ສະມາຄົມຈີນ ຄອງແຊັມບານບ້ວງ ຊີງຂັນເຈົ້າຄອງ ນວ 3 ສະໄໝຊ້ອນ

  ທີມນັກກີລາບານບ້ວງສະມາຄົມຈີນ ຍັງຄົງຄວາມຍິ່ງໃຫຍ່ ຄືເກົ່າຫຼັງໂຊຟອມເດັ່ນໄລ່ເອົາຊະນະທີມອາລີມິກ ໄປແບບຂາດຮອຍ 63-35 ຄະແນນຄອງແຊັມການ ແຂ່ງຂັນກີລາບານບ້ວງ 9 ຕົວ ເມືອງ ທົ່ວນະຄອນຫຼວຽງຈັນ ຊີງ ຂັນທ່ານເຈົ້າຄອງນະຄອນຫຼວງ ວຽງຈັນ (ນວ) ເພື່ອເລືອກເຟັ້ນ ນັກກີລາບານບ້ວງທີ່ມີພອນສະຫວັນດີເດັ່ນຮ່ວມລ່າຫຼຽນຄຳໃນ ງານມະຫາກຳກີລາແຫ່ງຊາດຄັ້ງ ທີ XI ທີ່ແຂວງຊຽງຂວາງ ຮັບກຽດເປັນເຈົ້າພາບໃນຕົ້ນປີ 2020.

ການແຂ່ງຂັນຄັ້ງນີ້ໄດ້ມີຂຶ້ນອາ ທິດຜ່ານມາ ທີ່ໂຮງຮຽນລຽວໂຕ້ ເມືອງຈັນທະບູລີ ນະຄອນຫຼວງ ວຽງຈັນ, ໂດຍໃຫ້ກຽດເຂົ້າຮ່ວມ ແລະມອບລາງວັນຂອງທ່ານ ພູ ທອນ ແສງດາວົງ ຮອງຫົວໜ້າພະ ແນກສຶກສາທິການ ແລະກີລານະຄອນຫຼວງວຽງຈັນ ແລະທ່ານ ໄຊໂລດ ກະມົນລັດຕະນາປະທານ ສະຫະພັນກີລາບານບ້ວງ ນະຄອນ ຫຼວງວຽງຈັນ ພ້ອມດ້ວຍປະທານສະມາຄົມຈີນ ປະຈຳ ສປປ ລາວ, ຜູ້ໃຫ້ການສະໜັບສະໜູນ, ຄະນະນຳ, ຄູຝຶກ ແລະນັກກີລາຕະຫຼອດຮອດກອງເຊຍແຕ່ລະທີມ.

ການແຂ່ງຂັນຄັ້ງນີ້ຈັດຂຶ້ນເພື່ອເປັນການສ້າງຂະບວນການສະເຫຼີມສະຫຼອງແລະຊົມເຊີຍວັນສຳຄັນຕ່າງໆຂອງພັກ-ຂອງຊາດພ້ອມທັງເປັນການຄັດເລືອກນັກກີລາທີ່ມີ ຄວາມສາມາດ ແລະພອນສະຫວັນດີເດັ່ນຕາງໜ້າທັບນັກກີລານວສົ່ງເຂົ້າຮ່ວມງານມະຫາກຳກີລາແຫ່ງຊາດ ຄັ້ງທີ Xl ຫຼື ຊຽງຂວາງ ເກມ ທີ່ແຂວງຊຽງຂວາງ ຮັບກຽດເປັນ ເຈົ້າພາບລະຫວ່າງວັນທີ 22 ມີນາຫາ 1 ເມສາ 2020 ລາຍການດັ່ງ ກ່າວຈັດຂຶ້ນ 3 ຮຸ່ນ ຄື: ຮຸ່ນອາຍຸ 19 ປີຊາຍ ແລະຮຸ່ນທົ່ວໄປຍິງ-ຊາຍ ສຳລັບຮຸ່ນອາຍຸ 19 ປີຊາຍ ມີ 7 ພາກສ່ວນ, ສ່ວນຮຸ່ນທົ່ວໄປຍິງມີ 7 ພາກສ່ວນ ແລະຮຸ່ນທົ່ວໄປຊາຍ ມີ 8 ພາກສ່ວນທັງ 3 ຮຸ່ນດັ່ງກ່າວ ແຕ່ລະຮຸ່ນໄດ້ແບ່ງອອກເປັນ 2 ກຸ່ມ ແຂ່ງຂັນພົບກັນໝົດຄັດເອົາທີ 1-2 ແຕ່ລະຮຸ່ນຜ່ານເຂົ້າຮອບຕໍ່ໄປການ ແຂ່ງຂັນແມ່ນເລີ່ມມາແຕ່ວັນ ທີ 20 ພະຈິກ ຫາ 7 ທັນວາ 2019.

ຜ່ານການແຂ່ງຂັນໃນນັດຊີງ  ຊະນະເລີດປະເພດທີມຊາຍຮຸ່ນທົ່ວ ໄປຜົນປະກົດວ່າທີມສະມາຄົມຈີນ ຍັງຄົງຄວາມແຂງແກ່ນສົມເປັນ  ແຊັມເກົ່າ 2 ສະໄໝ ໄລ່ເອົາຊະນະ ທີມອາລີມິກ ໄປແບບຂາດຮອຍ 63-35 ຄະແນນ ຄອງແຊ໋ມກີລາ ບານບ້ວງ 9 ຕົວເມືອງ ທົ່ວນະ ຄອນຫຼວຽງຈັນ ຊີງຂັນທ່ານເຈົ້າ ຄອງ ນວ ໄປຄອງ ແລະເປັນແຊັມສະໄໝທີ 3 ຕິດຕໍ່ກັນພ້ອມທັງໄດ້ເງິນລາງວັນ 3 ລ້ານກີບ ສ່ວນທີມ ອາລີມິກ ໄດ້ຮັບຂັນ 1 ໜ່ວຍ ພ້ອມ ເງິນສົດ 1,5 ລ້ານກີບ, ອັນດັບ 3 ທີມຟາມ້າ ໄດ້ຮັບຂັນ 1 ໜ່ວຍ ພ້ອມ ເງິນສົດ1 ລ້ານກີບ ແລະອັນດັບ 4 ທີມອິວເລີ ໄດ້ຮັບລາງວັນຊົມເຊີຍ 6 ແສນກີບ.

ຂະນະທີ່ຜົນການແຂ່ງຂັນປະເພດຮຸ່ນທົ່ວໄປຍິງອັນດັບ 1 ຟາມ້າ 1, ອັນດັບ 2 ຟາມ້າ2 ແລະ ອັນດັບ 3 ມສ ຮ່ອງຄ້າ, ຂະນະທີ່ ຮຸ່ນນອາຍຸ 19 ປີ ອັນດັບ 1 ເຈົ້າ ຖິ່ນໂຮງຮຽນລຽວໂຕ້, ອັນດັບ 2 ໂຮງຮຽນເອໄອເອັດ ແລະອັນດັບ 3 ທີມບັດ ໂດຍທັງ 2 ຮຸ່ນດັ່ງກ່າວ ອັນດັບ 1 ໄດ້ຮັບຂັນ 1 ໜ່ວຍພ້ອມເງິນສົດທີມລະ 8 ແສນກີບ, ອັນດັບ 2 ໄດ້ຮັບຂັນ 1 ໜ່ວຍ ພ້ອມເງິນສົດທີມລະ 6 ແສນກີບ ແລະອັນດັບ 3 ໄດ້ຮັບຂັນ 1 ໜ່ວຍ ພ້ອມເງິນສົດທີມລະ 4 ແສນກີບ.

----------------------

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์