ສະແດງສຽງແຄນເຊື້ອຊາດລາວ ມໍລະດົກໂລກ

  ງານສະແດງສິລະປະວັດທະນະທຳ “ສຽງແຄນເຊື້ອຊາດລາວມໍລະດົກໂລກ”ເພື່ອສະເຫຼີມສະຫຼອງວັນເກີດປະທານ ໄກສອນ ພົມວິຫານ ຄົບຮອບ 99 ປີໄດ້ຈັດຂຶ້ນໃນຄໍ່າຄືນວັນທີ 13 ທັນວາ ຜ່ານມາ,ທີ່ຫໍວັດທະນະທຳແຫ່ງຊາດໂດຍໃຫ້ກຽດເຂົ້າຮ່ວມຂອງທ່ານ ພັນຄຳ ວິພາວັນ ຮອງປະທານປະເທດ, ທ່ານ ໄຊສົມພອນ ພົມວິຫານ ປະທານສູນກາງແນວລາວສ້າງຊາດ, ພ້ອມດ້ວຍການນຳຂັ້ນສູງ, ພະນັັກງານທະຫານ, ຕຳຫຼວດ, ນັກຮຽນ, ນັກສຶກສາ ແລະມວນຊົນເຂົ້າຮ່ວມຊົມຢ່າງຫຼວງຫຼາຍ.

   ທ່ານ ກິແກ້ວ ໄຂຄຳພິທູນ ລັດຖະມົນຕີກະຊວງຖະແຫຼ່ງຂ່າວ, ວັດທະນະທຳ ແລະທ່ອງທ່ຽວ (ຖວທ) ໄດ້ເປັນກຽດກ່າວເປີດງານວ່າ: ແຄນ ແລະສຽງແຄນລາວທີ່ເປັນມໍລະດົກວັດທະນະທຳອັນລໍ້າຄ່າຕິດພັນກັບວິຖີຊີວິດຂອງຄົນລາວຊຶ່ງໄດ້ຕົກທອດກັນມາ 3.000 ກວ່າປີ,ປະທານ ໄກສອນ ພົມວິຫານ ເປັນຜູ້ນຳສູງສຸດທີ່ໄດ້ໃຫ້ຄວາມສຳຄັນເປັນພິເສດຕໍ່ການອະນຸລັກຮັກສາ ແລະ ເສີມຂະຫຍາຍມູນມໍລະດົກດັ່ງກ່າວ, ເພິ່ນເປັນຜູ້ມີຄວາມຮູ້ຄວາມສາມາດ ແລະ ມີຄວາມຊຳນານໃນການນຳໃຊ້ ແຄນ, ເປົ່າແຄນ-ດ່ຽວແຄນໂດຍສະເພາະການເປົ່າແຄນຂັບລຳຄອນສະຫວັນເປັນຕົ້ນ, ຍ້ອນເຫດຜົນດັ່ງກ່າວ, ກະຊວງ ຖວທ ຈຶ່ງອະນຸຍາດໃຫ້ເອົາວັນເກີດຂອງປະ ທານ ໄກສອນ ພົມວິຫານ ໃນໂອກາດໝູນວຽນຄົບຮອບ 85 ປີ (13 ທັນວາ 2005) ເປັນມື້ສ້າງຕັ້ງ ສະໂມສອນແຄນລາວ-ໜໍ່ແໜງ ຂອງສະມາຄົມແຄນລາວໃນປະຈຸບັນ.

 ນັບແຕ່ນັ້ນເປັນຕົ້ນມາສະໂມສອນແຄນລາວໄດ້ຕັ້ງໜ້າພະຍາຍາມເຕົ້າໂຮມນັກສິລະປິນໝໍແຄນ, ໝໍຂັບ, ໝໍລຳ, ຊ່າງແຄນ ແລະຈັດຕັ້ງການສອບເສັງການເປົ່າແຄນ, ການເຮັດແຄນທົ່ວປະເທດມາແລ້ວ 3 ຄັ້ງ, ພ້ອມກັນນີ້, ສະໂມສອນແຄນລາວກໍ່ໄດ້ມີຄວາມພະຍາຍາມຮ່ວມກັບພາກສ່ວນທີ່ກ່ຽວຂ້ອງຂອງກະຊວງຕ່າງໆຄົ້ນຄວ້າ, ສະ ເໜີໃຫ້ອົງການອຸຍເນສສະໂກ ຈົດທະບຽນແຄນລາວ ເປັນມໍລະດົກໂລກ ແລະໃນວັນທີ 7 ທັນວາ 2017 ອົງການສະຫະປະຊາຊາດເພື່ອການພັດທະນາ-ອຸຍແນັດສະໂກໄດ້ອະນຸຍາດຈົດທະບຽນເອົາສຽງແຄນເຊື້ອຊາດລາວເປັນມໍລະດົກນາມມະທຳຂອງມວນມະນຸດໂລກ.

ສະໜັບສະໜຸນໂດຍ: HONDA

  ສໍາລັບງານຄັ້ງນີ້ແມ່ນຈັດຂຶ້ນໂດຍສະມາຄົມສິລະປະແຄນລາວຮ່ວມກັບກົມສິລະປະການສະແດງ ກະຊວງຖະແຫຼງຂ່າວວັດທະນະທຳ ແລະທ່ອງທ່ຽວ ແລະ ກອງເລຂາແຫ່ງຊາດເພື່ອອຸຍເນສໂກກະຊວງສຶກສາທິການ ແລະກີລາ,ທັງນີ້ກໍເພື່ອສະເຫຼີມສະຫຼອງວັນຄ້າຍວັນເກີດຂອງປະທານໄກສອນພົມວິຫານ ຄົບຮອບ 99 ປີ ແລະ ເປັນການປຸກລະດົມຂະບວນການເພື່ອເຂົ້າຮ່ວມງານມະໂຫລານສຽງແຄນເຊື້ອຊາດລາວມໍລະດົກໂລກທົ່ວປະເທດ ປີ 2020 ເພື່ອສະເຫຼີມສະຫຼອງວັນຊາດທີ 2 ທັນວາ ຄົບ ຮອບ 44 ປີ, ເພື່ອສະເຫຼີມສະຫຼອງວັນສ້າງຕັ້ງສະມາຄົມສິລະປະແຄນລາວຄົບຮອບ 14 ປີ ແລະຄົບຮອບ 2 ປີ ທີ່ສຽງແຄນເຊື້ອຊາດລາວເປັນມໍລະດົກໂລກ, ພ້ອມກັນ

ນີ້ກໍເປັນການຊຸກຍູ້ປຸກລະດົມຂະບວນການສ້າງຜົນງານຂໍ່ານັບຮັບຕ້ອນກອງປະຊຸມໃຫຍ່ອົງຄະນະພັກ 3 ຂັ້ນ ແລະ ກອງປະຊຸມໃຫຍ່ຄັ້ງທີ XI ຂອງພັກປະຊາຊົນປະຕິ ວັດລາວ, ເພື່ອເປັນການປຸກລະດົມກຳລັງໃຈຂອງຂະບວນການສິລະປະວັດທະນະທຳແຄນລາວ, ເຕົ້າໂຮມໝໍແຄນ, ໝໍຂັບ, ໝໍລຳ, ຊ່າງແຄນເພື່ອພ້ອມກັນອະນຸລັກຮັກ ສາ ແລະເສີມຂະຫຍາຍມູນມໍລະດົກແຄນລາວ,ປົກປັກຮັກສາ ແລະເສີມຂະຫຍາຍສຽງແຄນເຊື້ອຊາດລາວມໍລະດົກໂລກໃຫ້ຍືນຍົງຢູ່ກັບຄົນລາວ ແລະຊາດລາວຕະຫຼອດໄປ.

-------------------------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์