ຄຳໄພນຳກະສິກຳພັດທະນາຊົນນະບົດຊ່ວຍປົດຄວາມທຸກຍາກແຂວງໄຊສົມບູນ

  ບໍລິສັດກຸ່ມ ຄຳໄພຊະນະ ຈຳກັດ ຜູ້ດຽວຕັດສິນໃຈເສຍສະຫຼະຊັບສິນສ່ວນຕົວໃສ່ການປະກອບສ່ວນແກ້ໄຂຄວາມທຸກຍາກຂອງປະຊາຊົນໃນເຂດຫ່າງໄກໂດຍນຳເອົາການຜະລິດກະສິກຳສະອາດຄົບວົງຈອນເປັນສິນຄ້າເຂົ້າໄປຊ່ວຍພັດທະນາເພື່ອຍົກລະດັບຊີວິດການເປັນຢູ່ຂອງປະຊາຊົນຄອບຄົວຜູ້ທຸກຍາກແຂວງໄຊສົມບູນໂດຍລິເລີ່ມຈາກການໃຫ້ແນວຫຍ້າປີໜ້າລ້ຽງງົວ, ຕໍ່ດ້ວຍແນວພັນໝູພື້ນບ້ານຫຼ້າສຸດແມ່ນມອບງົວແມ່ພື້ນເມືອງລາວຈຳນວນ 209 ໂຕ ແລະ ຍັງມີອີກຫຼາຍແຜນງານທີ່ຈະດຳເນີນການຕາມທິດທາງຂອງພັກ ແລະ ລັດຖະບານໃນການຜະລິດເປັນສິນຄ້າຕອບສະໜອງໃຫ້ພຽງພໍກັບຄວາມຕ້ອງການຂອງຕະຫຼາດພາຍໃນເປັນການສ້າງອາຊີບທີ່ໝັ້ນຄົງ ແລະ ມີລາຍໄດ້ທີ່ຍືນຍົງ.

ທ່ານ ຄຳໄພ ສົມຊະນະ ປະທານບໍລິສັດກຸ່ມ ຄຳໄພຊະນະ ຈຳກັດຜູ້ດຽວ ກ່າວວ່າ: ໂຄງການ KPG ປັບປຸງຊີວິດການເປັນຢູ່ປະຊາຊົນເພື່ອແກ້ໄຂຄວາມທຸກຍາກທີ່ແຂວງໄຊສົມບູນແມ່ນໜຶ່ງໃນການຜັນຂະຫຍາຍເນື້ອໃນຈິດໃຈຂອງກອງປະຊຸມຂະບວນການແຂ່ງຂັນຮັກຊາດ ແລະ ພັດທະນາຕິດພັນກັບການພັດທະນາຊົນນະບົດເພື່ອແກ້ໄຂຄວາມທຸກຍາກຂອງປະຊາຊົນຂອງລັດຖະບານຊຶ່ງໄດ້ເລັງເຫັນທ່າແຮງດ້ານກະສິກຳ ແລະມູນເຊື້ອດຸໝັ່ນຂະຫຍັນພຽນຂອງປະຊາຊົນລາວບັນດາເຜົ່າໂດຍສະເພາະແມ່ນຊາວເຜົ່າມົ້ງລາວເຮົາທີ່ມີຄວາມມຸ່ງໝັ້ນອົດທົນ ແລະ ຂະຫຍັນຂັນແຂງໃນການຍົກລະດັບຊີວິດການເປັນຢູ່  ດັ່ງນັ້ນຈິ່ງຕັດສິນໃຈປະກອນສ່ວນພັດທະນາເສດຖະກິດຕິດພັນການແກ້ໄຂຄວາມທຸກຍາກທີ່ແຂວງໄຊສົມບູນຊຶ່ງເປັນໜຶ່ງໃນແຂວງທີ່ມີຄວາມອຸດົມສົມບູນຂອງສະພາບດິນ ແລະ ສະພາບອາກາດທີ່ເອື້ອອຳນວຍໃຫ້ແກ່ການຜະລິດກະສິກຳ (ປູກຝັງ-ລ້ຽງສັດ) ແຕ່ດ້ວຍພື້ນຖານໂຄງລ່າງຂອງແຂວງທີ່ຍັງຢູ່ໃນໄລຍະປັບປຸງກໍ່ສ້າງເພາະເປັນ ແຂວງຕັ້ງໃໝ່ທີ່ສຳຄັນແມ່ນຍັງມີ ຄອບຄົວທຸກຍາກຫຼາຍສຸດທີ່ປະ ມານ 3,6 ພັນຄອບຄົວ ຈາກທັງໝົດ 7,8 ພັນຄອບຄົວ.

ສະໜັບສະໜຸນໂດຍ: HONDA

  ທັງນີ້ໂຄງການໄດ້ເລີ່ມຕົ້ນສ້າງແຫຼ່ງອາຫານໃຫ້ງົວທີ່ຈະນຳເຂົ້າມາລ້ຽງເພື່ອເປັນສິນຄ້າໃນອະນາຄົດຊຶ່ງເມື່ອເດືອນພຶດສະພາປີ 2018 ກໍໄດ້ນຳແກ່ນຫຍ້າ 4,5 ໂຕນໄປມອບໃຫ້ຄອບຄົວທຸກຍາກໃນ 3 ເມືອງຄື: ລ້ອງຊານ, ລ້ອງແຈ້ງ ແລະເມືອງທ່າໂທມ ຕໍ່ຈາກນັ້ນກໍມອບແມ່ພັນໝູພື້ນເມືອງ 250 ໂຕ ໃຫ້ 125 ຄອບຄົວຖືກຄອບ ຄົວລະ 2 ໂຕຢູ່ບ້ານອອມ ແລະ ບ້ານກໍໄຮ ເມືອງອານຸວົງ ແລະ ເມື່ອວັນທີ 11 / 11 / ຜ່ານມານີ້ໂຄງການກໍໄດ້ສືບຕໍ່ມອບງົວແມ່ພັນພື້ນເມືອງລາວ 209 ໂຕໃຫ້ 104 ຄອບຄົວ ທຸກຍາກໃນ 2 ບ້ານດັ່ງກ່າວເພື່ອເປັນພໍ່ແມ່ພັນໃຫ້ປະຊາຊົນນຳໄປລ້ຽງໄດ້ອອກແມ່ແຜ່ລູກແລ້ວໂຄງການຈະເກັບຊື້ຄືນ ໂດຍໃນກຳນົດ 4 ປີ ຄືຮອດວັນທີ 11 ເດືອນ 11 ປີ 2023 ປະຊາຊົນຈະຕ້ອງສົ່ງ 2 ແມ່ພັນທີ່ດີທີ່ສຸດຄືນໃຫ້ໂຄງການເພື່ອໃຫ້ໂຄງການສືບຕໍ່ມອບໃຫ້ແກ່ບັນດາຄອບຄົວທຸກຍາກໃນແຕ່ລະບ້ານແຕ່ລະເມືອງຕໍ່ໆໄປ.

  ນອກຈາກໂຄງການທີ່ຍົກມາຂ້າງເທິງນັ້ນແລ້ວ ທ່ານ ຄຳໄພ ສົມຊະນະ ຍັງໄດ້ວາງແຜນຈະສືບຕໍ່ຈັດຕັ້ງປະຕິບັດຫຼາຍໆວຽກງານໃນໂຄງການຜະລິດກະສິກຳສະອາດຄົບວົງຈອນຊຶ່ງເປັນໜຶ່ງໃນການເຊື່ອມສານແຜນການຜະລິດປູກຝັງ-ລ້ຽງສັດເພື່ອສ້າງຜະລິດຕະພັນສະອາດປັດສະຈາກສານເຄມີທີ່ເປັນອັນຕະລາຍໃນນັ້ນຈະມີທັງສູນຮຽນຮູ້ຂອງຊຸມຊົນທີ່ເນັ້ນກະສິກຳ ແລະການຜະລິດທີ່ເປັນມິດຕໍ່ສິ່ງແວດລ້ອມຢູ່ໃນຂອບເຂດເມືອງອະນຸວົງ, ລ້ອງຊານ, ລ້ອງແຈ້ງ ແລະເມືອງທ່າໂທມ ໂດຍຈະໃຊ້ເງິນລົງທຶນລວມທັງໝົດ 58,01 ລ້ານໂດລາສະຫະລັດ.

  ເພື່ອເຮັດໃຫ້ໂຄງການດັ່ງກ່າວປະສົບຜົນສຳເລັດສາມາດປະກອບສ່ວນຢ່າງແຂງແຮງໃນແຜນຍຸດທະສາດລຶບລ້າງຄວາມທຸກຍາກຂອງລັດຖະບານໂດຍໂຄງການຫວັງວ່າລັດຖະບານຈະໃຫ້ການສະໜັບສະໜູນ ແລະເອື້ອຍອຳນວຍຄວາມສະດວກໃນດ້ານຕ່າງໆເປັນຕົ້ນແມ່ນທາງດ້ານທຶນຮອນໃນອັດຕາດອກເບ້ຍ ແລະໄລຍະເວລາສົມເຫດສົມຜົນທັງນີ້ທ່ານ ຄຳໄພ ສົມ ຊະນະປະທານບໍລິສັດກຸ່ມຄຳໄພຂະນະຈຳກັດຜູ້ດຽວສະເໜີໃຫ້ລັດກໍຄືຜູ້ທີ່ກ່ຽວຂ້ອງຂອງທະນາຄານທຸລະກິດດ້ານກະສິກຳຂອງລັດຈົ່ງໄດ້ເຫັນຄວາມສຳຄັນກັບໂຄງການນີ້ ແລະເອົາໃຈໃສ່ທຸກໆນັກທຸລະກິດຜູ້ເຮັດແທ້ທຳຈິງເພາະທຸກເວລາມີຄຸນຄ່າ, ມັກຮັກດ້ານກະສິກຳ,ມີທຶນຕົນເອງຢ່າງນ້ອຍ 50-60% ຍ້ອນຜົນປະໂຫຍດແທ້ໆທີ່ຈະໄດ້ຮັບແມ່ນເປັນຂອງປະຊາຊົນຜູ້ທຸກຍາກການປະຕິບັດໂຄງການກໍບໍ່ມີຄວາມສ່ຽງຫຍັງຍ້ອນມີວິຊາການຊຳນານງານດ້ານນີ້ໂດຍສະເພາະມີຕະຫຼາດຈຳໜ່າຍທີ່ແນ່ນອນທີ່ສຳຄັນຄືຜູ້ເປັນເຈົ້າຂອງໂຄງການ ແມ່ນເຮັດແທ້ທຳຈິງມີທຶນມີຮອນທີ່ເຄີຍເຮັດທຸລະກິດຜ່ານມາຫຼາຍສິບປີ ແລະ ປະສົບຜົນສຳເລັດຫຼາຍໆ ໂຄງການແຕ່ນ້ອຍຫາໃຫຍ່ຢູ່ຂັ້ນ ສູນກາງ ແລະທ້ອງຖີ່ນທີ່ຈະສຸມທຸກ ກຳລັງແຮງໃນການປະຕິບັດໂຄງ ການນີ້ເພື່ອຊ່ວຍປະຊາຊົນຜູ້ທຸກຍາກໃນແຕ່ລະບ້ານແຕ່ລະເມືອງ ແລະ ແຕ່ລະແຂວງທີ່ທຸກຍາກໃນຂອບເຂດທົ່ວປະເທດ ແລະ ສະເໜີພາກສ່ວນກ່ຽວຂ້ອງທຸກທະນາຄານຈົ່ງມີສະຕິໃນການປ່ອຍສິນເຊື່ອທຸກໆໂຄງການຖ້າເຮົາບໍ່ມີສະຕິແລ້ວຖືວ່າໂຄງການລົ້ມເຫຼ້ວ ແລະ ຈະຕົກເປັນເຫຍື່ອຂອງກຸ່ມຄົນບໍ່ດີສວຍໂອກາດໄດ້ທຸກເມື່ອ ແລະ ຖ້າມີສະຕິດີກໍຈະໄດ້ນັກທຸລະກິດທີ່ດີມີຄວາມສ່ຽງນ້ອຍເອົາທຶນໄປພັດທະນາຖືກເປົ້າໝາຍປະກອບສ່ວນ ພັດທະນາທຸລະກິດກໍຄືປະເທດຊາດ ແລະ ປະຊາຊົນກໍຈະຮັ່ງມີເຂັ້ມແຂງຫຼຸດພົ້ນອອກຈາກຄວາມທຸກຍາກເທື່ອລະກ້າວສົມຄວາມມຸ່ງມາດປາດຖະໜາຂອງພັກ ແລະລັດຖະບານ.

--------------------

ໜັງສືພີມເສດຖະກິດ-ສັງຄົມ

 

แชร์