ເປີດໂຄງການສິດສອນເພື່ອແມ່ຍິງລາວ

  ສູນກາງສະຫະພັນແມ່ຍິງລາວ ຮ່ວມກັບສະມາຄົມນັກທຸລະກິດແມ່ຍິງລາວ ແລະສະພາການຄ້າເອີຣົບ ປະຈໍາລາວຈັດພິທີເປີດໂຄງການສິດສອນເພື່ອແມ່ຍິງລາວຂຶ້ນໃນວັນທີ 10 ທັນວາ 2019 ທີ່ນະຄອນຫຼວງວຽງຈັນໂດຍມີທ່ານ Hens Luetkenhern ເອກອັກຄະລັດຖະທູດເຢຍລະມັນປະຈໍາລາວ,ທ່ານ Arnaud Aculier ປະທານສະພາການຄ້າເອີຣົບປະຈໍາລາວ ແລະ ບັນດາສະມາຊິກຂອງສະມາຄົມນັກທຸລະກິດແມ່ຍິງລາວເຂົ້າຮ່ວມ.

  ທ່ານ ນາງຈັນທະຈອນ ວົງໄຊ ປະທານຄະນະບໍລິຫານສະມາຄົມນັກທຸລະກິດແມ່ຍິງລາວກ່າວວ່າ: ສະມາຄົມນັກທຸລະກິດແມ່ຍິງລາວປະກອບມີບັນດານັກທຸລະກິດແມ່ຍິງທີ່ເຮັດການຜະລິດ, ການຄ້າ,ການບໍລິການດ້ານຕ່າງໆທັງພາກລັດ ແລະເອກະຊົນ, ສໍາລັບໂຄງການສິດສອນເພື່ອແມ່ຍິງລາວແມ່ນມີຄວາມສໍາຄັນ ແລະຈໍາເປັນທີ່ສຸດຕໍ່ສະມາຊິກສະມາຄົມນັກທຸລະກິດແມ່ຍິງລາວເພາະໂຄງການດັ່ງກ່າວເປັນໜຶ່ງໃນໜ້າທີ່ຂອງສະມາຄົມທີ່ເປັນຕົວແທນໃຫ້ນັກທຸລະກິດແມ່ຍິງລາວໃນການນໍາສະເໜີຂໍ້ຄິດເຫັນພາກສ່ວນກ່ຽວຂ້ອງເພື່ອສົ່ງເສີມອາຊີບໃນຂະແໜງການເສດຖະກິດທີ່ແມ່ຍິງລາວມີຄວາມສາມາດປະຕິບັດໄດ້.

  ໂຄງການສິດສອນເພື່ອແມ່ຍິງລາວຖືເປັນໂຄງການທີ່ຈໍາເປັນ ແລະ ເໝາະສົມກັບແມ່ຍິງທີ່ສຸດໃນການເປີດໂອກາດເຊີນຊວນໃຫ້ຜູ້ປະກອບການແມ່ຍິງລາວໄດ້ສະແດງຄວາມຄິດເຫັນ ແລະ ຈຸດປະສົງຂອງຕົນໃນວຽກງານທີ່ກໍາລັງດໍາເນີນຢູ່ ແລະ ມີແຜນຈະດໍາເນີນໃນຕໍ່ໜ້າ, ຊຶ່ງໃນໄລຍະຜ່ານມາສະມາຄົມນັກທຸລະກິດແມ່ຍິງລາວໄດ້ຈັດກິດຈະກໍາເທສະການອາຫານລາວປະຈໍາປີ, ສົ່ງສະມາຊິກໄປທັກສະນະສຶກສາ, ມີການຝຶກອົບຮົມຍົກລະດັບຄວາມຮູ້ຄວາມສາມາດໃນການພັດທະນາເຕັກນິກ, ວິທະ ຍາສາດ ແລະ ເຕັກໂນໂລຊີຕາມຂະແໜງຕ່າງໆ, ນອກຈາກນັ້ນສະມາຄົມນັກທຸລະກິດແມ່ຍິງລາວຍັງໄດ້ສົມທົບ ກັບສະພາການຄ້າ ແລະ ອຸດສາຫະກໍາແຫ່ງຊາດເພື່ອສົ່ງເສີມສະມາຊິກເຂົ້າຮ່ວມງານວາງສະແດງສິນຄ້າຢູ່ພາຍໃນ ແລະ ຕ່າງປະເທດ.

  ໂອກາດດັ່ງກ່າວ ທ່ານ ນາງ ຈັນທະຈອນ ວົງໄຊໄດ້ຮຽກຮ້ອງໃຫ້ແມ່ຍິງຜູ້ປະກອບການ, ນັກທຸລະກິດ ແລະ ຜູ້ທີ່ມີຄວາມຄິດຢາກລິເລີ່ມເຮັດທຸລະກິດຈົ່ງບັນທຶກເກັບ ກ່ຽວເອົາຄວາມຄິດເຫັນ, ຈຸດປະສົງ ແລະ ເນື້ອໃນບົດຮຽນຈາກການເຂົ້າຮ່ວມໃນຄັ້ງນີ້ໄປໝູນໃຊ້ໃນທຸລະກິດຂອງຕົນ ແລະ ຮຽກຮ້ອງໃຫ້ແມ່ຍິງກຸ່ມຕ່າງໆສະໝັກເຂົ້າ ຮ່ວມໂຄງການດັ່ງກ່າວເພື່ອຈັດຕັ້ງປະຕິບັດໂດຍການຈັດຝຶກອົບຮົມ, ການໃຫ້ຄໍາປຶກສາ ແລະການເຂົ້າເຖິງແຫຼ່ງທຶນຊຶ່ງເປັນປັດໄຈທີ່ສໍາຄັນ ແລະຈໍາເປັນສໍາລັບນັກທຸລະ ກິດແມ່ຍິງເຮົາ, ພິເສດແມ່ນໃນຍົກດີຈິຕອລນີ້ນັກທຸລະກິດແມ່ຍິງຈໍາເປັນຕ້ອງໄດ້ຍົກລະດັບແຜນງານໂຄງການໃນ ຂະແໜງການຕ່າງໆກ່ຽວກັບທຸລະ ກິດເພື່ອສາມາດເຂົ້າຮ່ວມແລກປ່ຽນທຸລະກິດກັບບັນດາປະເທດອາຊຽນ ແລະ ໃນພາກພື້ນໃຫ້ໄດ້ມາດຕະຖານສາກົນນັບມື້ຫຼາຍຂຶ້ນ.

----------------

ໜັງສືພີມເສດຖະກິດ-ສັງຄົມ

แชร์