ພັນກວ່າລາຍການສິນຄ້າວາງຈຳໜ່າຍຢູ່ສູນຝາກໂອດ໋ອບລາວ

  ສູນຝາກຂາຍໂອດ໋ອບລາວເປັນຈຸດລວມຝາກຂາຍຜະລິດຕະພັນຫັດຖະກໍາ ແລະກະສິກໍາປຸງແຕ່ງຂອງຜູ້ປະກອບການຂະໜາດນ້ອຍ ຫຼື ແບບຄອບຄົວທີ່ຜະລິດອອກມາຈາກພູມປັນຍາຂອງປະຊາຊົນລາວບັນດາເຜົ່າ ແລະນໍາໃຊ້ວັດຖຸດິບພາຍໃນປະເທດ, ຊຶ່ງປະຈຸບັນມີສິນຄ້າວາງຈໍາໜ່າຍຫຼາຍກວ່າ 1 ພັນລາຍການ.

  ພິທີເປີດໂຕສູນຝາກຂາຍໂອດ໋ອບລາວ NN/12 ແລະ ແປ້ງ “ມິສທິນຈໍາປາລາວ” ມີຂຶ້ນໃນວັນທີ 10 ທັນວາ 2019 ໂດຍໃຫ້ກຽດເຂົ້າຮ່ວມຂອງ ທ່ານຍາປ້າ ທອງວັນ ສີພັນດອນ ປະທານກິດຕິມະສັກສູນຝາກຂາຍໂອດ໋ອບລາວ, ທ່ານນາງ ປານີ ກິນດາວົງ ຮອງຫົວໜ້າກົມຂະບວນການຊາວໜຸ່ມ ປະຊາຊົນ ປະຕິວັດລາວ, ທ່ານ ວຽງວິໄລ ສີວິໄຊ ປະທານບໍລິສັດມິສທິນກ້າວໜ້າລາວ ຈໍາກັດຜູ້ດຽວ, ມີ ບັນດາພັນລະຍາການນໍາ, ຜູ້ໃຫ້ການສະໜັບສະໜູນ ແລະພາກສ່ວນກ່ຽວຂ້ອງເຂົ້າຮ່ວມ.

  ທ່ານ ນາງ ອານິດ ສີວິໄຊ ປະທານສູນຝາກຂາຍໂອດ໋ອບລາວກ່າວວ່າ: ສູນຝາກຂາຍໂອດ໋ອບລາວ NN/12 ແມ່ນ ສູນລວມຝາກຂາຍຜະລິດຕະພັນຫັດຖະກໍາ ແລະກະສິກໍາປຸງແຕ່ງຂອງຜູ້ປະກອບການຂະໜາດນ້ອຍ ຫຼື ແບບຄອບຄົວທີ່ຜະລິດອອກມາຈາກພູມປັນຍາຂອງປະຊາຊົນລາວບັນດາເຜົ່າ ແລະນໍາໃຊ້ວັດຖຸດິບພາຍໃນປະເທດ ເປັນຕົ້ນແມ່ນຜະລິດຕະພັນຫັດຖະກໍາຈັດສານ, ຫັດຖະກໍາຕໍ່າແຜ່ນແພ, ເຄື່ອງປັ້ນດິນເຜົາ, ເຄື່ອງ ແກະສະຫຼັກໄມ້, ເຄື່ອງປ່າຂອງດົງປະເພດຢາພື້ນເມືອງລາວ, ຜະ ລິດຕະພັນປຸງແຕ່ງກະສິກໍາ ແລະອື່ນໆ. ສູນດັ່ງກ່າວສ້າງຂຶ້ນໃນເດືອນຕຸລາ 2017, ພາຍໃຕ້ການຊີ້ນໍາຂອງທ່ານຍາປ້າທອງວັນ ສີພັນດອນ ໂດຍໄດ້ຮັບການສະໜັບສະ

ໜູນຫຼັກຈາກບໍລິສັດມິສທິນກ້າວໜ້າລາວ ຈໍາກັດຜູ້ດຽວ, ທັງນີ້ກໍເພື່ອໃຫ້ຜູ້ຜະລິດນໍາສິນຄ້າຂອງຕົນມາວາງຈໍາໜ່າຍເພື່ອສ້າງລາຍຮັບໃຫ້ແກ່ຄອບຄົວທັງເປັນການຊຸກຍູ້ສົ່ງເສິີມຜະລິດຕະພັນລາວໃຫ້ຄຽງຄູ່ກັບຄົນລາວຕະຫຼອດໄປ. ປະຈຸບັນ ສູນຝາກຂາຍໂອດ໋ອບລາວ NN/12 ມີຜະລິດຕະພັນຂອງພໍ່ແມ່ປະ ຊາຊົນໃນບັນດາແຂວງທົ່ວປະເທດວາງ ຈໍາໜ່າຍທັງໝົດ 1.450 ລາຍການ ໃນນີ້ ມີສິນ ຄ້າໂອດ໋ອບເກືອບ 50%, ໂດຍສິນຄ້າທີ່ຈໍາໜ່າຍດີເປັນພິເສດແມ່ນ ເຄື່ອງແກະສະຫຼັກໄມ້, ຫັດຖະກໍາຈັດສານ, ແຜ່ນແພ, ແລະອື່ນໆ ທີ່ມີຂະໜາດນ້ອຍເໝາະສໍາລັບເປັນເຄື່ອງຕ້ອນຂອງຝາກຂອງບັນດານັກທ່ອງທ່ຽວ.

  ສໍາລັບແປ້ງ “ມິສທິນຈໍາປາລາວ” ທ່ານ ວຽງວິໄລ ສີວິໄຊ ກ່າວວ່າ: ແປ້ງ “ມິສທິນຈໍາປາລາວ” ເປັນຜະລິດຕະພັນເຄື່ອງສໍາອາງທີ່ນໍາເຂົ້າຈາກຕ່າງປະເທດພາຍໃຕ້ລິຂະສິດມິສທິນຈໍາປາລາວເປັນແປ້ງລຸ້ນພິເສດມີສ່ວນປະສົມກັບຄຣີມຮອງພື້ນຊຶ່ງສາມາດປົກປິດລຽບນຽນ, ຄວບຄຸມຄວາມມັນ ແລະປົກປ້ອງແສງແດດໄດ້ 30 ເທົ່າ, ຊຶ່ງປະຈຸບັນມີວາງຂາຍຢູ່ຕາມຮ້ານຕົວແທນຈໍາໜ່າຍໃນນະຄອນຫຼວງວຽງຈັນ ແລະຕ່າງແຂວງທັງມີການເປີດຮັບສະໝັກສະມາຊິກ ແລະຕົວແທນຈໍາໜ່າຍທົ່ວປະເທດ.

  ແນວໃດດີພໍ່ແມ່ປະຊາຊົນຜູ້ຜະລິດສິນຄ້າຫັດຖະກໍາ ແລະກະສິກໍາປຸງແຕ່ງຂະໜາດນ້ອຍໃນແຕ່ລະທ້ອງຖິ່ນທົ່ວປະເທດສາມາດນໍາຜະລິດຕະພັນຂອງຕົນມາວາງຈໍາໜ່າຍໄດ້ ຫຼື ຖ້າລູກຄ້າທ່ານໃດຕ້ອງການຊື້ຜະລິດຕະພັນດັ່ງກ່າວກໍສາມາດຕິດຕໍ່ພົວພັນໄດ້ທີ່ສູນຝາກຂາຍໂອດ໋ອບລາວ NN/12 ຊຶ່ງມີສະຖານທີ່ຕັ້ງຢູ່ຊັ້ນ 1 ຂອງສູນການຄ້າວຽງຈັນເຊັນເຕີນະຄອນຫຼວງວຽງຈັນ.

__________

ຂຽນໂດຍ: ກິ່ງລັດຕະນະ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์