ສະໜາມໄຊ ປະກາດຈົບຊັ້ນມັດທະຍົມຕົ້ນບຳລຸງ

   ເມືອງສະໜາມໄຊ ແຂວງອັດຕະປື ໄດ້ປະກາດຈົບຊັ້ນມັດທະຍົມສຶກສາຕອນຕົ້ນ (ມຕ) ບຳລຸງສຳລັບປະຊາຊົນແລ້ວຢ່າງເປັນທາງການພາຍຫຼັງທີ່ໄດ້ການຈັດຕັ້ງດຳ ເນີນການຮຽນ-ການສອນບຳລຸງຍົກລະດັບການສຶກສາຂັ້ນພື້ນຖານຊັ້ນມັດທະຍົມຕອນຕົ້ນໃຫ້ກັບປະຊາຊົນບັນດາເຜົ່າໃນເກນ ອາຍຸ 15-30  ທົ່ວເມືອງສະໜາມໄຊ ແລະຜ່ານການປະເມີນສາມາດ ບັນລຸໄດ້ຕາມຄາດໝາຍ ແລະມາດຖານທີ່ກະຊວງສຶກສາທິການ ແລະ ກີລາກຳນົດໃຫ້.

  ພິທີປະກາດຈົບຊັ້ນ ມຕ ບຳລຸງສຳລັບປະຊາຊົນຂອງເມືອງສະໜາມໄຊໄດ້ຈັດຂຶ້ນຢ່າງເປັນທາງການໃນວັນທີ 12 ທັນວາ 2019 ທີ່ໂຮງຮຽນ ມສ ສະໜາມໄຊ ຂອງເມືອງດັ່ງກ່າວ ໂດຍໃຫ້ກຽດເຂົ້າ ຮ່ວມ ແລະມອບໃບຢັ້ງຢືນຂອງ ທ່ານ ພຸດ ສິມມະລາວົງ ຮອງລັດ ຖະມົນຕີກະຊວງສຶກສາທິການ ແລະກີລາ ແລະກ່າວຮັບໂດຍທ່ານບຸນໂຮມ ພົມມະສານ ເຈົ້າເມືອງສະໜາມໄຊ, ມີທ່ານ ອຸ່ນຫຼ້າ ໄຊຍະສິດ ຮອງເຈົ້າແຂວງອັດຕະປື, ຄະນະຜູ້ບໍລິຫານການສຶກສາ ແລະກີລາຂັ້ນແຂວງ-ຂັ້ນເມືອງ 5 ຕົວເມືອງໃນທົ່ວແຂວງ, ຜູ້ອຳນວຍການໂຮງຮຽນປະຖົມ-ມັດທະຍົມ, ພໍ່-ແມ່ປະຊະຊົນ, ນ້ອງໆນັກຮຽນ ແລະແຂກທີ່ຖືກເຊີນເຂົ້າຮ່ວມ.

  ທ່ານ ທອງໄຊ ບຸດທອງດີ ຫົວໜ້າຫ້ອງການສຶກສາທິການ ແລະກີລາເມືອງສະໜາມໄຊ ໃຫ້ຮູ້ວ່າ: ເມືອງສະໜາມໄຊແມ່ນເມືອງໜຶ່ງໃນບັນດາ 5 ເມືອງ ຂອງແຂວງອັດຕະປື ທີ່ໄດ້ສາມາດປະກາດເປັນເມືອງທີ່ຈົບຊັ້ນ ມ.ຕົ້ນບຳລຸງສຳລັບປະຊາຊົນເປັນເມືອງທີ 4 ຖັດຈາກເມືອງພູວົງ; ເມືອງ ສະໜາມໄຊ ມີ 40 ບ້ານ, ມີໂຮງຮຽນອະ ນຸບານທັງໝົດ 3 ແຫ່ງ, ໂຮງຮຽນປະຖົມສຶກສາ 47 ແຫ່ງ, ໂຮງຮຽນມັດທະຍົມສຶກສາ 8 ແຫ່ງ ໃນນັ້ນມັດທະຍົມສົມບູນ 2  ແຫ່ງ, ມີປະຊາກອນທັງໝົດ 36.6 74 ຄົນ, ຍິງ 18.212  ຄົນ, ປະກອບມີ 8 ຊົນເຜົ່າ ຄື: ເຜົ່າ ຢຣຸ, ເຈັງ, ເບຣົາ, ຍະເຫີນ, ຕະຫຽງ, ໂອຍ, ຕະໂອ້ຍ ແລະລາວລຸ່ມ.

  ສຳລັບວຽກງານການສຶກສານອກໂຮງຮຽນນີ້ການບຳລຸງຍົກລະດັບຊັ້ນມັດທະຍົມຕອນຕົ້ນບຳລຸງສຳລັບປະຊະຊົນບັນດາເຜົ່າໃນເກນອາຍຸ 15-30 ປີ ແມ່ນໄດ້ດໍາເນີນຈັດຕັ້ງການຮຽນ-ການສອນມາແຕ່ປີ 2012 -2019 ໂດຍພາຍໃຕ້ການຊິ້ນຳ-ນຳພາຈາກຂັ້ນເທິງທຸກພາກສ່ວນຢ່າງໃກ້ຊິດ ແລະຕໍ່ເນື່ອງໂດຍສະເພາະແມ່ນພະແນກ ສຶກສາທິການ ແລະກີລາ, ມາຮອດປະຈຸບັນສາມາດປະເມີນໄດ້ນັກ ຮຽນທີ່ຮຽນຈົບຊັ້ນມັດທະຍົມຕອນຕົ້ນບຳລຸງໃນເກນອາຍຸ 15-30 ປີທີ່ຈົບຊັ້ນ ມ.ຕົ້ນ ບຳລຸງສຳລັບປະຊາຊົນໄດ້ທັງໝົດທົ່ວເມືອງ 1.018 ຄົນ, ຍິງ 559 ຄົນ ສະເລ່ຍ ເທົ່າກັບ 69,62%,ຈາກຜົນການປະເມີນດັ່ງກ່າວເມືອງສະ ໜາມໄຊ, ແຂວງອັດຕະປື ແມ່ນ ສາມາດປະກາດເປັນເມືອງທີ່ຈົບຊັ້ນ ມ.ຕົ້ນ ບຳລຸງສຳລັບປະຊາຊົນໄດ້ຕາມຄາດໝາຍ ແລະມີມາດຖານທີ່ກະຊວງສຶກສາທິການ ແລະກີລາໄດ້ວາງອອກ.

  ສຳລັບທິດທາງ-ແຜນການ ແລະ ຄາດໝາຍສູ້ຊົນໃນຕໍ່ໜ້າ 2019-2020 ສະເພາະວຽກງານບໍາລຸງຍົກລະດັບໃຫ້ປະຊາຊົນໃນກຸ່ມເປົ້າໝາຍ 15-40 ປີ ຈະສູ້ຊົນໃຫ້ໄດ້ 99% ສຳລັບບຳລຸງຊັ້ນປະຖົມ, ກຸ່ມເປົ້າໝາຍ 15-30 ປີໃຫ້ໄດ້ 97% ສຳລັບບຳລຸງຊັ້ນ ມ.ຕົ້ນ, ກຸ່ມເປົ້າໝາຍ 15-30 ປີ ໃຫ້ໄດ້ 68% ສຳລັບບໍາລຸງຊັ້ນ ມ.ປາຍ ແລະ ຈະຈັດຝຶກອົບຮົມວິຊາຊີບ, ພັດທະນາສີມືແຮງງານໃຫ້ຊາວໜຸ່ມຜູ້ທີ່ຮຽນຈົບ ມ.ຕົ້ນ ແລະ ມ.ປາຍບຳລຸງສຳລັບປະຊາຊົນ ແລະ ຜູ້ທີ່ດ້ອຍໂອກາດໃຫ້ໄດ້ມີວຽກເຮັດງານທໍາ, ສາມາດເພີ່ງຕົນເອງ ແລະກຸ້ມຕົາເອງໄດ້. 

  ໃນພິທີໄດ້ມີການມອບໃບຢັ້ງຢືນເມືອງສະໜາມໄຊ ເປັນເມືອງຈົບຊັ້ນມັດທະຍົມຕອນຕົ້ນບຳລຸງສຳລັບປະຊາຊັນຂອງກະຊວງສຶກສາທິການ ແລະ ກີລາ, ມອບໃບຍ້ອງຍໍຂອງທ່ານເຈົ້າແຂວງ, ທ່ານ ເຈົ້າເມືອງ ແລະຂອງຂວັນຕ່າງ ໃຫ້ຜູ້ທີ່ມີຜົນງານດີເດັ່ນປະກອບສ່ວນເຮື່ອແຮງ ແລະສະຕິປັນຍາເຂົ້າໃນການພັດທະນາການສຶກສາຢ່າງຕັ້ງໜ້າຢ່າງສົມກຽດ ແລະໃນຕອນທ້າຍພິທີ ທ່ານ ພຸດສິມມະລາ ຮອງລັດຖະມົນຕີກະຊວງສຶກ ສາທິການ ແລະກີລາ ແລະທ່ານ ອຸ່ນຫຼ້າໄຊຍະສິດ ຮອງເຈົ້າແຂວງ ອັດຕະປື,ກໍ່ໄດ້ຮ່ວມເປີດປ້າຍເມືອງສະໜາມໄຊ ເປັນເມືອງຈົບຊັ້ນມັດທະຍົມຕອນຕົ້ນບຳລຸງສຳລັບປະຊາຊົນ ແລະຕີຄ້ອງ 9 ບາດ ເປັນການປະກາດ ແລະຢັ້ງຢືນຜົນສຳເລັດດັ່ງກ່າວໃຫ້ສັງຄົມຮັບຮູ້ຢ່າງກວ້າງຂວາງ.

------------------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์