ແຂ່ງຂັນກີລາສາຍນັກຮຽນສາມັນສຶກສາທົ່ວເມືອງຜາໄຊ

   ງານແຂ່ງຂັນກີລາ-ສິລະປະສາຍນັກຮຽນສາມັນສຶກສາຄັ້ງທີ  IV ທົ່ວເມືອງຜາໄຊແຂວງຊຽງຂວາງໄຂຂຶ້ນເປັນທາງການໃນຕອນເຊົ້າຂອງວັນທີ 25 ມັງ ກອນຜ່ານມາທີ່ເດີ່ນໂຮງຮຽນມັດທະຍົມຕອນຕົ້ນລາດແສນ, ພາຍໃຕ້ການເປັນປະທານຂອງທ່ານ ສີອໍາໄພ ບຸດດາລາທົນ ຫົວໜ້າຫ້ອງການສຶກສາທິການ ແລະກີລາເມືອງ, ໂດຍເປັນກຽດເຂົ້າຮ່ວມຂອງທ່ານບຸນມາ ສຸຍະວົງຮອງເຈົ້າເມືອງໆຜາໄຊ, ທ່ານທອງຜີວ ສີປັນຍາຮອງຫົວໜ້າພະແນກສຶກສາທິການ ແລະກີລາແຂວງ, ມີຂະແໜງການທີ່ກ່ຽວຂ້ອງຂອງພະແນກ, ໜ່ວຍງານທີ່ກ່ຽວຂ້ອງຫ້ອງການ (ສກມ), ຜູ້ ອໍານວຍການໂຮງຮຽນປະຖົມ-ມັດທະຍົມຕົ້ນທົ່ວເມືອງຜາໄຊຕະຫຼອດຮອດຄູ-ອາຈານ ແລະນັກກີລາ-ສິລະປະແຕ່ລະພາກສ່ວນເຂົ້າຮ່ວມ.

   ການຈັດງານແຂ່ງຂັນກີລາ-ສິລະປະສາຍນັກຮຽນສາມັນສຶກສາທົ່ວເມືອງຜາໄຊຄັ້ງນີ້ເປັນຄັ້ງທີ IV, ໂດຍມອບໝາຍໃຫ້ໂຮງຮຽນມັດທະຍົມຕອນຕົ້ນລາດແສນເປັນເຈົ້າພາບ ແລະມີການໝູນວຽນກັນໄປແບບນີ້ເລື້ອຍໆໃນແຕ່ລະໂຮງຮຽນ, ພ້ອມນັ້ນຍັງໄດ້ກໍານົດເອົາ 7 ປະເພດກີລາຈັດການແຂ່ງຂັນຄື: ບານ ເຕະ, ບານສົ່ງ, ກະຕໍ້, ເປຕັງ, ແລ່ນລານ, ເຕັ້ນຍາວ ແລະດຶງເຊືອກ, ສ່ວນປະເພດແຂ່ງຂັນສິລະປະ-ປະກອບມີບົດຟ້ອນລວມໝູ່ຍິງ, ໝູ່ຊາຍ ແລະລວມໝູ່ຍິງ-ຊາຍມີທັງໝົດ 30 ກ່ວາລາຍການ, ໃນນັ້ນມີທັບນັກກີລາ ແລະສິລະປະທີ່ມາຈາກໂຮງຮຽນຊັ້ນປະຖົມ 18 ແຫ່ງ, ຊັ້ນມັດທະຍົມຕົ້ນ 8 ແຫ່ງ, ລວມທັງໝົດ 680 ຄົນ, ຍິງ 301 ຄົນ.

   ໃນໂອກາດດັ່ງກ່າວນີ້ພະແນກສຶກສາທິການ ແລະກີລາແຂວງຍັງໄດ້ນໍາເອົາເງິນສົດພ້ອມດ້ວຍອຸປະກອນກິລາຈໍານວນໜຶ່ງມອບໃຫ້ແກ່ງານຕື່ມອີກຊຶ່ງປະ ກອບມີ: ບານເຕະ 10 ໜ່ວຍ, ໜ່າງບານເຕະ 2 ດາງ, ບານສົ່ງ 2 ໜ່ວຍ, ເງິນສົດ 1,5 ລ້ານກີບ, ລວມມູນຄ່າທັງໝົດ 2,5 ລ້ານກີບ. ໃຫ້ກຽດກ່າວມອບໂດຍທ່ານທອງຜີວ ສີປັນຍາຮອງຫົວໜ້າພະແນກສຶກສາທິການ ແລະກີລາແຂວງ ແລະກ່າວຮັບໂດຍທ່ານສີອໍາໄພ ບຸດດາລາທົນຫົວໜ້າຫ້ອງການສຶກ ສາທິການ ແລະກີລາເມືອງຜາໄຊ.

แชร์