ຍີ່ປຸ່ນຊ່ວຍລ້າ 5,5 ຕື້ກີບ ເກັບກູ້ລະເບີດຕົກຄ້າງຢູ່ຊຽງຂວາງ

  ລັດຖະບານຢີ່ປຸ່ນໄດ້ໃຫ້ການຊ່ວຍເຫຼືອລ້າມູນຄ່າ 746.128 ໂດລາສະຫະລັດ ປະມານ 5,5 ຕື້ກີບ ເພື່ອຊ່ວຍເຫຼືອໃນໂຄງການສົ່ງເສີມການນໍາໃຊ້ເຄື່ອງຈັກທໍາລາຍລະເບີດລູກຫວ່ານທີ່ແຂວງຊຽງຂວາງ, ສປປ ລາວ.

 ພິທີເຊັນສັນຍາໂຄງການຊ່ວຍເຫຼືອລ້າດັ່ງກ່າວແມ່ນຈັດຂຶ້ນທີ່ສະຖານທູດຢີ່ປຸ່ນປະຈຳລາວໃນວັນທີ 11 ທັນວາ 2019, ລະຫວ່າງທ່ານ ທາເກວາກະເຄໂຊ, ເອກອັກ ຄະຣາຊະທູດຢີ່ປຸ່ນປະຈຳລາວ ແລະທ່ານ ໂດໂກະ ທາກາຮິຊະ, ຮອງປະທານອົງການ JMAS, ອົງການບໍ່ສະແຫວງຜົນກຳໄລທີ່ີໄດ້ລິເລີ່ມ ແລະ ຄຸ້ມຄອງໂຄງການດັ່ງ ກ່າວການເຊັນຕໍ່ສັນຍາໂຄງການໃນຄັ້ງນີ້ຈະໃຫ້ທຶນສະໜັບສະໜູນກິດຈະກຳໃນປີທຳອິດຂອງໂຄງການທີ່ມີອາຍຸ 3 ປີ ເຊິ່ງມີຊື່ວ່າ: “ໂຄງການເກັບກູ້ລະເບີດທີ່ແຂວງຊຽງຂວາງ”.

 ໂຄງການດັ່ງກ່າວມີເປົ້າໝາຍທີ່ຈະເລັ່ງລັດການເກັບກູ້ລະເບີດຢ່າງປອດໄພໃນພື້ນທີ່ມີລະເບີດໃນແຂວງຊຽງຂວາງລວມເຖິງການສົ່ງເສີມການພັດທະນາຊັບພະຍາກອນມະນຸດໃຫ້ສາມາດຈັດການ ແລະສອນການນຳໃຊ້ເຕັກໂນໂລຊີເຄື່ອງຈັກປະມວນຫາລະເບີດເຊິ່ງເປັນໜ້າທີ່ຂອງອົງການຈາກລັດຖະບານລາວທີ່ຈະຕ້ອງເກັບກູ້ລະເບີດເຫຼົ່ານີ້. ອົງການ JMAS ຈະຈັດຕັ້ງປະຕິບັດການເກັບກູ້ລະເບີດໃນພື້ນທີ່ມີລະເບີດທີ່ເມືອງແປ, ເມືອງຄຳ ແລະເມືອງພູກູດ ທີ່ແຂວງຊຽງຂວາງ.

ສະໜັບສະໜຸນໂດຍ: HONDA

  ໂຄງການດັ່ງກ່າວກຳລັງສຸມໃສ່ການເກັບກູ້ໃສ່ເຂດທີ່ດິນປູກຝັງໂດຍຜ່ານມາດຕະຖານຂັ້ນຕອນການປະຕິບັດງານ (SOPs) ເຊິ່ງໄດ້ຮັບການພັດທະນາຜ່ານປະຕິບັດການທາງກົນຈັກທີ່ໄດ້ຮັບການຈັດຕັ້ງພາຍໃຕ້ການຮ່ວມມືກັບອົງການ UXO ລາວ.

ອົງການ JMAS ໄດ້ປະກອບສ່ວນເຂົ້າໃນວຽກງານເກັບກູ້ລະເບີດບໍ່ທັນແຕກທີ່ລາວຢ່າງຫ້າວຫັນເປັນເວລາຫຼາຍປີ, ເປັນຕົ້ນວ່າທີ່ແຂວງຊຽງຂວາງ, ສາລະວັນ, ອັດຕະປື ແລະຈຳປາສັກ ລວມໄປເຖິງນະຄອນຫຼວງວຽງຈັນ.

____________

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

ບໍລິການໂຄສະນາທາງເຟສບຸກ ແລະເວັບໄຊ

ໂທ: 021 313645, 316511

แชร์