ກົມຄຸ້ມຄອງສໍາມະໂນຄົວຊີ້ນໍາ ປກສ ບໍລິຄໍາໄຊ

   ເມື່ອວັນທີ 6 ທັນວາ 2019 ທ່ານ ພົນຈັດຕະວາ ຄໍາສາຍ ຈັນ ທະວົງ ຄະນະພັກກະຊວງຫົວໜ້າກົມຄຸ້ມຄອງສໍາມະໂນຄົວ ແລະ ກໍ່ສ້າງຮາກຖານພ້ອມດ້ວຍຄະນະ ທີມງານໄດ້ລົງມາຊີ້ນຳ, ກວດກາ ການເຮັດວຽກວິຊາສະເພາະຢູ່ ປກສ ແຂວງບໍລິຄໍາໄຊ, ມີທ່ານ ພັນໂທ ຄໍາແພງ ນໍາພາວັນ ຄະນະພັກຮອງຫົວໜ້າກອງບັນຊາການ ປກສ ແຂວງ, ທ່ານ ພັນໂທ ໄຊຍະສຸກ ຫຼຽນຕະກຸນ ເລຂາຄະນະພັກຮາກຖານຫົວໜ້າຫ້ອງຄຸ້ມຄອງສໍາມະໂນຄົວ ແລະ ກໍ່ສ້າງ ຮາກຖານ ປກສ ແຂວງ, ມີຄະນະພັກ-ຄະນະຫ້ອງ, ບັນດາພະແນກ, ປກສ ເມືອງ, ຕະຫຼອດພະນັກງານ-ນັກຮົບເຂົ້າຮ່ວມ.

ທ່ານ ພັນໂທ ໄຊຍະສຸກ ຫຼຽນ ຕະກຸນ ໄດ້ຜ່ານບົດລາຍງານຫຍໍ້ໃຫ້ຄະນະພັກຂັ້ນເທິງໄດ້ຮັບຊາບຊຶ່ງໄດ້ຍົກໃຫ້ເຫັນທີ່ຕັ້ງ, ພາລາບົດບາດ, ສິດ ແລະ ໜ້າທີ່, ຫ້ອງຄຸ້ມຄອງສໍາມະໂນຄົວປະກອບມີຄະນະພັກຮາກຖານ 5 ສະຫາຍ, ມີສະມາຊິກພັກ, ພະນັກງານ-ນັກຮົົບທັງໝົດ 57 ສະຫາຍ, ຊຶ່ງຄະນະພັກໄດ້ເອົາໃສ່ສຶກສາອົບຮົມການເມືອງ-ແນວຄິດໃຫ້ສະມາຊິກພັກ, ພະນັກງານ-ນັກຮົບຢ່າງເປັນປົກກະຕິຈຶ່ງເຮັດພະນັກງານ-ນັັກຮົບມີຄວາມອຸ່ນອ່ຽນທຸ່ນທ່ຽງ, ມີຄຸນສົມບັດສິນທໍາປະຕິວັດ, ເຊື່ອໝັ້ນຕໍ່ແນວທາງນະໂຍບາຍຂອງພັກ, ເຄົາລົບລະບຽບກົດໝາຍຂອງລັດ, ເປັນເຈົ້າການໃນການປະຕິບັດໜ້າທີ່ວຽກງານວິຊາສະເພາະຕາມການມອບໝາຍຊຶ່ງສະແດງອອກໄລຍະ 1 ປີຜ່ານມາສາມາດເກັບກໍາສະຖິຕິໃນທົ່ວແຂວງ ມີ 53.059 ຫຼັງຄາເຮືອນ, ມີ 53.769 ຄອບຄົວ, ມີຈໍານວນພົນທົງໝົດ 311.216 ຄົນ, ຍິງ 165.810 ຄົນ, ໄດ້ຂຶ້ນສໍາມະໂນຄົວແລ້ວ 53.423 ຄອບຄົວ, ຍັງບໍ່ທັນໄດ້ຂຶ້ນສໍາມະໂນຄົວ 346 ຄອບຄົວ, ມີ 2.276 ຄົນ, ຍິງ 1.167 ຄົນ, ທົ່ວແຂວງມີໂຮງແຮມ 34 ແຫ່ງ, ເຮືອນພັກ 87 ແຫ່ງ, ເຮືອນໃຫ້ເຊົ່າ 27 ແຫ່ງ, ຂຶ້ນທະບຽນສໍາເລັດ 100%, ມີ ຮ້ານບັນເທິງ 9 ແຫ່ງ, ຮ້ານກິນດື່ມ 149 ແຫ່ງ, ຮ້ານຄາລາໂອເກະ 7 ແຫ່ງ, ຂຶ້ນທະບຽນສໍາເລັດ 100%,  ລົງຝຶກອົບຮົມພາລະບົດບາດ, ສິດ ແລະໜ້າທີ່ ປກສ ກຸ່ມ ປກສ ບ້ານ ຢູ່ເມືອງທ່າພະບາດ ແລະ ເມືອງໄຊຈໍາພອນສໍາເລັດ 100%, ເກັບກໍາສະຖິຕິຄອບຄົວ ແລະ ບ້ານປອດຄະດີໄດ້ 121 ບ້ານ, ມີ 24.930 ຄອບຄົວ, ລົງເຄື່ອນໄຫວເກັບກໍາບັນດາປາກົດການຫຍໍ້ທໍ້ຢູ່ 7 ຕົວເມືອງໄດ້ 108 ຄັ້ງ, ລົງເຮັດວຽກວິຊາສະເພາະຢູ່ບັນ ດາ ປກສ ເມືອງໄດ້ 14 ຄັ້ງ, ສົ່ງພະນັກງານລົງກໍ່ສ້າງຮາກຖານຢູ່ເມືອງບໍລິຄັນ ແລະ ເມືອງວຽງທອງ 24 ສະຫາຍ, ຂຶ້ນທະບຽນຄຸ້ມຄອງອາວຸດໃຫ້ພະນັກງານ-ນັກຮົບ ແລະ ພະນັກງານ-ລັດຖະກອນໄດ້ 30 ບັດ, ຜະລິດຕາປະທັບໄດ້ 123 ໜ່ວຍ, ອອກບັດປະຈໍາຕົວໃຫ້ພະນັກງານ ແລະ ປະຊາຊົນໄດ້ 13.583 ບັດ, ປ່ຽນ ບັດໃໝ່ 5.379 ບັດ, ນອກນັ້ນຍັງໄດ້ເອົາໃຈໃສ່ວຽກງານຄຸ້ມຄອງເອກະສານຂາເຂົ້າ-ຂາອອກ, ຂຶ້ນແຜນລາຍຮັບ-ລາຍຈ່າຍ, ສ້າງ ຂະບວນການແຂ່ງຂັນກີລາ ແລະ ອອກແຮງງານລວມ ແລະ ປະຈໍາການ 24 ຊົ່ວໂມງ ຢ່າງເປັນ ປົກກະຕິ.

ທ່ານ ພົນຈັດຕະວາ ຄໍາສາຍ ຈັນທະວົງ ໄດ້ສະແດງຄວາມຍ້ອງຍໍຊົມເຊີຍຄະນະພັກ-ຄະນະຫ້ອງ, ພະນັກງານ-ນັກຮົບທີ່ສາມາດເຮັດສໍາເລັດໜ້າທີ່ວຽກງານທີ່ການຈັດຕັ້ງຂັ້ນເທິງມອບໝາຍໃຫ້, ເນັ້ນໜັກໃຫ້ເຮັດວຽກງານສືກສາອົບຮົມການເມືອງ-ແນວຄິດໃຫ້ພະນັກງານ-ນັກຮົບຢ່າງເປັນປົກກະຕິ, ສືບຕໍ່ຊີ້ນໍາໆພາພະນັກງານ-ນັກຮົບເຄື່ອນໄຫວເຮັດວຽກງານວິຊາສະເພາະເປັນຕົ້ນກໍ່ແມ່ນການເກັບກໍາສະຖິຕິພົນລະເມືອງ, ກໍາໃຫ້ໄດ້ຄົນເພີ່ມ, ຄົນຫຼຸດ, ຄົນຍົກ ຍ້າຍມາ, ຍົກຍ້າຍອອກໄປ, ສືບຕໍ່ລົງຝຶກອົບຮົມສິດ, ໜ້າທີ່ພາລະບົດບາດໃຫ້ ປກສ ກຸ່ມ, ປກສ ບ້ານໃຫ້ສໍາເລັດ, ລົງເກັບກໍາສະຖິຕິ, ຕີລາຄາປະເມີນຜົນເພື່ອປະ ກາດສ້າງຄອບຄົວ ແລະ ບ້ານປ້ອງກັນຄວາມສະຫງົບດີເຮັດໃຫ້ວຽກງານຄຸ້ມຄອງສໍາມະໂນຄົວ ແລະ ກໍ່ສ້າງຮາກຖານກາຍເປັນວຽກງານຈຸດສຸມສໍາຄັນແນ່ໃສ່ ຕ້ານ, ສະກັດກັ້ນບັນຫາ 4 ເຖື່ອນ ເຮັດໃຫ້ແຂວງມີສະຖຽນລະພາບທາງການເມືອງ, ມີຄວາມສະຫງົບ ແລະ ສັງຄົມມີຄວາມເປັນລະບຽບຮຽບຮ້ອຍ, ໂອກາດດັ່ງກ່າວທ່ານຍັງໄດ້ມອບຄອມພິວເຕີຈໍານວນ 1 ຊຸດ ໃຫ້ຄຸ້ມຄອງສໍາມະໂນຄົວ ແລະ ກໍ່ສ້າງຮາກຖານ ປກສ ແຂວງບໍລິຄໍາໄຊຕື່ມອີກ.

-------------------

ຂ່າວ: ພອນສະຫວັນ

แชร์