ກອງປະຊຸມສະຖິຕິທົ່ວປະເທດປະຈຳປີ 2019 ຈັດຂື້ນທີ່ອຸດົມໄຊ

  ກອງປະຊຸມສະຖິຕິທົ່ວປະເທດປະຈຳປີ 2019 ໄດ້ໄຂຂຶ້ນຢ່າງເປັນທາງການໃນວັນທີ 12 ທັນວາຜ່ານມານີ້ທີ່ຫ້ອງປະຊຸມພະແນກແຜນການ ແລະການລົງທຶນແຂວງອຸດົມໄຊ ໂດຍການເປັນປະທານຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະການລົງທຶນ, ມີທ່ານ ສົມຈິດ ປັນຍາສັກ ຮອງເຈົ້າ ແຂວງໆອຸດົມໄຊ, ພ້ອມນີ້ກໍມີທ່ານຫົວໜ້າສູນສະຖິຕິແຫ່ງຊາດ, ມີບັນດາຮອງເຈົ້າແຂວງ, ຫົວໜ້າສູນສະຖິຕິທົ່ວປະເທດ ແລະ ພາກສ່ວນທີ່ກ່ຽວຂ້ອງເຂົ້າ ຮ່ວມ.

  ທ່ານ ສອນໄຊ ສິພັນດອນ ໄດ້ກ່າວເປີດກອງປະຊຸມຢ່າງເປັນທາງການພ້ອມທັງຕີລາຄາສູງກ່ຽວກັບກອງປະຊຸມຄັ້ງນີ້ເຊີ່ງເປັນກອງປະຊຸມທີ່ມີຄວາມໝາຍຄວາມສຳຄັນຫຼາຍສຳລັບວຽກງານສະຖິຕິແຫ່ງຊາດ,

 ມີຄວາມສຳຄັນຄວາມຈຳເປັນ ແລະຜົນສຳເລັດກ່ຽວກັບວຽກງານສະຖິຕິຫຼາຍໆດ້ານຢູ່ໃນຂະແໜງການຂັ້ນສູນກາງ ແລະຂັ້ນທ່ອງຖີ່ນໃນຂອບເຂດທົ່ວປະເທດ, ບໍ່ວ່າຈະເປັນການສຳຫຼວດໃຫຍ່, ສຳຫຼວດລະດັບຊາດ, ສຳຫຼວດຕົວແທນກໍ່ຄືການຄົ້ນຄວ້າວິໄຈບັນຫາຂໍ້ມູນສະຖິຕິທາງການທີ່ສະໜອງໃຫ້ແກ່ການຕີລາຄາສະພາບການພັດທະ ນາເສດຖະກິດ-ສັງຄົມ, ທ່ານຍັງໄດ້ກ່າວຕື່ມວ່າຂໍ້ມູນສະຖິຕິສຸດທີ່ມີຄວາມສຳຄັນ ແລະມີປະໂຫຍດຫຼາຍໃຫ້ແກ່ລັດຖະບານ ແລະອົງການຈັດຕັ້ງສາກົນກໍ່ຄືຄູ່ຮ່ວມພັດທະ ນາເພາະເປັນບ່ອນອີງພື້ນຖານທີ່ສຸດໃຫ້ແກ່ການສ້າງແຜນ ແລະ ການຈັດຕັ້ງປະຕິບັດບັນດາແຜນງານຕ່າງໆທີ່ຊ່ວຍຍູ້ໜູນປະກອບສ່ວນໃຫ້ແກ່ການພັດທະນາ ແລະສ້າງສາພັດທະນາປະເທດຊາດຂອງພວກເຮົາຢ່າງຕໍ່ເນື່ອງ.

ສະໜັບສະໜຸນໂດຍ: HONDA

 ກອງປະຊຸມຄັ້ງນີ້ບັນດາຜູ້ແທນແມ່ນຈະໄດ້ຮັບຟັງການສະຫຼຸບ ແລະທິດທາງວຽກງານລະບົບສະຖິຕິແຫ່ງຊາດ, ສະຫຼຸບວຽກງານປີ 2019, ແຜນປີ 2020 ແລະທິດ ທາງແຜນການ5 ປີ ຂອງລະບົບສະຖິຕິແຫ່ງຊາດ, ທົບທວນຄືນການຈັດຕັ້ງປະຕິບັດຍຸດທະສາດ ແລະກົດໝາຍວ່າດ້ວຍສະຖິຕິ, ການຈັດຕັ້ງປະຕິບັດຄຳສັ່ງສະບັບເລກທີ່ 19/ນຍ ສຳລັບການຈັດຕັ້ງສະຖິຕິສາຍຂວາງ, ທົບທວນຜົນການຈັດຕັ້ງປະຕິບັດຍຸດທະສາດການພັດທະນາລະບົບສະຖີຕິແຫ່ງຊາດປີ 2016-2027 ແລະ ວິໄສທັດປີ 2030 ການປະເມີນຄືນກ່ຽວກັບ 4 ແຜນແມ່ບົດ, ທົບທວນຄືນບັນດາຕົວຊີ້ບອກແຫ່ງຊາດ, ລະບົບຕິດຕາມ ແລະ ການປະເມີນການພັດທະນາເສດຖະກິດ-ສັງ ຄົມແຫ່ງຊາດ, ແຜນພັດທະນາສະຖິຕິສີ່ງແວດລ້ອມ, ບົດບາດສະຖິຕິ ແລະການນຳໃຊ້ຂໍ້ມູນຕໍ່ວຽກງານຕິດຕາມ, ປະເມີນຜົນ, ວາງແຜນນະໂຍບາຍຂັ້ນແຂວງ, ການ

ຈັດຕັ້ງປະຕິບັດວຽກງານສະຖິຕິຂັ້ນແຂວງ, ພ້ອມທັງຖອດຖອນບົດຮຽນຜ່ານມາ ແລະແຜນການ 2020-2025. ສະຖິຕິ ຂັ້ນບ້ານ, ວຽກງານການຂຶ້ນທະບຽນພົນ ລະເມືອງ,  ການຂຶ້ນທະບຽນ-ຈົດນັບພົນລະເມືອງ ແລະການຂຶ້ນທະບຽນວິສາຫະກິດ, ຄວາມຄືບໜ້າການກະກຽມການສຳຫຼວດສະຖິຕິກະສິກຳ ແລະ ການສຳຫຼວດສະຖິຕິເສດຖະກິດທົ່ວປະເທດຄັ້ງທີ່ 3, ວຽກງານການສ້າງຖານຂໍ້ມູນ ແລະເຜີຍແຜ່ຂໍ້ມູນສະຖິຕິທາງການ,  ໂດຍຜ່ານລະບົບເວບໄຊຂອງສູນສະຖິຕິແຫ່ງຊາດການຫັນປ່ຽນທັນສະໄໝ ແລະທັນເວລາ. ກອງປະຊຸມຍັງໄດ້ເປີດກ້ວາງໃຫ້ບັນດາຜູ້ແທນໄດ້ປະກອບຄວາມຄິດເຫັນເຂົ້າໃນແຕ່ລະວຽກງານເພື່ອໃຫ້ມີຄວາມເປັນເອກະພາບກັນໃນທົ່ວປະເທດ.

__________

ຂຽນໂດຍ: ແສງອາທິດ  
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

ບໍລິການໂຄສະນາທາງເຟສບຸກ ແລະເວັບໄຊ

ໂທ: 021 313645, 316511

แชร์