ນ້ອງນັກຮຽນ ແລະປະຊາຊົນ 4 ບ້ານ ເມືອງຫົງສາ ໄດ້ຮັບເຄື່ອງນຸ່ງກັນໜາວ

 ໃນວັນທີ 15 ທັນວາ ຜ່ານມາ ທ່ານນາງ ບົວຈັນ ປໍສະຫວັດດີ ພະນັກງານບຳນານພະແນກສຶກສາທິການ ແລະກີລາແຂວງໄຊຍະບູລີພ້ອມດ້ວຍຄອບຄົວໄດ້ນຳເອົາເຄື່ອນຸ່ງຫົ່ມກັນໜາວມາມອບໃຫ້ນ້ອງນັກຮຽນ, ຄູ-ອາຈານ ແລະປະຊາຊົນບ້ານແກ້ງແອນ, ບ້ານທ່າຊ່ວງ, ບ້ານກິ່ວສາລາ ແລະມອບໃຫ້ເດັກກໍ່າພອຍຢູ່ບ້ານເມືອງຫານຈຳ ນວນໜຶ່ງໂດຍເຂົ້າຮ່ວມມີທ່ານ ນາງ ດາວວິນ ລາດຊະກິດ ຮອງເລຂາພັກເມືອງຮອງເຈົ້າເມືອງຫົງສາ, ມີທ່ານ ປ່ຽນ ຈິນດາ ຫົວໜ້າຫ້ອງການສຶກສາທິການ ແລະ ກີລາເມືອງພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ສະໜັບສະໜຸນໂດຍ: HONDA

  ເຄື່ອງທີ່ນຳມາມອບຄັ້ງນີ້ມີມູນຄ່າທັງໝົດ 8,2 ລ້ານກີບ, ນອກນັ້ນຍັງມີເຄື່ອງນຸ່ງທີ່ບຸກຄົນໄດ້ປະກອບສ່ວນຈຳນວນໜຶ່ງ, ເຄື່ອງທີ່ນຳມາມອບແມ່ນໄດ້ຈາກທ່ານນາງ ບົວຈັນ ປໍສະຫວັດດີ ໄດ້ປຸກລະດົມວັດຖຸປັດໄຈຈາກຄອບຄົວການນຳຂອງແຂວງໄຊຍະບູລີ, ນັກທຸລະກິດ, ໝູ່ຄູ່ເພື່ອນມິດສະຫາຍຜູ້ທີ່ມີຈິດໃຈໃສສັດທາ ແລະ ຄອບຄົວຂອງເພິ່ນເອງ, ຊຶ່ງເປັນປະເພດເຄື່ອງນຸ່ງຫົ່ມກັນໜາວເພື່ອເປັນສ່ວນໜຶ່ງໃນການມອບຄວາມອົບອຸ່ນໃຫ້ແກ່ນ້ອງນັກຮຽນ, ຄູ-ອາຈານ ແລະ ປະຊາຊົນທີ່ຢູ່ບ້ານເຂດ ຫ່າງໄກສອກຫຼີກທັງເປັນການແບ່ງປັນນໍ້າຈິດນໍ້າໃຈຊ່ວຍກັນຕ້ານໄພໜາວໃນປີນີ້.

  ໃນໂອກາດນີ້ທ່ານນາງ ດາວວິນ ລາດຊະກິດ ຕາງໜ້າອົງການປົກຄອງເມືອງຫົງສາກໍ່ໄດ້ໃຫ້ກຽດມອບໃບສົມມະນາບຸນຄຸນ ແລະກ່າວສະແດງຄວາມຂອບໃຈຕໍ່ກັບທ່ານພ້ອມດ້ວຍທຸກພາກສ່ວນທີີ່ໄດ້ສະຫຼະເວລາ ແລະຊັບສິນຂອງຕົນໃນການປະກອບສ່ວນ ແລະລົງມາມອບເຄື່ອງຊ່ວຍເຫຼືອຢູ່ເມືອງຫົງສາໃນຄັ້ງນີ້ຕື່ມອີກ.

--------------------------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

• 17/12/2019