ເປີດນຳໃຊ້ໂຮງຮຽນມູນລະປະຖົມ2ແຫ່ງທີ່ສາລະວັນ

   ໃນລະຫວ່າງວັນທີ 24-25 ມັງກອນ 2019. ສະມາຄົມເຢຍລະມັນ-ລາວເພື່ອການພັດທະນາ ແລະຜູ້ສະໜອງທຶນໃນການຊ່ວຍເຫຼືອຂອງມູນນິທິເຢຍລະ ມັນໃນການສ້າງໂຮງຮຽນມູນລະປະຖົມ 2 ແຫ່ງຢູ່ເມືອງສາລະວັນຄື: ບ້ານນາໂພໃຫຍ່ ແລະບ້ານແກ້ງກາເວົາ. ໂດຍການເຂົ້າຮ່ວມຂອງທ່ານພູທົງ ຄຳມະນີວົງຮອງເຈົ້າແຂວງໆສາລະວັນຜູ້ຊີ້ນຳວຽກງານວັດທະນະທຳ-ສັງຄົມແຂວງ, ມີທ່ານໂວກັງ ຊົງເກີປະທານສະມາຄົມເຢຍລະມັນ-ລາວເພື່ອການພັດທະນາ, ມີບັນ ດາທ່ານເຈົ້າເມືອງ, ຮອງເຈົ້າເມືອງ, ຫ້ອງການທີ່ກ່ຽວຂ້ອງ, ຜູ້ຕາງໜ້າຜູ້ໃຫ້ທຶນ ແລະປະຊາຊົນຕະຫຼອດຮອດຄູອາຈານ ແລະນັກຮຽນເຂົ້າຮ່ວມ.

   ໂຮງຮຽນມູນລະປະຖົມບ້ານນາໂພໃຫຍ່ມືອງສາລະວັນມີຂະໜາດ 8 x 21 ແມັດເປັນອາຄານເຄີ່ງຖາວອນ, ກໍ່ດ້ວຍດິນຈີ່, ແອ້ມດ້ວຍໄມ້, ປູດ້ວຍເບຕົງ ແລະມຸງດ້ວຍອາລູຊິງມີ 3 ຫ້ອງຮຽນ ແລະມີໂຕະ, ຕັ່ງ, ກະດານຄົບຊຸດ ແລະມີຫ້ອງນ້ຳ 2 ຫ້ອງ, ນ້ຳບາດານ 1ບໍມູນຄ່າການກໍ່ສ້າງທັງໝົດ 200 ລ້ານກີບ, ໃນນັ້ນຊຸມຊົນປະກອບສ່ວນ 45 ລ້ານກີບໂດຍແມ່ນຄ່າແຮງງານ ແລະວັດຖຸຈຳນວນໜຶ່ງ. ນອກນັ້ນກໍ່ໄດ້ມີການກໍ່ສ້າງໂຮງຮຽນຢູ່ຄຸ້ມໜອງສະໂນບ້ານນາໂພໃຫຍ່ເປັນອາຄານແອ້ມດ້ວຍໄມ້, ມຸງດ້ວຍສັງກະສີຈຳນວນ 1 ຫ້ອງມູນຄ່າ 19 ລ້ານກີບໂດຍແມ່ນທຶນສົມທົບຂອງປະຊາຊົນ ແລະບໍລິສັດສຸກໃຈສາລະວັນຈຳນວນ 4 ລ້ານກີບ. ພ້ອມດ້ວຍກັນນັ້ນກໍ່ໄດ້ມີການມອບ-ຮັບໂຮງຮຽນມູນລະປະຖົມຢູ່ບ້ານແກ້ງກາເວົາຂະໜາດ 8 x 21 ແມັດເປັນອາຄານຖາວອນກໍ່ດ້ວຍດິນຈີ່, ປູດ້ວຍເບຕົງ ແລະມຸງດ້ວຍອາລູຊິງມີ 3 ຫ້ອງຮຽນ ແລະມີໂຕະ, ຕັ່ງ, ກະດານຄົບຊຸດໂດຍແມ່ນທຶນຊ່ວຍເຫຼືອຂອງມູນນິທິເຢຍລະມັນມູນຄ່າ 200 ລ້ານກີບ, ໃນນັ້ນຊຸມຊົນປະກອບສ່ວນ 45 ລ້ານກີບ. ຈາກນັ້ນກໍ່ໄດ້ມີການມອບ-ຮັບຢ່າງເປັນທາງການ ແລະໄດ້ມອບໃຫ້ອຳນາດການປົກຄອງບ້ານກໍຄືຄູອາຈານເປັນຜູ້ນຳໃຊ້ ແລະປົກປັກຮັກສາ. ເນື່ອງໃນໂອກາດເຂົ້າຮ່ວມມອບ-ຮັບໂຮງຮຽນຫຼັງໃໝ່ຄອບຄົວການນຳກໍ່ໄດ້ນຳເອົາເຄື່ອງນຸ່ງຫົ່ມຈຳນວນ 20 ສອບໄປມອບໃຫ້ກັບພໍ່ແມ່ປະຊາຊົນພາຍໃນກຸ່ມ 13 ໜອງບົວ ແລະບໍລິສັດສຸກໃຈສາລະວັນກໍ່ໄດ້ນຳເອົາເສື້ອຈຳນວນ 100 ກວ່າໂຕ ແລະເຂົ້າໝົມໄປມອບ ໃຫ້ປະຊາຊົນໃນບ້ານນາໂພໃຫຍ່ ແລະນ້ອງນ້ອຍນັກຮຽນນຳອີກ.

   ທ່ານ ພູທົງ ຄຳມະນີວົງ ຮອງເຈົ້າແຂວງສາລະວັນກໍ່ໄດ້ໂອ້ລົມ ແລະຮຽກຮ້ອງໃຫ້ພໍ່ແມ່ປະຊາຊົນເປັນເຈົ້າການໃນການຊຸກຍູ້, ສົ່ງເສີມລູກຫຼານໄດ້ເຂົ້າຮ່ຳຮຽນ ແລະປະກອບສ່ວນໃນການສ້າງສາພັດທະນາ, ປົກປັກຮັກສາໂຮງຮຽນ, ບູລະນະສ້ອມແປງ, ນອກນັ້ນຄູອາຈານສອນກໍ່ຕ້ອງເອົາໃຈໃສ່ການສິດສອນໃຫ້ໝົດຫຼັກສູດ, ແຂ່ງຂັນສອນດີ, ຮຽນເກັ່ງ ແລະຕ້ານປະກົດການຫຍໍ້ທໍ້ຕ່າງໆ ແລະເອົາໃຈໃສ່ຢ່າງແຂງແຮງໃນການໃຫ້ຄວາມຮູ້ໃຫ້ນັກຮຽນມີຄວາມຮູ້ຄວາມສາມາດພ້ອມທັງນຳໃຊ້ໃຫ້ເກີດປະໂຫຍດສູງສຸດຄຽງຄູ່ກັນນັ້ນເອົາໃຈໃສ່ປົກປັກຮັກສາ ແລະບູລະນະສ້ອມແປງ, ຊຶ່ງເປັນການແກ້ໄຂຄວາມທຸກຍາກໃນຂັ້ນໜຶ່ງໃນການພັດທະນາຊັບພະຍາກອນມະນຸດກໍຄືລູກຫຼານໃຫ້ມີຄຸນນະພາບ.

แชร์