ສ່ວຍສາອາກອນ 4 ແຂວງພາກເໜືອຮັບຟັງກົດໝາຍ

 ກະຊວງການເງິນຮ່ວມກັບທະນາຄານໂລກໄດ້ຈັດກອງປະຊຸມເຜີຍແຜ່ 4 ກົດໝາຍໃນນັ້ນປະກອບມີກົດໝາຍວ່າດ້ວຍການຄຸ້ມຄອງສ່ວຍສາອາກອນ, ກົດໝາຍວ່າດ້ວຍາອາກອນມູນຄ່າເພີ່ມ, ກົດໝາຍວ່າດ້ວຍອາກອນລາຍໄດ້ ແລະ ກົດໝາຍວ່າດ້ວຍອາກອນຊົມໃຊ້ຊຶ່ງໄດ້ຈັດຂຶ້ນໃນວັນທີ 12 ທັນວາ 2019 ນີ້ທີ່ຫ້ອງປະຊຸມຂອງທະນາ ຄານກາງໂດຍການເປັນປະທານຂອງທ່ານ ພູທະນູເພັດ ໄຊສົມບັດ ຫົວໜ້າກົມສ່ວຍສາອາກອນ,ມີຫົວໜ້າພະແນກ,ຮອງຫົວໜ້າຈາກໜ່ວຍງານທີ່ກ່ຽວຂ້ອງ 4 ແຂວງຄືແຂວງໄຊຍະບູລີ, ຊຽງຂວາງ, ຫົວພັນ ແລະ ແຂວງຫຼວງພະບາງ, ສ່ວຍສາອາກອນຈາກ 11 ເມືອງ 1 ນະຄອນ ພ້ອມດ້ວຍແຂກຖືກເຊີນຈາກໜ່ວຍງານອ້ອມຂ້າງ ແຂວງເຂົ້າຮ່ວມ.

  ທ່ານ ພູທະນູເພັດ ໄຊສົມບັດ ຫົວໜ້າກົມສ່ວຍສາອາກອນກ່າວວ່າ: ຈຸດປະສົງຫຼັກຂອງກອງປະຊຸມຄັ້ງນີ້ແມ່ນເພື່ອເຜີຍແຜ່ກົດໝາຍວ່າດ້ວຍການຄຸ້ມຄອງສ່ວຍສາອາກອນ, ກົດໝາຍວ່າດ້ວຍອາກອນມູນຄ່າເພີ່ມ, ກົດໝາຍວ່າດ້ວຍອາກອນລາຍໄດ້ ແລະກົດໝາຍວ່າດ້ວຍອາກອນຊົມໃຊ້ໃຫ້ກັບບັນດາຫົວໜ່ວຍການຄຸ້ມຄອງອາກອນໄດ້ເຂົ້າໃຈແຈ້ງຕື່ມຕໍ່ກັບການປ່ຽນແປງ ແລະ ເພີ່ມເຕີມຂອງບາງເນື້ອໃນກົດໝາຍ, ພ້ອມກັນນີ້ບັນດາຜູ້ເຂົ້າຮ່ວມໃນທີ່ປະຊຸມຈະໄດ້ມີການປຶກສາຫາລືຕັ້ງຄໍາຖາມເຈາະຈີ້ມເພື່ອສົນທະນາແລກປ່ຽນກັນໃຫ້ມີຄວາມເຂົ້າໃຈຢ່າງເລິກເຊິ່ງເຂົ້າໃນການຈັດຕັ້ງປະຕິບັດໜ້າທີ່ວຽກງານໃຫ້ໄດ້ຕາມເປົ້າໝາຍທັງເປັນການຈັດຕັ້ງຜັນຂະຫຍາຍເນື້ອໃນ ຂອງກອງປະຊຸມໃຫຍ່ຄັ້ງທີ IX ຂອງພັກໃຫ້ປາກົດຜົນເປັນຈິງແນໃສ່ເຮັດໃຫ້ປະເທດລາວຫຼຸດພົ້ນອອກຈາກການເປັນປະເທດດ້ອຍພັດທະນາໃນປີ 2020 ສະນັ້ນລັດຖະບານໄດ້ມີທິດຊີ້ນໍາໃຫ້ກະຊວງການເງິນເກັບລາຍຮັບເຂົ້າງົບປະມານແຫ່ງລັດໃຫ້ຖືກຕ້ອງ, ຄົບຖ້ວນ ແລະເອົາໃຈໃສ່ໂຄສະນາເຜີຍແຜ່ແນະນໍາບັນດາລະບຽບ ແລະ ກົດໝາຍໃຫ້ບັນດາຜູ້ປະກອບການໄດ້ເຂົ້າໃຈ ແລະສາມາດປະຕິບັດພັນທະຂອງຕົນໄດ້ຢ່າງຖືກຕ້ອງ ແລະ ຄົບຖ້ວນທ່ານກ່າວຕື່ມວ່າໜຶ່ງໃນບັນດາບຸລິມະສິດຕົ້ນຕໍທີ່ພວມກະກຽມຢ່າງເຄັ່ງຮ້ອນກໍ່ແມ່ນການຈັດຕັ້ງປະຕິບັດ 3 ກົດໝາຍທີ່ໄດ້ແຍກອອກຈາກກົດໝາຍວ່າດ້ວຍສ່ວຍສາອາກອນເປັນອັນສະເພາະຂອງໃຜມັນຊຶ່ງໄດ້ກໍານົດຫຼັກກາ ນໃນການຄຸ້ມຄອງສ່ວຍສາອາກອນ ແລະຫຼັກການລວມຂອງແຕ່ລະປະເພດອາກອນໃນບັນດາກົດໝາຍເຫຼົ່ານີ້ອັນທີ່ພົ້ນເດັ່ນແມ່ນໄດ້ປັບຫຼຸດອັດຕາອາກອນກຳໄລລົງຈາກ 24% ມາເປັນ 20%, ຈາກການມອບອາກອນກຳໄລ 4 ຄັ້ງຕໍ່ປີມາເປັນ 2 ຄັ້ງຕໍ່ປີ, ຈາກຜູ້ດໍາເນີນທຸລະກິດທີ່ມີລາຍຮັບ 12 ລ້ານກີບລົງມາຖືກຍົກເວັ້ນອາກອນກໍ່ໄດ້ປັບຂຶ້ນຕື່ມອີກ 50 ລ້ານ ກີບລົງຖືກຍົກເວັ້ນ, ການປັບປຸງດັ່ງກ່າວບໍ່ສະເພາະແຕ່ເພື່ອຈຸດປະສົງສົ່ງເສີມໃຫ້ບັນດາຫົວໜ່ວຍທຸລະກິດໄດ້ມີການຂະຫຍາຍຕົວເທົ່ານັ້ນຍັງໄດ້ອໍານວຍຄວາມສະດວກໃນການຈັດຕັ້ງປະຕິບັດດ້ວຍລະບົບທີ່ທັນສະໄໝໃນການອອກເລກປະຈໍາຕົວ, ການແຈ້ງ ແລະ ຊໍາລະອາກອນຜ່ານເອເຫຼັກໂທຣນິກນໍາອີກ.

ສະໜັບສະໜຸນໂດຍ: HONDA

  ເຊື່ອແນ່ວ່າການໂຄສະນາເຜີຍແຜ່ກົດໝາຍຄັ້ງນີ້ໃຫ້ບັນດາຫົວໜ່ວຍທີ່ກ່ຽວຂ້ອງທັງພາກລັດ ແລະທຸລະກິດທົ່ວສັງຄົມໄດ້ເຂົ້າໃຈ ແລະສາມາດນໍາໄປຈັດຕັ້ງປະຕິບັດໃຫ້ໄດ້ຮັບຜົນດີກວ່າເກົ່າ ແລະໃນຕອນທ້າຍຂອງວາລະກອງປະຊຸມຍັງໄດ້ຮັບຟັງການໂອ້ລົມຈາກ ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນຕື່ມອີກ.

__________

ຂຽນໂດຍ: ສີສຸວັນ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

ບໍລິການໂຄສະນາທາງເຟສບຸກ ແລະເວັບໄຊ

ໂທ: 021 313645, 316511

แชร์