ຄູ-ອາຈານ ຝຶກອົບຮົມການນຳໃຊ້ປຶ້ມຄູ່ມື ການສອນເພດສຶກສາ

 ໃນວັນທີ 12 ທັນວາ 2019 ທີ່ໂຮງຮຽນ ມສ ປາກທາ ເມືອງປາກທາ ແຂວງບໍ່ແກ້ວ ໄດ້ຈັດການຝຶກອົບຮົມການນຳໃຊ້ປຶ້ມຄູ່ມືການສອນເພດສຶກສາເປັນກຽດເຂົ້າຮ່ວມຂອງທ່ານ ຄຳເພັດ ປັນຍາ ຫົວໜ້າຫ້ອງການສຶກສາທິການ ແລະກີລາເມືອງມີຄູຝຶກມາຈາກກະຊວງສຶກສາ,ພະແນກສຶກສາແຂວງ, ເຂົ້າຮ່ວມມີຄະນະຮັບຜິດຊອບຂັ້ນເມືອງ ແລະຄູ-ອາຈານຕາງໜ້າໂຮງຮຽນມໍຕົ້ນ ແລະ ມໍປາຍ 7 ແຫ່ງພາຍໃນເມືອງ.

  ທ່ານ ຄຳເພັດ ປັນຍາ ໄດ້ມີຄຳເຫັນເນັ້ນໜັກໃຫ້ນັກສຳມະນາກອນທຸກສະຫາຍຈົ່ງເອົາໃຈໃສ່ຕໍ່ການຝຶກອົບຮົມໃນຄັ້ງນີ້ໃຫ້ລະອຽດຖີ່ຖ້ວນ, ນຳເອົາເນື້ອໃນທິດສະດີບົດ ຮຽນໄປຈັດຕັ້ງປະຕິບັດບັນດາວິຊາທີ່ກ່ຽວຂ້ອງໃຫ້ໄດ້ຮັບໝາກຜົນຫຼາຍຂຶ້ນໂດຍສະເພາະວິຊາທີ່ເວົ້າເຖິງເພດສຶກສາໝາຍເຖິງການຮຽນຮູ້ກ່ຽວກັບເພດຍິງ ແລະ ເພດຊາຍ,ສຸຂະພາບຈະເລີນພັນ,ການວາງແຜນຄອບຄົວ, ການມີຊີວິດທີ່ປອດໄພ ແລະສຸຂະພາບທີ່ດີ, ການຮຽນຮູ້ກ່ຽວກັບສິດທິທາງເພດ, ຮູບແບບຕ່າງທີ່ກ່ຽວຂ້ອງກັບເພດໄວ, ວິທີປະຕິບັດຂອງເພດຍິງ ແລະເພດຊາຍຢູ່ໃນສັງຄົມ.

ສະໜັບສະໜຸນໂດຍ: HONDA

 ຈາກນັ້ນຄູຝຶກ ແລະນັກສຳມະນາກອນກໍ່ໄດ້ຈັດແບ່ງກຸ່ມເພື່ອຝຶກທັກສະການສອນສອດແຊກທີ່ນຳເອົາຄວາມຮູ້ກ່ຽວກັບເລື່ອງເພດເຂົ້າໃນບົດຮຽນ ແລະວິຊາທີ່ກ່ຽວຂ້ອງເຊັ່ນ:ວິຊາສຶກສາພົນລະເມືອງ ແລະ ວິຊາຊີວະສາດແລ້ວຂຶ້ນສາທິດວິທີການສອນຕາມບົດຮຽນທີ່ກ່ຽວຂ້ອງກັບເລື່ອງເພດສຶກສາ ແລະ ວິທີການຍົກຕົວຢ່າງອື່ນໆໃນການຖາມ-ຕອບພາຍໃນຫ້ອງຮຽນທີ່ເຄີຍປະຕິບັດຜ່ານມາທັງນີ້ກໍເພື່ອເປັນການລົງຕິດຕາມ ແລະ ແນະນຳກ່ຽວກັບການນຳໃຊ້ປຶ້ມຄູ່ມືການສອນເພດສຶກສາສຳລັບຄູ-ອາຈານຊັ້ນມັດທະຍົມຕອນຕົ້ນ ແລະຕອນປາຍໃນທົ່ວແຂວງໃຫ້ເຂົາເຈົ້າໄດ້ມີຄວາມຮູ້, ຄວາມສາມາດໃນການນຳໃຊ້ປຶ້ມຄູ່ມືດັ່ງກ່າວໃຫ້ສອດຄ່ອງກັບເນື້ອໃນບົດຮຽນໃຫ້ມີຄຸນນະ ພາບດີຂຶ້ນກວ່າເກົ່າ.

------------------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

• 16/12/2019