນກີບຕໍ່ກິໂລກຣາມ; ສ່ວນລະດູຝົນເດືອນພຶດສະພາຫາເດືອນທັນວາແມ່ນຊື້້ໃນລາຄາຊາໃຫຍ່ 10-15 ພັນກີບຕໍ່ກິໂລກຣາມ ແລະຊານ້ອຍແມ່ນຊື້ 6 ພັນກີບ ຕໍ່ກິໂລກຣາມ.

 ຜະລິດຕະພັນຊາບູຮານລາວລີຈະບັນຈຸຫຸ້ມຫໍ່ເປັນກ໋ອງ, ເປັນຊອງ, ຫໍ່, ກ້ອນ ແລະແທ່ງທີ່ມີນໍ້າໜັກແຕ່ 100 ກຣາມ, 200 ກຣາມ, 350 ກຣາມ, 500 ກຣາມ ແລະ 1 ກິໂລກຣາມໂດຍແບ່ງມີ 8 ປະເພດຜະລິດຕະພັນຄື: ຊາຕົ້ນໃຫຍ່ຊາບູຮານລາວລີ 400 ປີ (ປະເພດຊາແດງ ແລະປະເພດຊາຂຽວ); ຊາແສງຄຳລາວລີ 400 ປີ (ປະເພດຊາແດງ ແລະ ປະເພດ ຊາຂຽວ); ຊາບັ້ງບູຮານລາວລີ 400 ປີ (ປະເພດຊາແດງ ແລະ ປະເພດຊາຂຽວ); ຊາແທ່ງບູຮານລາວລີ 400 ປີ (ປະເພດຊາແດງ ແລະ ປະເພດຊາຂຽວ); ຊາກ໋ອງຊາບູຮານລາວລີ 400 ປີ (ປະເພດຊາແດງ ແລະ ປະເພດຊາຂຽວ); ສຳລັບຊາຕົ້ນນ້ອຍມີຊາກ໋ອງຊາແສງຄຳລາວລີ (ປະເພດຊາແດງ ແລະປະເພດຊາຂຽວ)ນອກນີ້ຍັງມີຜະລິດຕະພັນຊາບັ້ງປະລິມານ 1 ກິໂລກຣາມຂຶ້ນໄປ ແລະຊາບັ້ງນ້ອຍທີ່ພີ່ນ້ອງປະຊາຊົນປຸງແຕ່ງເອງນຳມາຈຳໜ່າຍຕື່ມອີກ.

  ໂດຍຜະລິດຕະພັນຊາອິນຊີຂອງໂຮງງານແສງຄຳລາວລີນອກຈາກຈຳໜ່າຍຊາສຳເລັດຮູບຢູ່ຮ້ານຈຳໜ່າຍຊາຕ່າງໆພາຍໃນແຂວງແລ້ວຍັງມີຮ້ານຈຳໜ່າຍຊາຢູ່ເທສະບານເມືອງໄຊ ແຂວງອຸດົມໄຊ, ສົ່ງຂາຍນະຄອນຫຼວງພະບາງ, ນະຄອນຫຼວງວຽງຈັນ ແລະສົ່ງອອກຊາສຳເລັດຮູບ ແລະຊາແຫ້ງໄປ ສປ ຈີນ, ໄທ, ມຽນມາ ແລະ ປະເທດອ່ືນອີກຈຳນວນໜຶ່ງ, ໂດຍລາຄາຂາຍຢູ່ໂຮງງານແມ່ນ 25-30 ພັນກີບຕໍ່ຜະລິດຕະພັນ.

  ໂດຍໄລຍະປີ 2019 ຜ່ານມາທ່ານ ແສງຄຳ ລາວລີ ບອກວ່າໂຮງງານຂອງລາວໄດ້ລົງທຶນເກັບຊື້ຍອດຊາດິບຈາກປະຊາຊົນ ແລະ ປຸງແຕ່ງເປັນຜະລິດຕະພັນຊາອິນຊີ ເຖິງ 2,5 ຕື້ກີບ ແລະ ສາມາດສ້າງລາຍຮັບໄດ້ 3 ຕື້ກວ່າກີບ ຫັກຕົ້ນທຶນການຜະລິດອອກແມ່ນມີກຳໄລ 800 ລ້ານກີບຕໍ່ປີ, ນອກນີ້ແລ້ວ ໂຮງງານຊາຂອງລາວຍັງປະກອບສ່ວນໃນການລຶບລ້າງຄວາມທຸກຍາກຂອງປະຊາຊົນ ແລະເຮັດໃຫ້ປະຊາຊົນຜູ້ທີ່ເຮັດສວນຊາມີລາຍຮັບດີຂຶ້ນຊຶ່ງຄອບຄົບຂອງພໍ່ເຖົ້າເສັດ ແລະແມ່ເຖົ້າຈັນປະຊາ ຊົນທີເຮັດສວນຊາບ້ານລຸງຈິງນຳຍອດຊາມາຂາຍສະໜອງເຂົ້້າໂຮງງານ ຊາແສງຄຳ ລາວລີ ມີລາຍຮັບຈາກການຂາຍຊາປີ 2019 ຜ່ານມາໄດ້ເຖິງ 60 ລ້ານກີບຕໍ່ປີ.

  ໃນຕໍ່ໜ້ານີ້ໂຮງງານປຸງແຕ່ງຊາແສງຄຳລາວລີຈະສືບສົ່ງເສີມປະຊາຊົນໃນບ້ານເປົ້າໝາຍບົວລະບັດສວນຊາຕາມມາດຕະຖານກະສິກຳອິນຊີ  ແລະ ເກັບຊື້ຍອດຊາ ແລະ ປຸງແຕ່ງຜະລິດຕະພັນຊາອີນຊີໃຫ້ຫຼາຍຂຶ້ນກວ່າເກົ່າ ແລະ ກຽມການໄປເຊັນສັນຍາກັບບໍລິສັດລາວກວາງຊີສາກົນເພື່ອສົ່ງອອກຊາຂອງໂຮງງານໄປໃນປະເທດຕ່າງໆໃນທົ່ວໂລກ.

ສະໜັບສະໜຸນໂດຍ: HONDA

  ສິ່ງດັ່ງກ່າວຈຶ່ງເຮັດໃຫ້ໂຮງງານປຸງແຕ່ງຊາອິນຊີປອດສານພິດໄດ້ຮັບລາງວັນລະດັບຊາອິນຊີສາກົນ ປີ 2019 ທີ່ຮົງກົງທີ່ເປັນຕົວແບບຍົກສູງການຜະລິດກະສິກຳຂອງແຂວງຜົ້ງສາລີກໍຄືຂອງລາວສູ່ລະດັບສາກົນ ແລະ ເພີ່ມຄຸນຄ່າຂອງຜະລິດຕະພັນຊາຂອງລາວໃຫ້ສູງຂຶ້ນໂດຍຜ່ານການປຸງແຕ່ງທີ່ຖືກວິທີຕາມມາດຕະຖານຜະລິດຕະພັນຊາອິນຊີຂອງໂຮງງານປຸງແຕ່ງຊາແສງຄຳລາວລີ.

__________

ຂຽນໂດຍ: ສົມຄິດ ແກ້ວນວນລາ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

ບໍລິການໂຄສະນາທາງເຟສບຸກ ແລະເວັບໄຊ

ໂທ: 021 313645, 316511

 

แชร์