ຝຶກວິຊາຊີບການຕັດຫຍິບ, ການອອກແບບ ແລະສີມືຫັດຖະກຳ

  ເພື່ອສືບຕໍ່ໃນການຈັດຕັ້ງປະຕິບັດແຜນດຳເນີນໂຄງການຝຶກອົບຮົມວິຊາຊີບການຕັດຫຍິບໃຫ້ຕໍ່ເນື່ອງເມື່ອອາທິດຜ່ານມາໄດ້ມີພິທີເປີດການຝຶກອົບຮົມວິຊາຊີບການຕັດຫຍິບ, ການອອກແບບຍ້ອມສີທຳມະຊາດ ແລະ ສີມືຫັດຖະກຳຊຸດທີ 5 ໂດຍການເປັນປະທານຂອງທ່ານ ວົງເພັດ ອຸດົມລິດ ຮອງຫົວໜ້າພະແນກສຶກສາທິການ ແລະ ກີລາແຂວງທັງເປັນຜູ້ຊີ້ນຳສູນການສຶກສານອກໂຮງຮຽນ, ເຂົ້າຮ່ວມມີທ່ານ ຄຳຫຼ້າ ວິໄລທອງ ຫົວໜ້າສູນການສຶກສານອກໂຮງຮຽນ, ທ່ານ ນາງ ເຈນເນັດ ໄທເລີ ຕາງ ໜ້າສູນອົງການລີອ໋ອດຜູ້ໃຫ້ທຶນພ້ອມດ້ວຍພະນັກງານຄູ-ອາຈານ ແລະ ນັກສຳມະນາກອນເຂົ້າຮ່ວມ.

ສະໜັບສະໜຸນໂດຍ: HONDA

  ການຝຶກອົບຮົມວິຊາຊີບການຕັດຫຍິບ, ການອອກແບບຍ້ອມສີທຳມະຊາດ ແລະສີມືຫັດຖະກຳຊຸດທີ 5 ໃນຄັ້ງນີ້ແມ່ນໃຊ້ເວລາ 5 ເດືອນ ໂດຍແບ່ງອອກເປັນ 2 ວິຊາ ຫຼັກຄື: ການຕັດຫຍິບ, ອອກແບບ ແລະຍ້ອມສີ/ສີມືຫັດຖະກຳ ແລະແຍກອອກເປັນ 8 ວິຊາການຍ່ອຍ, ການຕັດຫຍິບ, ອອກແບບວິຊາຮຽນທັງໝົດແມ່ນເນັ້ນເຄື່ອງ ນຸ່ງຂອງແມ່ຍິງຊຶ່ງປະສົມປະສານແບບເຄື່ອງສາກົນ ແລະ ເຄື່ອງເເບບລາວ ປະກອບມີ 3 ວິຊາຄື: ພື້ນຖານການຕັດຫຍິບ, ການແຕ້ມແບບ ແລະ ການຕັດຫຍິບ, ວິຊາຍ້ອມສີສີມືຫັດຖະກຳປະກອບມີ 5 ພາກ: ພື້ນຖານການຍ້ອມສີທຳມະຊາດ, ການອອກແບບລວດລາຍຍ້ອມສີ, ການເພັນຜ້າລາຍ, ການຫຍິບກະເປ໋ົາ ແລະການປະດິດເຄື່ອງໃຊ້ຄົວເຮືອນ ແລະ ການປະດິດໂບ-ກິບໜີບຜົມສຳລັບການຮຽນແມ່ນຮຽນວັນຈັນຫາວັນສຸກ, ສ່ວນເງື່ອນໄຂຜູ້ສະໝັກແມ່ນເພດຍິງອາຍຸ 18-45 ປີມີ ທີ່ຢູ່ອາໄສພາຍໃນແຂວງຫຼວງພະບາງ, ຈົບການສຶກສາປະຖົມສຶກສາຂຶ້ນໄປ, ມີຄວາມຮັກມັກໃນວິ ຊາຊີບດັ່ງກ່າວ, ເປັນຜູ້ທີ່ທຸກຍາກບໍ່ມີວຽກເຮັດງານທຳ, ມີຄວາມອົດທົນດຸໝັ່ນພາກພຽງ, ມີສຸຂະພາບທີ່ແຂງແຮງ ແລະໃນຊຸດນີ້ແມ່ນມີຜູ້ມາສະໝັກເຂົ້າຮ່ວມທັງໝົດ 68 ຄົນ ຈາກເມືອງຕ່າງໆໃນນັ້ນທາງໂຄງການໄດ້ຄັດເລືອກເອົາພຽງແຕ່ 21 ຄົນໂດຍຜ່ານການທົດສອບ-ສຳພາດ.

  ສໍາລັບຈຸດປະສົງຫຼັກຂອງໂຄງການເເມ່ນເພື່ອດຳເນີນໂຄງການຝຶກອົບຮົມວິຊາຊີບການຕັດຫຍິບ,ການອອກແບບຍ້ອມສີທຳມະຊາດ ແລະ ສີມືຫັດຖະກຳໃຫ້ປະຊາຊົນພາຍໃນແຂວງຫຼວງພະບາງໂດຍສະເພາະແມ່ຍິງຜູ້ທີ່ດ້ອຍໂອກາດທາງການສຶກສາ, ບໍ່ມີວຽກເຮັດງານທຳ, ເພື່ອເປັນການເສີມສ້າງອາຊີບ, ສ້າງລາຍຮັບ ແລະ ປັບປຸງຊີວິດການເປັນຢູ່ໃຫ້ດີຂຶ້ນເທື່ອລະກ້າວອີກດ້ານໜຶ່ງກໍ່ເພື່ອສົ່ງເສີມໃຫ້ມີຜະລິດຕະພັນພາຍໃນໃຫ້ມີຄວາມຫຼາກຫຼາຍໂດຍນຳໃຊ້ວັດຖຸດິບທຳມະຊາດຈາກທ້ອງຖິ່ນເພື່ອຕອບສະໜອງຄວາມຮຽກຮ້ອງຕ້ອງການຂອງຕະຫຼາດກໍ່ຄືສັງຄົມໃຫ້ພຽງພໍ.

--------------------

ໜັງສືພີມເສດຖະກິດ-ສັງຄົມ

แชร์