ສຳເລັດ 2 ໂຄງການ ສ້າງອະນຸສາວະລີອົງແກ້ວ ຢູ່ສາລະວັນ

  ວັນທີ 13 ທັນວານີ້, ຢູ່ພະແນກຖະແຫຼງຂ່າວ, ວັດທະນະທຳ ແລະທ່ອງທ່ຽວ ແຂວງສາລະວັນ ໄດ້ຈັດພິທີມອບ-ຮັບ 2 ໂຄງການຄື: ໂຄງການກໍ່ສ້າງກຳແພງ ແລະຮ່ອງລະບາຍນໍ້າອະນຸສາວະລີອົງແກ້ວ ໄລຍະ II ແລະ ໂຄງການກໍ່ສ້າງຕົບແຕ່ງສວນສາທາລະນະອົງແກ້ວໄລຍະທີ IV, ໂດຍການເຂົ້າຮ່ວມຂອງ ທ່ານ ມະໄລວອນ ສີປະເສີດ ຮັກສາການຫົວໜ້າພະແນກຖວທ ແຂວງ, ມີບັນດາທ່ານຄະນະກຳມະການຄຸ້ມຄອງການລົງທຶນຂັ້ນແຂວງ, ຜູ້ຕາງໜ້າບໍລິສັດຮັບເໝົາ ແລະ ພະນັກງານວິຊາ ການເຂົ້າຮ່ວມ.

    ໂຄງການກໍ່ສ້າງກຳແພງ ແລະຮ່ອງລະບາຍນໍ້າອະນຸສາວະລີອົງແກ້ວ ໄລຍະ II ໄດ້ລົງມືກໍ່ສ້າງແຕ່ວັນທີ 1 ເມສາ 2010 ໄດ້ກຳນົດເວລາດຳເນີນການກໍ່ສ້າງ 1 ປີ, ແຕ່ຜ່ານການຈັດຕັ້ງປະຕິບັດຕົວຈິງໄດ້ສຳເລັດໃນວັນທີ 23 ຕຸລາ 2018, ຊຶ່ງມີມູນຄ່າການກໍ່ສ້າງທັງໝົດ 1,6 ຕື້ກີບ, ໜ້າວຽກທີ່ໄດ້ປະຕິບັດ ມີ 2 ໜ້າວຽກໃຫຍ່ຄື: ວຽກຮ່ອງລະບາຍນໍ້າ, ວຽກປະຕູທາງເຂົ້າ ແລະ ຮົ້ວເປັນຕົ້ນ: ວຽກດິນ, ເບຕົງ, ກໍ່-ໂບກ, ເຫຼັກ, ທາສີ ແລະວຽກໄຟຟ້າ, ຊຶ່ງແມ່ນຫ້ອງວ່າການປົກຄອງແຂວງສາລະວັນເປັນເຈົ້າຂອງໂຄງການໃນເບື້ອງຕົ້ນແຕ່ໄດ້ມອບໃຫ້ພະແນກ ຖວທ ແຂວງ ສືບຕໍ່ເປັນເຈົ້າຂອງໂຄງການ.

  ສຳລັບໂຄງການທີ 2 ແມ່ນການກໍ່ສ້າງ ແລະຕົບແຕ່ງສວນສາທາລະນະອົງແກ້ວ ໄລຍະ IV ໄດ້ເລີ່ມລົງມືປະຕິບັດແຕ່ວັນທີ 5 ຕຸລາ 2012 ກຳນົດເວລາໃນການຈັດ ຕັ້ງປະຕິບັດ 5 ເດືອນແຕ່ຜ່ານການປະຕິບັດຕົວຈິງແມ່ນໄດ້ສຳເລັດວັນທີ 12 ທັນວາ2019 ນີ້,ຂະໜາດຂອງໂຄງການແມ່ນ 450 ແມັດ ແລະມີຫຼາຍໜ້າວຽກເຊັ່ນ: ວຽກດິນ, ເບຕົງ, ການຕົບແຕ່ງ, ນໍ້າປະປາ, ຕິດຕັ້ງໄຟຟ້າ, ກໍ່ສ້າງຫ້ອງນໍ້າ ແລະຮ້ານວາງສະແດງ, ວຽກທາສີ, ອະນາໄມ ແລະອື່ນໆ ລວມມູນຄ່າການກໍ່ສ້າງທັງໝົດ 9 ຕື້ກວ່າກີບ, ເຈົ້າຂອງໂຄງການແມ່ນພະແນກ ຖວທ ແຂວງ ແລະບໍລິສັດດາວເຮືອງສົ່ງກໍ່ສ້າງຂົວ-ທາງ ຈຳກັດ ເປັນຜູ້ຮັບເໝົາກໍ່ສ້າງທັງ 2 ໂຄງການ, ຜ່ານການຕິດ ຕາມກວດກາຂອງຄະນະກຳມະການແມ່ນຖືກຕ້ອງຕາມເຕັກນິກ ແລະໄດ້ມາດຖານ, ທັງໄດ້ສຳເລັດໜ້າວຽກທຸກດ້ານ 100% ນອກນັ້ນທາງບໍລິສັດໄດ້ຄ້ຳປະກັນທັງ 2 ໂຄງການໄລຍະ 1 ປີ ນັບແຕ່ມືເຊັນບົດບັນທຶກມອບ-ຮັບ ເປັນຕົ້ນໄປເພື່ອຮັບປະກັນທາງດ້ານເຕັກນິກ ແລະ ໜ້າວຽກຕ່າງໆທີ່ໄດ້ຈັດຕັ້ງປະຕິບັດ.

  ຈາກນັ້ນ, ກໍ່ໄດ້ມີພິທີເຊັນບົດບັນທຶກມອບ-ຮັບ 2 ໂຄງການດັ່ງກ່າວຢ່າງເປັນທາງການ, ເຊັນໂດຍ: ທ່ານ ມະໄລວອນ ສີປະເສີດ ຮັກສາການຫົວໜ້າພະແນກ ຖວທ ແຂວງກັບທ່ານ ວົງສິນ ສີໄຊຍາ ຫົວໜ້າສາຂາບໍລິສັດດາວເຮືອງສົ່ງກໍ່ ສ້າງຂົວ-ທາງຈຳກັດ ໂດຍຊ່ອງໜ້າຄະນະກຳມະການຄຸ້ມຄອງການລົງທຶນຂັ້ນແຂວງ ແລະພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.

-----------

ຂຽນໂດຍ: ວິໄລວອນ ສິດທິໄຊ

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์