ຍີ່ປຸ່ນສົ່ງກຸ່ມອາສາສະໝັກມາຊ່ວຍພັດທະນາ ຢູ່ລາວ

  ລັດຖະບານຍີ່ປຸ່ນສົ່ງກຸ່ມອາສາສະໝັກ JICA ຈຳນວນ 8 ຄົນມາເຮັດວຽກເສີມຂະຫຍາຍມິດຕະພາບຮາກຖານຖ່າຍທອດວິຊາຄວາມຮູ້, ທັກສະແລກປ່ຽນປະສົບການ ແລະ ການພັດທະນາທີ່ ສປປ ລາວ, ພິທີຕ້ອນຮັບກຸ່ມອາສາສະໝັກດັ່ງກ່າວໄດ້ຈັດຂຶ້ນວັນທີ 11 ທັນວາ 2019 ທີ່ສະຖານທູດຍີ່ປຸ່ນປະຈຳລາວໂດຍການເຂົ້າຮ່ວມ ທ່ານ ທາເກວາກະ ເຄໂຊ ເອກອັັກ ຄະຣາຊະທູດຍີ່ປຸ່ນປະຈຳລາວ ພ້ອມດ້ວຍບັນດາທ່ານທີ່ຕາງໜ້າຈາກກະຊວງກ່ຽວເຂົ້າຮ່ວມ.

  ການສົ່ງກຸ່ມອາສາສະໝັກຈຳນວນ 8 ຄົນ ມາຄັ້ງນີ້ເປັນການຢັ້ງຢືນຄວາມພະຍາມຂອງລັດຖະບານຍີ່ປຸ່ນໃນການດຳເນີນການຊຸກຍູ້ການພັດທະນາເສດຖະກິດ-ສັງຄົມຂອງ ສປປ ລາວ ເພື່ອໃຫ້ເຂັ້ມແຂງຂຶ້ນໃນນີ້ອີງຕາມຄຳຮ້ອງຂໍທີ່ຮັບອາສາສະໝັກເຂົ້າຮ່ວມເຮັດວຽກການມອບໝາຍຈະຖືກສົ່ງໄປ ແຂວງຫຼວງພະບາງ 3 ຄົນ, ນະຄອນ ຫຼວງວຽງຈັນ 2 ຄົນ, ສະຫວັນນະເຂດ 2 ຄົນ ແລະເຊກອງ 1 ຄົນ, ປະຈຸບັນລັດຖະບານຍີ່ປຸ່ນໄດ້ສົ່ງອາສາສະໝັກ JICA ເຂົ້າມາຊ່ວຍໃນການພັດທະນາຢູ່ລາວທັງ ໝົດ 47 ຄົນ, ອາສາສະ ໝັກຜູ້ອະວຸໂສ 1 ທ່ານ ຊຶ່ງພວກເຂົາຈະໄດ້ເສີມຂະຫຍາຍມິດຕະພາບ ແລະ ຄວາມເຂົ້າໃຈລະຫວ່າງປະເທດຍີ່ປຸ່ນ ແລະ ສປປ ລາວຜ່ານການຖ່າຍທອດຄວາມຮູ້ແລກປ່ຽນປະສົບການທັກສະຕ່າງໆເປັນເວລາ 2 ປີ.

  ນັບແຕ່ປີ 1965 ອາສາສະໝັກຂອງ JICA ຍີ່ປຸ່ນຖືກສົ່ງມາປະຕິບັດພາລະກິດທີ່ປະເທດລາວຈຳນວນ 1.021 ຄົນ ເຂົ້າໃນຂະແໜງການສາທາລະນະສຸກ, ການສຶກສາ, ກະສິກຳ ແລະປ່າໄມ້, ວິສະວະກຳ ແລະການພັດທະນາເຂດຊົນນະບົດ.

-----------------

ຂ່າວ: ແພງຕາ

แชร์