ນັກທ່ອງທ່ຽວເຂົ້າມາທ່ຽວຊົມແຂວງເຊກອງເພີ່ມຂຶ້ນ

   ແຂວງເຊກອງ ເປັນແຂວງໜຶ່ງທີ່ມີສະຖານທີ່ທ່ອງທ່ຽວທີ່ຫຼາກຫຼາຍບໍ່ວ່າຈະເປັນທາງດ້ານທຳມະຊາດ, ວັດທະນະທຳ ແລະອື່ນໆຊຶ່ງໄດ້ສ້າງຄວາມປະທັບໃຈຫຼາຍຢ່າງໃຫ້ແກ່ແຂກທີ່ເຂົ້າມາທ່ຽວຊົມໃນສະຖານທີ່ທ່ອງທ່ຽວໂດຍໃນປີທ່ອງທ່ຽວລາວ 2018 ສາມາດດຶງດູດນັກທ່ອງທ່ຽວທັງພາຍໃນ ແລະຕ່າງປະເທດໄດ້ເຖິງ 57.129 ເທື່ອຄົນລື່ນແຜນການ 7 ພັນກວ່າຄົນ ແລະເມື່ອທຽບໃສ່ປີຜ່ານມາແມ່ນມີຈຳນວນເພີ່ມຂຶ້ນ.

    ທ່ານ ບູ່ໄຊ ໄຊຍະເສນ ຫົວຫນ້າພະແນກຖະແຫຼ່ງຂ່າວ, ວັດທະນະທຳ ແລະທ່ອງທ່ຽວແຂວງເຊກອງໃຫ້ຮູ້ວ່າ: ໃນເປີດປີທ່ອງທ່ຽວລາວ 2018 ຢູ່ແຂວງເຊກອງແມ່ນມີບັນຍາກາດຄື້ນຄືກພໍສົມຄວນຊຶ່ງເຫັນວ່າມີນັກທ່ອງທ່ຽວເຂົ້າມາແຂວງເຊກອງທັງໝົດ 57.129 ເທື່ອຄົນ (ແຜນການ 50 ພັນເທື່ອຄົນ)ໃນນັ້ນມີນັກທ່ອງທ່ຽວພາຍໃນ 26.409 ຄົນ, ນັກທ່ອງທ່ຽວພາກພື້ນ 14.330 ຄົນ ແລະນັກທ່ອງທ່ຽວສາກົນ 16.390 ຄົນສາມາດສ້າງລາຍຮັບໄດ້ທັງໝົດ 97 ຕື້ກວ່າກີບຫຼືປະມານ 11,42 ລ້ານໂດລາ.

   ປະຈຸບັນ ແຂວງເຊກອງ ມີແຫຼ່ງທ່ອງທ່ຽວທັງໝົດ 38 ແຫ່ງໃນນັ້ນແຫຼ່ງທ່ອງທ່ຽວທຳມະຊາດ 20 ແຫ່ງ, ປະຫວັດສາດ 9 ແຫ່ງ, ວັດທະນະທຳ 6 ແຫ່ງ ແລະແຫຼ່ງທ່ອງທ່ຽວດ້ານກະສິກຳ 3 ແຫ່ງຊຶ່ງໃນຈຳນວນທັງໝົດໄດ້ມີການສຳຫຼວດແລ້ວ 11 ແຫ່ງ  ແລະເປີດນຳໃຊ້ເປັນທາງການແລ້ວ 9 ແຫ່ງໂດຍການ ສຳປະທານຂອງພາກເອກະຊົນ.

   ທ່ານບູ່ໄຊ ໄຊຍະເສນ ກ່າວຕື່ມອີກວ່າ: ເພື່ອເຮັດໃຫ້ຂະແໜງການທ່ອງທ່ຽວມີການຂະຫຍາຍຕົວກວ່າເກົ່າໃນປີ 2019 ນີ້ຕ້ອງໄດ້ມີການພັດທະນາແຫຼ່ງທ່ອງທ່ຽວຢ່າງມີຈຸດສຸມ, ປັບປຸງພື້ນຖານໂຄງລ່າງ, ສິ່ງອຳນວຍຄວາມສະດວກດ້ານຕ່າງໆ, ຈັດງານສົ່ງເສີມການທ່ອງທ່ຽວໃນລະດັບແຂວງ, ເມືອງ ແລະລະດັບບ້ານ, ສ້າງ ແລະປັບປຸງນິຕິກຳໃນຂະແໜງການທ່ອງທ່ຽວໃຫ້ແທດເໝາະກັບສະພາບຄວາມເປັນຈິງ, ຊຸກຍູ້ພາກທຸລະກິດໃນຂົງເຂດອຸດສາຫະກຳການທ່ອງທ່ຽວເຊັ່ນ: ໂຮງແຮມ, ເຮືອນພັກ, ຮ້ານອາຫານ, ລີສອດ, ຮ້ານກິນດື່ມ ແລະອື່ນໆ, ສົ່ງເສີມການລົງທຶນຂອງພາກລັດແລະເອກະຊົນທັງພາຍໃນ ແລະຕ່າງປະເທດເຂົ້າໃນການພັດທະນາໂຄງລ່າງພື້ນຖານດ້ານການທ່ອງທ່ຽວ, ແຫຼ່ງທ່ອງທ່ຽວ ແລະຜະລິດຕະພັນການທ່ອງທ່ຽວຢ່າງມີຈຸດສຸມ ແລະໄດ້ມາດຕະຖານ, ສ້າງເຄືອຂ່າຍການພັດທະນາແຫຼ່ງທ່ອງທ່ຽວແບບະຊາຊົນມີສ່ວນຮ່ວມໃນການພັດທະນາແຫຼ່ງທ່ອງທ່ຽວ ແລະເພີ່ມທະວີການອະນຸລັກຊັບພະຍາກອນການທ່ອງທ່ຽວທາງທຳມະຊາດ, ວັດທະນະທຳ, ປະຫວັດສາດ ແລະສິ່ງແວດລ້ອມໃຫ້ຍືນຍົງ.

 

แชร์