ຫວຽດນາມເລັ່ງປັບຫຼຸດພາສີ ສິນຄ້າກະສິກຳອາເມລິກາ

  ສສ ຫວຽດນາມກຳລັງພິຈາລະນາປັບຫຼຸດອັດຕາພາສີກັບຜະລິດຕະພັນຂອງອາເມລິກາຫຼາຍລາຍການຫຼັງຈາກຖືກຂໍຫຼຸດເກີນດຸນການຄ້າລະຫວ່າງກັນ.

ຕາມຂ່າວຕ່າງປະເທດລາຍງານວ່າກະຊວງການເງິນຫວຽດນາມລະບຸວ່າຜະລິດຕະພັນທີ່ຕ້ອງປັບຫຼຸດພາສີປະກອບມີ: ໄກ່ ແລະ ຊີ້ນໄກ່ແປຮູບ, ອັລມອນ, ອະງຸ່ນ, ສາ ລີ,ຊີ້ນໝູ ແລະມັນຝຣັ່ງເພື່ອປັບສົມດຸນການຄ້າທະວີພາຄີ,ຊຶ່ງຫວຽດນາມກາຍເປັນໜຶ່ງໃນປະເທດທີ່ໄດ້ຮັບຜົນປະໂຫຍດຫຼາຍທີ່ສຸດຈາກຂໍ້ພິພາດທາງການຄ້າລະຫວ່າງອາເມລິກາ ແລະ ສປ ຈີນ ແຕ່ຂະນະດຽວກັນກໍມີຄວາມວິຕົກວ່າອາດເຮັດໃຫ້ປະເທດຕົນເປັນເປົ້າໝາຍຕໍ່ໄປຂອງທ່ານ ໂດນັລ ທຣຳ ຜູ້ນໍາອາເມລິກາ, ຊຶ່ງການເກີນດຸນການຄ້າຂອງຫວຽດນາມ ກັບອາເມລິກາຢູ່ທີ 38,4 ຕື້ໂດ ລາສະຫະລັດ ໃນໄລຍະ 10 ເດືອນ ຕົ້ນປີ 2019 ເພີ່ມຂຶ້ນ33,66% ຈາກປີກ່ອນໜ້ານີ້, ຖະແຫຼງການ ລະບຸວ່າກະຊວງໄດ້ສະເໜີປັບຫຼຸດອັດຕາພາສີໄກ່ເຫຼືອ 18% ຈາກ 20% ຂະນະທີ່ອາເມລິກາຄາດຄະເນວ່າຫວຽດນາມຈະປັບຫຼຸດລົງເຫຼືອ 14,5% ໃນປີໜ້າ ແລະ ຍົກເລີກພາສີໃນປີ 2028.

  ທັງນີ້ອັດຕາພາສີນໍາເຂົ້າໝາກແອັບເປິ້ນ ແລະໝາກອະງຸ່ນສົດຈາກອາເມລິກາຄາດວ່າຈະປັບຫຼຸດລົງເຫຼືອ 8%, ສາລີເຫຼືອ 3%, ມັນຝຣັ່ງ 12% ແລະ ຊີ້ນໝູ 22% ຊຶ່ງເປັນໄປຕາມຄວາມມຸ້ງໝັ້ນຂອງຫວຽດນາມຕໍ່ການຫຼຸດອັດຕາພາສີອາກອນ, ຢ່າງໃດກໍຕາມ ອາເມລິກາ ໄດ້້ສະເໜີໃຫ້ຍົກເລີກ ອັດຕາພາສີໝາກແອັບເປິ້ນ, ອະງຸ່ນ ແລະສາລີໃນປີໜ້າ.

___________

ໜັງສືພິມເສດຖະກິດ-ສັງຄົມ

แชร์