ກຸ່ມບໍລິສັດດີເອັຊເຄ ລົງທຶນ 600 ຕື້ກວ່າກີບ ສ້າງເຂື່ອນນໍ້າຜາໃຫຍ່ ຄາດຈະປະກອບສ່ວນຊຸກຍູ້ເສດຖະກິດຂອງຊາດ

  ໂຄງການກໍ່ສ້າງເຂື່ອນໄຟຟ້ານໍ້າລົ້ນນໍ້າຜາໃຫຍ່ພາຍຫຼັງທີ່ໄດ້ມີການດຳເນີນການສຳຫຼວດອອກແບບໃນປີ 2010 ແລະກໍ່ໄດ້ມີການລົງມືກໍ່ສ້າງໃນທ້າຍປີ 2014 ໂດຍການລົງທຶນ 100% ຂອງກຸ່ມບໍລິສັດດີເອັຊເຄຊຶ່ງມີມູນຄ່າການກໍ່ສ້າງທັງໝົດ 68 ລ້ານໂດລາ ຫຼືປະມານ 600 ຕື້ກວ່າກີບ ປະຈຸບັນແມ່ນໄດ້ສຳເລັດການກໍ່ສ້າງ ແລະໄດ້ເປີດດຳເນີນການຜະລິດກະແສໄຟຟ້າຢ່າງເປັນທາງການໃນທ້າຍເດືອນພະຈິກ 2019 ຜ່ານມາທັງນີ້ຄາດວ່າເຂື່ອນດັ່ງກ່າວຈະປະກອບສ່ວນສຳຄັນໃນການພັດທະນາເສດຖະກິດ-ສັງຄົມຂອງແຂວງໄຊສົມບູນກໍຄືຂອງປະເທດ.

  ທ່ານ ໄຊຍະສິດ ຊະນະແກ້ວ ຜູ້ອຳນວຍການໃຫຍ່ກຸ່ມບໍລິສັດດີເອັຊເຄ (DSK Group) ໃຫ້ສຳພາດຕໍ່ໜັງສືພິມເສດຖະກິດ-ສັງຄົມ ເມື່ອບໍ່ດົນມານີ້ວ່າ: ໂຄງການກໍ່ສ້າງເຂື່ອນໄຟຟ້ານໍ້າລົ້ນນໍ້າຜາໃຫຍ່ຢູ່ບ້ານຜານ້ອຍ ເມືອງລ້ອງແຈ້ງ ແຂວງໄຊສົມບູນແມ່ນໄດ້ມີການສຳຫຼວດອອກແບບມາແຕ່ປີ 2010 ແລະໃນທ້າຍ ປີ2014 ໄດ້ມີການລົງມືກໍ່ສ້າງຢ່າງເປັນທາງການໂຄງການດັ່ງກ່າວແມ່ນໄດ້ເອົາໃຈໃສ່ເລື່ອງສິ່ງແວດລ້ອມເປັນອັນດັບທຳອິດໂດຍໄດ້ມີການຮ່ວມມືກັບບໍລິສັດວິສະວະກອນທີ່ມີຊື່ສຽງຂອງໂລກເພື່ອເຂົ້າມາອອກແບບເຂື່ອນນໍ້າລົ້ນທີ່ເປັນມິດກັບສິ່ງແວດລ້ອມຫຼາຍທີ່ສຸດ ແລະບໍ່ສົ່ງຜົນກະທົບຕໍ່ປະຊາຊົນ.

ສະໜັບສະໜຸນໂດຍ: HONDA

---------

 

 ເຂື່ອນນໍ້າລົ້ນນໍ້າຜາໃຫຍ່ຕັ້ງຢູ່ບໍລິເວນນໍ້າງື່ມທີ່ຮັບນໍ້າຈາກແມ່ນໍ້າ 3 ສາຍ ຄື: ແມ່ນນໍ້າງື່ມ, ແມ່ນໍ້າຜາໃຫຍ່ ແລະແມ່ນໍ້າຜານ້ອຍມີກຳລັງຕິດຕັ້ງທັງໝົດ 19,2 ເມກາວັດ (MW) ປະຈຸບັນແມ່ນໄດ້ສຳເລັດການກໍ່ສ້າງ ແລະດຳເນີນການຜະລິດກະແສໄຟຟ້າຢ່າງເປັນທາງການຊຶ່ງມີຄວາມສາມາດຜະລິດກະເເສໄຟຟ້າເຖິງ 167 ກິກາວັດໂມງຕໍ່ປີ, ເຂື່ອນໄຟຟ້ານໍ້າລົ້ນນໍ້າຜາໃຫຍ່ແມ່ນຈະປະກອບສ່ວນສຳຄັນໃຫ້ແກ່ປະຊາຊົນທີ່ຢູ່ອ້ອມຂ້ອງກໍຄືການປະກອບສ່ວນພັດທະນາເສດຖະກິດ-ສັງຄົມຂອງແຂວງໄຊສົມບູນໃຫ້ຂະຫຍາຍຕົວຕໍ່ເນື່ອງ.

 ທ່ານ ໄຊຍະສິດ ຊະນະແກ້ວ ກ່າວຕື່ມວ່າ: ກຸ່ມບໍລິສັດດີເອັຊເຄ ສ້າງຕັ້ງຂຶ້ນ ໃນປີ 1989 ທີ່ຫຼວງພະບາງ ໂດຍແມ່ນທ່ານ ໄຊຍະສິງ ຊະນະແກ້ວ ເປັນຜູ້ກໍ່ຕັ້ງ ແລະທັງເປັນປະທານບໍລິສັດ, ໂດຍການດຳເນີນທຸລະກິດຂອງບໍລິສັດແມ່ນລົງທຶນເຂົ້າໃນຫຼາຍຂະແໜງການ, ຊຶ່ງທຸລະກິດຫຼັກໆປະກອບມີໂຮງງານນໍ້າໝາກໄມ້, ໂຮງງານນໍ້າດື່ມມີນີໂຣ,ຕະຫຼາດໂພສີ ຫຼວງພະບາງ,ໂຮງແຮມຊະນະແກ້ວບູຕິກ ຫຼວງພະບາງ,ໂຮງງານເບຕົງຢູ່ຫຼວງພະບາງ ແລະວຽງຈັນ, ໂຄງການນໍ້າຜາໃຫຍ່ຮາຍໂດຣພາວເວີ, ຕະຫຼອດຜົນສຳເລັດ 31 ປີ ຜ່ານມາແມ່ນຍ້ອນໄດ້ຮັບການສະໜັບສະໜຸນຈາກພັກລັດ ແລະບໍລິສັດໄດ້ປະກອບສ່ວນສຳຄັນຕໍ່ກັບສັງຄົມໂດຍສະເພາະການສ້າງວຽກເຮັດງານທຳປະຈຸບັນໃນກຸ່ມບໍລິສັດມີພະນັກງານ 300 ກວ່າຄົນ ນອກນັ້ນຍັງປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງປະເທດອີກດ້ວຍ. 

---------------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์